YEGIL MBAAX NE YEESU ne Lik a bindtuuna 16 - NQAARIIT NE ROOG

A naxax ale no paɗ o kore’aƭaru xe

¹ Yeesu a layahina daalbe we ten ee: «A jeg’a o kiin oxaa jegna halal, a doxnin o paɗ um. O paɗ oxaaga a hoƥatit’e, yaam ne ta ñaam’ina halal no yaal mbind um.

² O yaal mbind um a xoyaan, too a layin ee: ‹Xar um nanaa kaa farna na wo? Daknaam ke doxin’oonga, yaam waagkatiro o ref jawdiin es.›

³ O paɗ oxe a laya taa no yiif um ee: ‹O yaal mbind es kaa bug o jaɓ ke ta doxin’axama. Nam um fi’kaa? Ndax kaa um xooxkaa? Kaa koy, jegiim doole um. A sadaxnax koy? Kaaga itam, gaci es oo!

⁴ Aa! Ndiiki andaam ke waruuma o fi, ndax wiin we a ndalnaxam no pind den, yaa raxeema no calel ke mi.›

⁵ Maaga, a xoyna o kiin oo kiin no waa saqan’ina o yaal mbind um o lad. A laamta o eetaand oxe yee: ‹Podnum saqano o yaal mbind es?›

⁶ A doonaan ee: ‹A qandi diwliin boo teemeed.› O paɗ oxe a layaan ee: ‹A kayit of oxey, ñofi moof, too bind ee qarɓeen ƥetik oo!›

⁷ A dakooxa o laamit o ƭikandeer oxe yee: ‹Wo o mat, podnum saqano o yaal mbind es?› Ta doonin ee: ‹Parig teemeed kaaf.› Maaga, a layaan ee: ‹A kayit of oxey, ñofi moof, too bind ee parig qarɓeen ɓetuu tadik oo!›

⁸ O yaal mbind ne a kaña o paɗ o kore’aƭaru xe yaam ne ta fi’’ina nen o kiin o ƈiƴu.» Yeesu a doona teen ee: «Wiin we na jamaane fene moƴu o ƈiƴ mbaambir no gend den ee wiin we na qoolaand ale.

⁹ Ten taxu mexe layaa a nuun ee: Nqaariitoorityo kalal leweer ke na adna fee, ndax a kasaara’ooxangaa, nu njaɓel kam pind paafkeer kaa.

¹⁰ Oxuu gore’na no ndik, xan a gore no tig maak itam, too oxuu jofeerna no ndik, jofkee no tig maak itam.

¹¹ Boo nu ngore’eerna no kalal leweer ke na adna fee, an na doxinkaa a nuun kalal tigil ke?

¹² Boo nu ngore’eerna no tig no lakas itam, an na cooxkaa a nuun ke nu njegna?

¹³ Surga fa leng waagee o dagoox yaal ɗik, yaam yaaga xan a fex oxene, soo a fañ oxaana mbaat ta damoox no xene, soo a sib oxe yoqna. Nu mbaagee o mbug o ndagoox a Roog, soo mbug o ndagoox Xaaliis.»

Wiin we fa Roog

¹⁴ Farisiya we a nan-gilooxa fa lay fee Yeesu fop, too kaa nqaadnooxoogun, yaam ne da mbex’ina xaaliis.

¹⁵ Yeesu a laya a den ee: «Kaa nu mbi’ooxaa wiin jofu mbaambir no wiin we, ndaa Roog a anda ke refna kam a qeeñ nuun. Ke wiin we a ƭeetaa nen tig maak, Roog a sibu.

¹⁶ Kebil ke Moyiis fo duleer we a maad’a boo na Saŋ o Paabatiise xe. Cinj kaaga, Yegil mbaax ne no Maat ne Roog kaa waare’eel, too o kiin oo kiin kaa jeemaa fa doole um, ndax ta rok teen.

¹⁷ Asamaan fo lanq a mbaaf moƴu o yooɓ ee bind leng no kebil ke a fortoox.

¹⁸ Oxuu waasna o teem, soo a gilig o lakas, a seeqa fo ten, too oxuu giligna o tew o baase, a seeqa itam.»

O yaal halal oxe fa Lasaar

¹⁹ «A jeg’a o yaal halal oxaa rokooxoogna ndoki daalde fo sooy, too bes fuu refna kaa bumbaayoogu, a ñoowaa o ñoow o felu.

²⁰ A jeg’a itam o ndool o ne’e Lasaar, oxaa andoona yee kaa wondooxoogu paam begax ne no yaal halal oxe, a jeg a ƭoy a mayu.

²¹ A bugooga o ñaam pep ke samtoogna no roon ole no yaal halal oxe. Xa ƥox axe sax kaa metoogu a ƭoy ake no kiin oxeene.

²² Na bes fa leng, o ndool onqe a xona, too malaaka ke a ƥisaan ta ɓopnook a Abraham. O yaal halal oxe itam a xona, a gasel.

²³ Kam jaaniif, a coono’ooga lool. Maaga, a ƴooka a Abraham koƭu ta ɓop a Lasaar.

²⁴ Yaa ta ga’uuna, a wuuqa yee: ‹Heey, o taan es Abraham! Ngela yirmaam! Luliidi a Lasaar, ndax ta suup nqol um na foofi, a xuƥandanaam ɗelem es, yaam kaam coono’aa lool no fiɗel lene.›

²⁵ Abraham a doonaan ee: ‹O ƥees, wetandooxi yee ye nu ñoowaa, daaw’aa a las of, too Lasaar o mat a coono’oogu. Ndiiki koy, oxey meeke rek a yuunaa, soo wo o mat o coono’aa.

²⁶ A refee keene sax oo, ndeer me i ndefna fo me nu ndefna a jega gamb maak, ndax we mbugna o inoorit mene a ngar me nuun mbaagkiran o mbi, too nuun itam oo nu mbaagkiran.›

²⁷ O yaal halal oxe a laya yee: ‹O taan es Abraham! Mexe xeɗang boog, o lul a Lasaar no mbind faap es.

²⁸ Jegaam xa teɓ xa ƥetaq. Fat a maƭoox a den, ndax ngarkee den itam no mbiñ o ƭomu nqene.›

²⁹ Abraham a doonaan ee: ‹A njega a safe ke Moyiis fo ke duleer we a mbindna. Fat a nan-giloox ke da layaa.›

³⁰ Maaga, a doona yee: ‹O taan es Abraham! Keene soom deyee! Kaa koy, boo o leng no xon we a retna maaga, xan a mbes pakaad den a cinj.›

³¹ Kaa koy, Abraham a doonaan ee: ‹A mbañangaa o nan-giloox a Moyiis fo duleer we, njaɓkee sax o ngim yaa o leng a xontooxna a ndeer no xon waa.› »