Kolos 1 - NQAARIIT NE ROOG

Simin ne Pool

¹ Mi Pool fee Roog a jilna, a doonaam apootar Kiristaa Yeesu, mi fa Timote fee o pog in na mbindaa a nuun o leetar oleeke.

² In we simnaa a nuun, nuun tedu we ngimna, ndef fog in na Kiristaa, too ngen na teeru fee Kolos. Yaasam Roog Faap in a ci a nuun yirmande fa jam!

Pool oxe gidmaa a Roog

³ Kaa i ngidmaa a Roog Faap no Yaal in Yeesu Kiristaa, a mbanuu i nqeɗanaa a nuun,

⁴ yaam kaa i layel o ngim nuun na Kiristaa Yeesu fo o mbeq onqe nu njegna no gimu we fop.

⁵ O nanangaan koy, kaa nu kesanel yaakaar na asamaan, fa lay fee no ndigil ne refna ref fee no Yegil mbaax ne a andnin a nuun.

⁶ Fa lay feene oxe na nuun, a ref itam na adna fa muum. Kaa rimaa, a maakaa. Neene a reftu refit a ndeer nuun, a xotit no ñaal naa nu eeteena o yegin yirmande Roog, andin ndigil.

⁷ Keene koy refu ke Epafaras fee i mbexna mbex, too a ref o yoon in no calel ke, a janginna a nuun. O ten oo, o caajal o tamooxu no calel ke Kiristaa a ndeer nuun a refu.

⁸ Ten sax layu a in o mbeq onqe Yiif le Roog a fi’na a ndeer nuun.

⁹ Ten taxu in itam, no kaa xotitna na koom alaa i layeena paru na nuun, i nqeɗanaa a nuun a Roog, ndekan a nuun xa ƥay, ndax ta yip na nuun o and o deyu sik, nu mbaag o njekit ke ta bugna, ta yoon fo yiif fo o and no tig Roog.

¹⁰ Yaaga, xan nu mbaag o ñaaƴit ne o Yaal oxe a bugtuuna, xeeñ um a let na nuun, nu saqik a pi a paax a pagatar, maakit o and a Roog.

¹¹ Kaa i nqeɗaa itam doole um fee jegna o ndam a fap a nuun o saax oo saax, ndax nu mbaag o saƭik too njeg o muñ,

¹² ngidmaa a Faap fee fo o ɗaay, ten fee fi’na nu mbaag o mbog no lam ne no tedu we ndefna na qoolaand ale.

¹³ Ten o mat muclu a in no niɓaan o jegu doole le, a ɓek a in no Maat no Ƥeem onqe ta fexna,

¹⁴ i njegit no ten a bateer fo a baasan pakaad.

Kiristaa fo calel um

¹⁵ Kiristaa refu nitaal Roog fee a ngid a waageerna o ga, a ref taaw um yaaga dara sakafulaand.

¹⁶ No ten ke sakeena fop a reefande, ta ref ke lanq mbaat ke took, ke waageena o ga fo ke waagaandeena o ga, ta jof no maat fo ngelfa fo a adax fa sañ-sañ. No ten Roog a saktu fop, a sakanin o ten.

¹⁷ Ten adooxu fop, too kuu jegna, no ten a saxu.

¹⁸ Ten refu xoox le no fog ole no gimu we fop. Ten refu itam mberaandoong ne, a ret jaaniif, a ref taaw fee eetna o sutoor maaga, ndax ta adoox no kuu refna ref.

¹⁹ No ten Roog a genu fo o yaajel um fop.

²⁰ Na Kiristaa, Roog a fi’u fop a njofooratin fo ten, a xotit no ke refna took lanq ke boo no ke refna na asamaan, a njamsa’oor fo ten na pexey fo’oy um le ta ɓaxna na kurwaa.

²¹ Nuun itam, yaaga, kaa nu ngoƭatir’u fa Roog, ndef fañ um yaam a qalaat nuun fo a pi nuun a paaxeer.

²² Ndiiki koy, Roog a jofooranda a nuun fa xoox um na pexey fa nqon Kiristaa no cer um, ndax ta geenin a nuun mbaambir um, nu ted, nqool, ñak ŋañel.

²³ Waagee o ñak o refit neene muk koy, yaa andoona yee kaa nu sax no ngim onqe, saƭik teen, mbañ o mbes a cinj yaakaar ne hatna no Yegil mbaax ne nu nanna. Yegil mbaax neene kaa waare’el o mbindeef onquu refna ɗuga asamaan, too mi Pool, um fi’el oxaa na jalaa, ndax ta jof a paam.

Calel ke Pool

²⁴ Jegaam o mbelakinax lool no coono ke um coono’aa yaam nuun. Keene koy, kaa ref kaa um ɓaataa no coono ke Kiristaa no cer es, fadnanan o fog ole no gimu we, refna ref cer ke Kiristaa.

²⁵ Kaam doonel jalanan, ta ref a ref ke taxna Roog a doonaam a ndeer nuun, ndax um yegnit fa lay fee Roog ta dey sik.

²⁶ Keene refu kunpa fee refna naa adna ferooxu, too a feeñlel tedu we ndiiki.

²⁷ Den weene Roog a andnooru ke refna o njiriiñ onqe na halal fa kunpa’u feene a ndeer qeet ke, ta ref leng kut kene: Kiristaa kaa ref na nuun yaakaar o ndam Roog.

²⁸ O ten o mat koy i yegnitaa, maƭooxaa o kiin oo kiin, njangnaa a den o and tigi, ndax oxuu refna a waag o geenoox mbaambir Roog, a ñak sik na Kiristaa.

²⁹ Keene itam refu calel es, um gomriteel doole um, ta jalaa na mi fa katil.