YEGIL MBAAX NE YEESU ne Lik a bindtuuna 19 - NQAARIIT NE ROOG

Yeesu fa Sake

¹ Cinj kaaga, Yeesu a xaaña kam Yeriko, a suuraa.

² A jeg’a maaga o koor o mayu halal oxaa ne’eena Sake, a ref o aa-adax no waa ndabdinooxoogna juuti.

³ Sake a bug’a o and oxe Yeesu a refna, ndaa waag’iran o ga yaam wiin mayu waa ndeefan’uuna kaa mbegoogun o ten. Sake kaa raƥ’u bo ta hup.

⁴ Naaga, a dalfooxa o ƴuf a adook, soo a ŋaay no ndaxar naa yoorooxna a ƭat alaa, ndax ta ga’in, yaam maaga Yeesu a war’u o reef.

⁵ Yaa Yeesu a fadiidna no mbiñ onqaaga, a daxaaƴooxa, soo a layin ee: «Heey Sake, ñofandi fudooxiid, yaam no mbind of bugum o dal xaye.»

⁶ Sake a ñofa o fudoox, soo a ret a ɓis a Yeesu no mbind um ndax ta dalnin. Sake a sawar’a lool,

⁷ ndaa waa nga’na kaaga fop a ñunqumtilooxooga yee: «Ɗeeti Yeesu a dalik no mbind no koor o paabakaad!»

⁸ Kaa koy, Sake a inooxa, a geenoox soo a lay o Yaal oxe yee: «O Caajangin oxe, we njegeerna dara, xam coox a den genwal fee na halal fee mi, too a soƥangaa yee naxaam o kiin, ñaam xaaliis um, xam daknin o ten kaa hupna boo a caf a nahak.»

⁹ Yeesu a doonaan ee: «Xaye sax a muc ale a rokiida no mbind nene, yaam o koor oxene o ndaan Abraham oo.

¹⁰ Yaam o Ƥeenqe no kiin oxe kaa waaƭiid too a mucliid ke mo’na.»

Xa qanjar xarɓaxay wurus axe

¹¹ Waa ndeeƭna maaga a nan-gilooxooga kaaga, too Yeesu a dakooxa o naxoox a den yaam kaa matiidoogu a Yeerusaleem, too a mboog’a yee na waxtu faaga xan Maat ne Roog a feeñ.

¹² A laya boog ee: «O kiin o maak ñaaƴkoogu na saate fa ngoƭu ndax ta dodoox o maad, soo a nomtooxiidkaa.

¹³ A xoya faɗ xarɓaxay we ten ndax ta doxin a den, o kiin oo kiin o xanjar o leng wurus, too a lay a den ee: ‹Ndimandyo a den boo um helko fo nomtooxiidaa.›

¹⁴ Kaa koy, we ngen’ina fo ten kaa sib’un, too a lula wiin a cinj um, ndax da lay ee: ‹I mbugee oxene a dodel o maad in.›

¹⁵ Yaa o kiin o maak oxe a nomtooxiidna, a soƥ ta sog o refaa o maad, a xoyna paam um faɗ we ta doxin’ina xaaliis fee, ndax ta and ne o kiin oo kiin na den a rimandit’ina xaaliis um.

¹⁶ O eetaand oxe a gara, a lay ee: ‹O yaal mbind es, o xanjar o leng ole a rima xa qanjar xarɓaxay.›

¹⁷ O yaal mbind um a layaan ee: ‹Jook a njal o tag o paax oxe. Gore’aa no tig neewu, ten taxu xam doxnong teeru xarɓaxay!›

¹⁸ O ƭikandeer oxe a gara, too a lay ee: ‹O yaal mbind es, o xanjar ole wo a rima xa qanjar xa ƥetaq.›

¹⁹ O yaal mbind um a layaan ee: ‹Wo itam, xam doxnong teeru ƥetik.›

²⁰ O lakas a gara, a layin ee: ‹O yaal mbind es, o xanjar of oxey, kaam fof’un, geekin.

²¹ Kaam diid’u yaam ne refoona o kiin o ƭomu tig, kaa o sertaa kaa geekeeroona, soo saxadaa kaa duufeeroona.›

²² O yaal mbind ne a layaan ee: ‹Xam hate’ong na fa lay of, o tag o soxodu xe! And’aa xil ee o kiin o ƭomu tig refum, kaam sertaa kaa geekeeruuma, too saxadaa kaa duufeeruuma.

