Kolos 2 - NQAARIIT NE ROOG

¹ Kaam bug nu and xil ne um gomriteel yaam nuun fo yaam we ndefna kam teeru fee Lawodise fo yaam fop we andoona sax ee a kid in mosee o ndoonoor,

² ndax da mbaag o njeg yaaloor, o mbeq a fokat a den, da mbapoor yiif o andik kunpa Roog, ta ref Kiristaa.

³ Na Kiristaa feene koy, kalal o and fo o jeg-yiif a saxu.

⁴ O nanangaa um layaa keene, kaa bugiim o leng a laxad a qoox nuun fo mbel-o-ɗek,

⁵ yaam um refangee a ndeer nuun fo o mem es, mexey meen fo yiif es, ga’aa fo o ɗaay ne nu yoonitna fo ne o ngim nuun a saƭkitna na Kiristaa.

O ñoow o deyu na Kiristaa

⁶ Neene boog, ne nu njaɓna a Kiristaa Yeesu nen o Yaal nuun, ñoowyo fo ten.

⁷ Saxyo no ten, ndamoox no ten, o ngim onqe a fapit a nuun doole, ne nu njangnit’eena o ten, too ngen no ngidman.

⁸ Mbootooxyo o kiin a laxadit a qoox nuun xa peƭeñeŋke mbaat ta nax a nuun, a suttaa a ƭelem um no mbaax no wiin we fo na cangin akaa layteerna a Kiristaa, ndax a ngat na adna.

⁹ No ten o mat Roog fo o yaajel um a xawoortu, a refat o kiin.

¹⁰ No ten nu njegtu fop, ta dey sik, too ten kelfa’u sañ-sañ fuu refna fo maat nuu refna.

¹¹ No ten nu mbi’ante nquc ne refna o ñaas ngiɓoor ne a ndeer nuun fa Roog. Nquc neene koy, o ɓay fi’iran, Kiristaa fi’un, ta ref a bolax no ke cer nuun a yaawaa.

¹² Yaam ne nu uupeena fo ten na batiise fee, nu nqontooxa fo ten na pexey o ngim onqe nu ngimna na Roog fee xontooxnoortuuna katil um a ndeer no xon we.

¹³ Nuun we tooñ nuun a mbarnoor’ina, a mbokatoor fo ñak ngiɓoor nquc ndiindigil ne war’ina a ndeer nuun fa Roog, Roog a ɓisiida a nuun fa Kiristaa no ñoow ole, ye ta letinna yirmande um, a hul tooñ in nuu refna.

¹⁴ Ke Roog a bindna no safe um, ta ŋañaa o kiin oo kiin na in, a ref a semb in, a fortaan ye ta rengnoorna a Kiristaa na kurwaa.

¹⁵ Neene a sañtitu itam sañ-sañ ke fo maat ke, a huyit a den bo dee huyit mbaambir no fop, soo a ɓis a den nen faɗ we mbogna na qaaj ale Kiristaa a maafna.

¹⁶ Ten taxu koy, ba o leng a ɓanj a nuun yaam ñaamel fo yerel, ba o leng a ɓanj a nuun yaam xew mbaat ke na fi’aneel o nqool o ndeɓ mbaat pes ke na ñootnax ale.

¹⁷ Keene mbelyook no ke garna soom a reeƭu. O mem ole koy refu Kiristaa.

¹⁸ Ba o leng a nax a nuun boo a yaqan a nuun eetatir ne nu ndefitna, yaam a fi’ooxaa o neewandooxu mbaat tee kaa reefaa kaa malaaka a dalinna. O kiin um a waaga o ret sax boo a saaƭoox na xa ƭaaɗ xa andand, a magnandooxaa yaam a qalaat um a cegee xoox,

¹⁹ soo a fañ o reefan a Kiristaa fee refna xoox le saqna cer ke fop. Cer keene, o fog fo a kiɓ kaa mbokat a den, soo Roog a cooxaa a den kaa da maakitna na Kiristaa.

Xon soo ñoowaa fa Kiristaa

²⁰ Kaa nu nqon fa Kiristaa, tig adna a sooƴ na nuun. Xar taxu boog nu mbesooraa nen wiin adna boo ndiik? Xar taxu nu njaɓ ke da layaa yee:

²¹ «Ba o jang kene! Ba o ñim kaana! Ba o duq keeke!»

²² Keene fop caaxaan oo, too xan a inoox meen, yaam kaa ndef kebil kaa o kiin a dalinna, soo a jangnaa a den.

²³ O ɗeetangaa kebil keene da ne’aa koy, xan a nandong fo cegu xoox. Kaa ndalnel, a ndef a ƭat alaa o kiin a waagna o reef yaam ta felin. Kaa ref itam a ƭat a neewandax, soo ke cer ke a yaawaa a nqañtel teen. Kaa koy, njegee o njiriiñ o leng, too ke cer ke a yaawaa soom a ndeftu.