Ke bindeena no xe ne’eena YOB 8 - NQAARIIT NE ROOG

Bildad a doona a Yob

¹ Bildad fee genna Suwax a janga fa lay faa yee:

² Neeke o bugko layaa boo a mban, soo yaqaa a ƥay o don of?

³ Foogaa moos ee xan Roog a hate’it njofaƭar, ndi o Cegu katil oxe xan a sufaal o cofel ole?

⁴ Xa ƥeef a mbakaadangaa no ten kañ, ta rabid a den a pi den.

⁵ Wo o mat, o waaƭangaa a Roog, xeɗoox o Cegu katil oxe,

⁶ o jegangee soqel too jof, a woora yee xan a ci’ong a caf, a nomit mbind of naa ta reeƭna, yaam jagaa fo ten.

⁷ O jeg ole ñakoona xan a ref nen tig caakeer paam ke o daawkaa.

⁸ Laamti suk ke mbaafna, nan-giloox a paax a cangin ale no daan we.

⁹ Faak rek i ndime, too i andee tus, ñaal ke in no lanq ke a nand nen yook.

¹⁰ Xaƴi daan we da aqatong, a njangnong no jeg-yiif ole den. Den na layaa yee:

¹¹ «Ndax jaj a naaga saxaa, too foofi matiran? Ndax rool-a-mbeel a naaga jolaa too refee na banj?

¹² Foofi ñakangaa, den na eetaa mbeer daaƭ luu refna, a ƈiƴafulangee sax oo, ndax da ngeewel.»

¹³ Keene na dalaa fop we na mbeecaa a Roog, soo yaakaar no kimeer oxe a tas.

¹⁴ Ke ta hoolooxna kaa ref nen fale, ndamlooxand um a ref o ƥaak a porxolaac.

¹⁵ Kaa damlooxaa no mbind um, ndaa mbind ne saƭkee, a geƈnooxaa teen, ta sooy.

¹⁶ Kaa ref nen ndaxar naa mayna fo goon no njeeƈ ne, a letnaa a naaq um, da yooroox a ƭing ale.

¹⁷ Kaa mudnaa a paƴ ake ten ndeer a kac ake, da laxasoox no ɓil luu refna.

¹⁸ A fuurtange koy me ta refna, o mbiñ onqeene a naagaan o xañaa yee: «Mosiroong o and.»

¹⁹ Keene refu o pelel o ñoow no kimeer oxe, cinj kaaga, no lanq leng kut ke, taxar lakas a njol na seek um.

²⁰ Kaa koy, Roog deɓkee muk o cofu xe, too naagee ci’aa o soxodu xe a caf.

²¹ Ndiiki ta mayƭand o don of fo cal, muuceek of ta mayƭand a den fo xa ƈeel.

²² Fañ of xan a may fa gaci, ƭiif ke no soxodu we a mooc.