Ke bindeena no xe ne’eena YOB 7 - NQAARIIT NE ROOG

¹ O ñoow no kiin took lanq ke kaa nand fo ole no qiixire, ñaal ke ten a ndef nen ñaal no saadlaand.

² Kaa nand nen o paɗ oxaa na talaa yook, nen o saadlaand oxaa na cungaa ndabid um.

³ Roog kaa roxanaam a qool kasaara, a lasaam xa yeng coono.

⁴ A mbanuu wondooxuuma kaam layaa yee: «Mban roog a feedkaa?» A suptax kaa fasaxam boo njeeƈ ne a helko fo wataa.

⁵ Cer es kaa yipoox kusax ƥor fo xa ñog, ƭool ne mi a feɗid, a fi a uut akaa na mbataa mbor.

⁶ Ñaal ke mi moƴu o ñof o roondoon no yaal a tiwand. Kaa da yetaa, too yaakaar jegatee.

⁷ Wo Roog, wetandooxi yee o ñoow es kaa nand nen a ƥay nqeñ, a kid es nga’katee o ɗaay.

⁸ A ngid of ale na ɗeetaxam, ga’katiraam. Xan a kid of a mbaaƭaam, ndaa refkatiim meen.

⁹ Ne eel a hurdooraa soo a ret, neene oxe xaadna jaaniif nomtooxiidkatee.

¹⁰ Nomtooxiidkatee no mbind um, too gentand um xan a mbeecin.

¹¹ Ten taxu maarkiim o don es. Xam lay ke ɗomaxama, ɗomatoox kam fa mbagu es.

¹² Ndax kaa um ref juwaam mbaat Niŋki-naŋka boo a tax o dalin yeeyetax me widaxama?

¹³ Um yaakaarangaa yee xan njong es a yaalaam, o wondooxand es a yeeɓ o ƭomel es,

¹⁴ maaga, kaa o diidlandtaxam xa ƭaaɗ, saɗarnoortaxam yeeyeng.

¹⁵ Ey! Bug’aam o ɓoƭel koy! Fa nqon moƴanataxam xa kiiƈ xa ƥor axene.

¹⁶ Bugatiim o ga o ñoow, too wo moƴu and ee bugkiim o ñoowaa boo kili. Waasaam boog, yaam o ñoow es a ƥay doŋ a refu.

¹⁷ Xar o kiin a refu boo tee kaa o moof xalaman, a ƭat of a yongaa no ten?

¹⁸ Kaa o horooxan nqes nuu refna, ɗeetlooxan na waxtu fuu refna.

¹⁹ Ndax waagiro xuun, fañaam o ɗeetat, ci’aam o daaw olaa ɗuudaqiloortuuma.

²⁰ A soƥangaa yee bakaadaam, xar fi’oong, wo fee na yetooxaa o kiin? Xar taxu o waaƭaxam kili? Xar taxu um ref a toq na wo?

²¹ Xar taxu waasantiro bakaad es, forit tooñ es? Mexey xaadaa no lanq ke. Xan o waaƭaxam, ndaa refkatiim meen.