²³ Ndax kaa waag’iro o rawnit xaaliis fee mi, ndax um nomtooxiidangaa, um waag o daaw xaaliis es fo ke ta rimna?›

²⁴ Cinj kaaga, a laya waa ndeeƭna maaga yee: ‹Njaɓyo o xanjar o leng ole ta jegna, too cooxin oxe jegna xa qanjar xarɓaxay axe.›

²⁵ A layaan ee: ‹Yaal mbind, mee ndax a jega xa qanjar xarɓaxay boo a ƴut?›

²⁶ ‹Neene koy, mexe layaa a nuun ee: Oxe jegna, xan a ci’el, ndaa oxe jegeerna o mat, onqe ta jegna sax xan a jaɓel.

²⁷ Fañ we mi koy mbugeerna um maadoox took den, ƥisiidaamoo a den mene, too mbar a den mbaambir es.› »

Yeesu a rokiida Yeerusaleem

²⁸ A cinj yaa ta layna kaaga, Yeesu a adooxa, faan laa a ndeef took um, da mbaaƭik a Yeerusaleem.

²⁹ Yaa da mbaambnooxna a Betfage fa Betani, farna fo o Joong olaa no taxar oliiw kaa, Yeesu a lula ɗik no daalbe we ten,

³⁰ a lay a den ee: «Ndetyo na saate fee refna mbaambir nuun. Nu mbadangaa boo ndok, xan nu soƥ maaga o mol o mbaam onqaa humeena, too o leng mosiran o ŋaay. Mbokteenoo, ƥisiidaam o ten.

³¹ O kiin a laamtangaa a nuun ee: ‹Xar taxu nu mboktan?› fat nu ndoonin ee: ‹O Yaal oxe soxla’un.› »

³² Waa lul’eena a ndeta, too a soƥaan ne Yeesu a layit’uuna a den.

³³ Yaa da mboktaa o mol onqaa, we njeg’uuna a laya a den ee: «Xar taxu nu mboktan?»

³⁴ A ndoona a den ee: «O Yaal oxe soxla’un.»

³⁵ Maaga, a ƥisiida a Yeesu o mol onqaa, a ƭapanin toki den, soo a ŋaaynin took fee.

³⁶ Yaa da ndetaa, wiin mayu a ƭaapooga toki den kam a ƭat ale.

³⁷ Yaa da mbaambnooxna Yeerusaleem, farna fa pudin alaa no Joong olaa no taxar oliiw kaa, faan laa no daalbe waa fop a sawara, a simataa a Roog a maak yaam a pi katil ake da nga’’ina.

³⁸ Kaa layoogu yee: «O Maad oxe na garaa no gon le no Yaal oxe a hela simatel! Jam took asamaan fo o ndam took-ee-took!»

³⁹ Leng-leng no Farisiya waa ndeeƭna ndeer no faan laa a laya a Yeesu yee: «O Caajangin oxe, tiimni daalbe we wo!»

⁴⁰ Kaa koy, Yeesu a doona a den ee: «Mexe layaa a nuun ee a tiimangaa sax, xan a kac ake a mbalaloox!»

Dawid fo o Muumucil oxe regteena

⁴¹ Yaa Yeesu a faambnooxna teeru faa boo a ga’in, a loolooxaan, a lay ee:

⁴² «Wo itam, boo waag’oona o and xaye ke waagoonga o ci jam! Kaa koy, ndiiki kaa mo a kid of.

⁴³ Xan a jeg a pe akaa andoona yee xan fañ we wo a mbidong o kurul-keƥ, a mbegong, soo a ƥiiklong o saax oo saax.

⁴⁴ Xan a ngefong tuƈ, a saŋik we ngenna me wo, too nqaƴkee na wo muul leng took gend um, yaam andiro waxtu fee xalatooxiidee’oona.»

Yeesu a raxa jiijikax waa no Mbind Roog naa

⁴⁵ Yeesu a roka kam Mbind Roog naa soo a ref no raxaa jiijikax waa.

⁴⁶ A laya a den ee: «A Pind a Tedu ke a laya yee: ‹Mbind es, mbind a qeƭ a refkaa.› Nuun o mat, kaa nu mbi’in ngol no guuɗ.»

⁴⁷ Na pe akaaga fop kam Mbind Roog naa a jangnoogu, too saasadax maak waa fo jaajangin waa no kebil ke fo kelfa kaa na xeet faa a mbaaƭooga maa da mbartuuna.

⁴⁸ Kaa koy, njeg’ee pexey naa da mbi’tuuna, yaam xeet faa fop kaa ndeeroogun cay, a nan-gilooxan.