YEGIL MBAAX NE YEESU ne Lik a bindtuuna 11 - NQAARIIT NE ROOG

Kaa farna na qeƭ

¹ Bes, Yeesu a xeɗooga o mbiñ. Yaa ta ƴutna, o leng no daalbe waa ten a layaan ee: «O Yaal oxe, jangni a in ne i mbarna o nqeɗtaa, ne Saŋ a jangnituuna daalbe we ten.»

² Yeesu a laya a den ee: «Boo nu nqeɗaa, layyo yee: Faap, yaasam gon of a tedleel! Yaasam maat of a fadiid!

³ Ci’i a in ñoowir in no mbeet oo mbeet!

⁴ Waasani a in pakaad in, yaam kaa i mbaasanaa we tooñna a in. Ba o waas a in, i ndok no mbog!»

⁵ Yeesu a layahina a den ee: «A soƥangaa yee o leng na nuun kaa jeg a xaariit, oxeene a soƥiidin no mbind um o yeng o njeek, ndax ta layin ee: ‹Xaariit es, ɓandaam puuru tadik.

⁶ O leng no qaariit es kaa ɗeetiidaam no mbind es, too jegiim tus kaa cooxanuuma.›

⁷ Maaga, ndax xan a doonin ee: ‹Jegiim o daaw of! Wegaam boo ƴut, too kaa refeerna keene sax oo i mbondooxa, mi fo xa caaƈ axe. Waagiim o inooxiid cooxong puuru.›

⁸ Mexe layaa a nuun ee: A inooxangee a cooxin a den sax oo yaam ne oxeene a refna xaariit um, xan a inoox yaam ndik ta wennoor a xoox um, too xan a cooxin fop ke ta soxla’na.

⁹ Mi o mat, mexe layaa a nuun ee: Nqeɗyo a Roog, too xan nu ci’el, mbaaƭyo, too xan nu nga. Koŋ-koŋinyo, too xan nu mbetanel.

¹⁰ Oxuu xeɗna a Roog, xan a ci’el, too oxuu waaƭna, xan a ga. Oxuu koŋ-koŋinna, xan a wetanel.

¹¹ Faap fum na nuun na cooxkaa o ƥeem fangool, yaa ta xeɗuuna liƥ?

¹² Ndi a xeɗangaan ɓoof ndax xan a ci’in a beex?

¹³ Ke nu soxodna soxod fop oo, kaa nu ci’aa xa ƥiy nuun tig paax. Yaaga koy, ndax Faap nuun fee na asamaan ci’kee Yiif Tedu le we nqeɗuuna o ten?»

Yeesu a wodanda oxaa muumna too cini a ndamin

¹⁴ Yeesu a raxa jini faa muumand’ina o kiin. Yaa jini faa a sutooxna, o muum oxaa a laya. Kaaga a bet’a wiin waa fop.

¹⁵ Kaa koy, yaa leng-leng no waa ndeeƭna maaga a nanuuna, a laya yee: «Na pexey Belsebul fee refna o maad oxe no cini ke a raxtaa cini ke.»

¹⁶ Maaga, lakas we a mbug’aan o mbog, too a laamtaan ta fi o anddiloor olaa inoorna na asamaan.

¹⁷ Yeesu a anda a qalaat den, too a laya a den ee: «Boo we mbogna maat a nqaajoorna a ndeer den, maat naaga waagee o miñ. Mbind nuu refna xan a jiƭtoox took ngend um.

¹⁸ Boo Saytaane a xaajoorna fa xoox um boog, nam mbind um a waagu miñit? Kaa nu layaa yee na pexey Belsebul um raxtaa cini ke?

¹⁹ Mi koy, um naagangaa o raxaa cini ke na pexey Belsebul, yaaga xa ƥiy nuun na pexey an a ndaxtan? Ten taxu den fa qoox den na ndefkaa haahate nuun.

²⁰ Kaa koy, a refangaa yee na pexey nqol Roog um raxtaa cini ke, yaaga Maat ne Roog a fadiida me nuun.

²¹ Boo o kiin o cegu doole a saqna ƥonax um, a yetooxaa mbind um, o jeg um fop a naaga o lewaa.

²² Kaa koy, boo o kiin oxaa hupuuna doole a garna, xan a maafin, a jaɓ ñoxorir ke ta yaakaar’ina fop, soo a lasit ke ta jaɓitna no ten.

²³ Oxuu fareerna fa mi kaa fañaam, too oxuu fokateerna fa mi kaa pictaa

A kat ale na jini fee

²⁴ «Boo jini a xaƴna o kiin, a naaga o retaa na koƥ a beeru, a waaƭaa maa ta ñootnooxna. A ga’angee, xan a lay ee: ‹Xam nomtoox no mbind es naa sutooruuma.›

²⁵ A fadiidangaa koy, a soƥ ta leelel boo a xool, a mosandel,

²⁶ a naaga o retaa, a xot cini ɓetuu ƭik lakas kaa moƴuuna o soxod, da ndet a ndal kam mbind naa. Palakaand ke dalatna o kiin oxeene a naaga o moƴaa o faaxaƭar ke eet’uuna o dal.»

O ɗaay o ndigil

²⁷ Ye Yeesu a maadna o layaa, o tew a laya a maak ndeer no wiin waa yee: «Oxe rimoonga, a numnong a ɗaaya!»

²⁸ Maaga, Yeesu a doonaan ee: «We na nan-gilooxaa fa lay fee Roog, soo a ngayan kañ ƭaayu!»

