Ke bindeena no xe ne’eena YOB 6 - NQAARIIT NE ROOG

Yob a doona a Elifaas

¹ Yob a laya yee:

² Cey! O ƭomel ole mi a hel’e waag o eed koy, naqad es fop a ndoonel na balaas!

³ Ten moƴkoogu o meɗ lanq o maag. Ten taxu um layataa ƭooɗofir sax!

⁴ A kas ake no Cegu katil oxe a ndoomaxam, o ndoxar onqe da ƭuumeena a daaw kam es, a qufil ake Roog a mbodaam mbaambir, a ndiidlandaxam.

⁵ Ndax o faam-a-koƥ a naaga o ŋaaxaa, yaa ta ɗuktaa daaƭ neepu le? Ndax nqoox ne a naaga o xasaa yaa ta suufaa?

⁶ Ndax kaa maasna a waaga o ñaamel too jemaƭaand? Ndax foofi ɓoof jawaand a jega a safaand?

⁷ Ke reftuuma kaa nand nen ñaamel kaa kam es a fañaa, um ñaamatan ke sibdanuuma sibid fop oo.

⁸ Yaasam a qeƭ es a mbadnoox, Roog a ci’aam ke um yaakaaraa!

⁹ Fat o duguñaam a fel a Roog, ta letin o ɓay um, a ɗeg sor ne no ñis es!

¹⁰ Yaaga a hees-hees xam yoqiɗ a yaalax a leng, jeg o ɗaay, ke um ɗomeel fop oo, yaam boo xaye xañiim ke o Tedu xe a layna.

¹¹ Bugatiim o ga o ñoow dara! Xar um muñataa, adna es a yaqooxa!

¹² Ndax kaam ref ɓil laa waagna o xox kuu garna, ndi cer es kaa ndef njelem?

¹³ Waaganiim a xoox es dara, too jegiim o leng oxaa ƴufgaxama.

¹⁴ Oxe na coono’aa, xaariit um a waraan o yirim, a soƥangaa sax ee oxeene kaa saɗaratee o Cegu katil oxe.

¹⁵ Qaariit es a ngodaxam nen a ƈufnand, nen a ƈufnand alaa ŋiisna.

¹⁶ Galaas fee fa nees fee a sooyangaa, a ƈufnand ale kaa maynaa bo.

¹⁷ A sumaan ale a garangaa, kaa ŋiisaa, ceeƈ sumu ke a ngar, me ta reeƭna a naag koroŋ.

¹⁸ Xa lox keeleemb axe na mbaaƭaa maa da yerna, a nqaƴa a ƭat ale, a mo kam a koƥ-a-ƥor ale, a saŋkoox.

¹⁹ Xa lox keeleemb axe inoorna Teema kaa ƈooklooxaa a ƈufnand ale, ñaañaaƴ we Saba a ngaɗ no ten yaakaar.

²⁰ Kaa koy, a ngefɗa, yaam ne da ngoolooxuuna, yaakaar den a tas, ye da mbadiidna teen.

²¹ Neene deŋ nu nandu na mi. Kaa nu nga o njakad onqe dalaxama soo mbiriɓ.

²² Ndax layaam a nuun ee ci’aamoo tig mbaat um sim a nuun nu neexlitanaam?

²³ Ndax laamtaam a nuun nu muclaam no ɓay no pañ oxe, mbataam na xa ƥay no ñaañagadil oxe?

²⁴ Aqatinaamoo, too xam tiim, andnooraamoo na xar bakaadum.

²⁵ Ndigil naagee uutaa o ɗek, ndaa xar o ŋañanqol ole nuun a ɗaxu?

²⁶ Kaa nu mbug o ŋañ ke layuuma, fa lay fee no ñaku yaakaar oxe nu ƭeetin nen a ƥay.

²⁷ Nu mbanjangkooga, ndax nu njeg o waan ole, xaariit nuun, nu njikoortin xaaliis.

²⁸ Ndiiki koy, kaam xeɗaa a nuun nu ƭeetaam. Ndax xam jasnoor fa nuun soo maaɓaa?

²⁹ Ƭeetatinyo, ndik njofaƭar a adin a nuun, nqalaatatin too andid o cofel es.

³⁰ Ndax ɗelem es kaa lay cageer, ndi o don es kaa jektirandee paax fo paaxeer?