O anddiloor ole Yoona

²⁹ Yaa wiin waa a moƴna o mayaa, Yeesu a laya a den ee: «Xeet fa soxodu fene oxe xeɗaa o anddiloor. Kaa koy, Roog ci’kee a den o anddiloor o lakas olaa refeerna ole Yoona.

³⁰ Ne Yoona a refit’ina o anddiloor no Niininiif waa, neene o Ƥeenqe no kiin oxe a refitkaa o anddiloor na xeet fene.

³¹ Xan o maad o tew oxaa inoor’ina no ɓemb-roog o ñamaak a inoox na bes faa no nqel naa Roog, a soq goor we na xeet fene yaam a inoor’a no cat adna ndax ta nan-gilook o and o maak olaa Salomo. Oxe na layaa fa nuun koy hupu a Salomo.

³² Na bes faa no nqel naa Roog, xan Niininiif we a inoox mbaambir no xeet fene, a soq a den, yaam a mbes’a pakaad den a cinj ye Yoona a waare’na a den. Oxe na layaa fa nuun koy hupu a Yoona.»

A ngid refu o lampa cer

³³ «O leng heƥandkee o lampa boo a ƴut, soo a ɗasnin o mbiñ mbaat ta sagin a saxal. Kaa ɗagan, ndax we na ndokiidaa na ndok ale a mbaag o nga a qoolaand ale.

³⁴ A ngid of refu o lampa cer of. Ñiiñax a ñaaƴangee a ngid of, xan cer of fop a nqool. Kaa koy, boo andoona yee ñiiñax a ñaaƴa a ngid of, cer of fop xan a nuk.

³⁵ Wootooxi boog yaam ndik a qoolaand ale refna na wo a ref o niɓaan.

³⁶ Boo cer of fop a nqoolna, too njegee o niɓaan o leng, xan a nqoolit nen o jam olaa xoolandoonga.»

Ndaw sabab took no Farisiya we fo jaajangin we no kebil ke

³⁷ Yaa Yeesu a ƴutna fa lay, o Farisiya a xoyaan a put no mbind um. A roka, too a reera fo ten.

³⁸ Yaa o Farisiya xaa a ga’na Yeesu a ñaamaa too japee, kaaga a bet’aan.

³⁹ Kaa koy, o Yaal oxe a layaan ee: «Nuun Farisiya we, kaa nu ƥogdaa took fee na tokol ale fo took fee no roon ole, too kam nuun kaa nu may fo kuuɗe fo coxod.

⁴⁰ Nuun soo ndef ɗof! Mee ndax Roog fee sakna tafil fee saku kam fee itam?

⁴¹ Kaa nu mbar o sadax rool we kañ ke refna kam fee, too yaaga xan fop a xool na nuun.

⁴² Kaa koy, ndaw sabab took nuun, nuun Farisiya we! Kaa nu cooxtaa a seek xarɓaxayandeer ale na naana fee fo no tuufe-duufe ke nuun moƴna o neew too njaree tig, soo koy nqaƴ o cofel ole fo o mbeq onqe Roog. Keene kaa jareena o fi oo, ndaa waree o tax nu yapatil tig lakas ke itam.

⁴³ Ndaw sabab took nuun, nuun Farisiya we! Kaa nu mbex o mbodaa mbaambir kam pind a qeƭ ke, too mbex o simnel no qel ke.

⁴⁴ Ndaw sabab took nuun! Yaam kaa nu nand fo poy kaa ƭasna, wiin we a ndakaa a den, too andkiran.»

⁴⁵ O leng no jaajangin maak waa no kebil kaa a layaan ee: «O Caajangin oxe, o naagangaa o laytaa neene, kaa o wenaa a in itam.»

⁴⁶ Yeesu a doonaan ee: «Ndaw sabab took nuun itam, nuun jaajangin maak we no kebil ke! Kaa nu ngadnaa wiin we a toq akaa ƭomeena ndoxondoox, too nu ndimle’itkee a den poye no saqit mbaambaañ sax.

⁴⁷ Ndaw sabab took nuun, yaam kaa nu maxaa poy ke no duleer we daan we nuun a mbarna.

⁴⁸ Nu seede’a boog a pi ake no daan we nuun, too nu njaɓa a den, yaam den a mbara duleer we, soo nuun o mat nu maxaa poy ke den.

⁴⁹ Ten taxu, oxe na xoyeel o Jeg-yiif ole Roog a laya yee: ‹Xam ɓisiid a den duleer fo apootar. Xan a mbar leng we, lakas we da ñagadil a den.›

⁵⁰ Neene, fo’oy laa no duleer waa mbar’eena no mberaandoong adna xan a yen took wiin we ndiiki,

⁵¹ no kaa xotitna na Abel boo no fo’oy laa Sakari fee warit’eena a ndeer Mbind Roog naa fo o sadaxand olaa. Iyo, mexe layaa a nuun ee: Xan a laacel wiin we ndiiki.

⁵² Ndaw sabab took nuun, nuun jaajangin maak we no kebil ke, yaam nu njanga o jaafu le, mbegtin o and ole. Nuun fa qoox nuun, nu ndokee, soo yaqanaa we mbugna o ndok da ndokiid.»

⁵³ Yaa Yeesu a sutooxna o mbiñ onqaaga, jaajangin waa no kebil kaa fo Farisiya waa a ndalfooxa o ndef no nqasooxanan, a laamtan tig mayu.

⁵⁴ Kaa mbug’un o mbog too a cungaa ta juum no ɗelem.