Ke bindeena no xe ne’eena YOB 5 - NQAARIIT NE ROOG

¹ Ndiiki koy, falalooxi rek! An na doonkang? Ndi an no malaaka tedu ke o layitkaa sax?

² O ƥodaxu xe kaa saŋkooxaa yaam fuux um, o ƭof oxe a xonaa yaam o mat xeeñ um.

³ Kaam ga o ƥodaxu xe a sax a paƴ, ɓaatnee dara, a salax ake a yen took um.

⁴ Xa ƥiy axe ten njegee ndamlooxand leng, wargal den a dakeel no xeloorand ole, too o leng faritkee a den.

⁵ Xeexe we kaa nduudnaa saxade um boo no ke ɗingteena kiƈ sax, soo wiin watu we a ngindir o jeg um.

⁶ Naqad sutoorkee no lanq ke, coono saxitkee no ƭak ne,

⁷ ndaa o kiin oxe na oraa coono um, ne xa meldaand a mbiltaa na fiɗel.

⁸ A reeƭangaa mi de, Roog ƴufginooxkoogum too ten doxinkoogum layoor es,

⁹ ten fee na fi’aa tig maak kaa mbaagaandeena o naaɓ, com’andtu kaa njegeerna hap.

¹⁰ Kaa deɓaa took lanq ke, a heblaa foofi le na xa qol axe.

¹¹ Kaa inaa we yenna a lanq, we naqadilooxna, ta ɓisiid a den a muc ale.

¹² Kaa kasaara’naa yuuƥ ke no ƴiƴ we, too mbaagee o mbadin ke da ƭaapna.

¹³ Kaa damtaa laxasu we o ƴiƴ den, yuuƥ ke no waane’u we a kasaara’ooxaa.

¹⁴ Kaa da nqettaa o niɓaan njoloor o mbuc, a naƥnaa njeeƈ ndeer xoox nen kam o yeng ole.

¹⁵ Roog kaa suqtitaa o neewu doole xe no don den, a jaɓtan na xa ƥay no cegu doole xe.

¹⁶ Neene, neewu doole we a njega yaakaar, njofaƭar ne a naag cuxus.

¹⁷ O kiin oxe Roog a soqaa a ɗaaya! Ba o fañ fa yar fee no Cegu katil oxe!

¹⁸ Ten na gaañaa soo a laxasin, a xawtaa o ɓay um soo a wodandtan.

¹⁹ Xan a watong na naqad a caf a mayu, too taamaala dalkirang muk.

²⁰ Xan a muclong na fa nqon yaa fo nqeex, too laƥ ñaamkirang yaa fa xire.

²¹ Xan o guutatir fo a ƭelem a paaxeer ake, too saɗarkiro dara, yaa yaq fee a garna.

²² Xan o jalaa yaq fee fo nqeex ne, too diidkiro ƥaaɓaan ke no lanq ke,

²³ yaam xan o hiɓoor fo a ƥil ake na xa qol axe soo reer jam fo ƥaaɓaan ke no lanq ke.

²⁴ Xan o jeg jam no mbind of, too ñiiñax ñaaƴkee xa siir of.

²⁵ Xan o ga xa taan of a siw, we mbaqaqoorna na wo a mayit nen daaƭ le na koƥ ale.

²⁶ Xan o ɗisel xa puum soo xonkaa, ne ngaaf a saxadteel na waxtu um.

²⁷ Keene refu ke i andna, too neene a jegtu. Nan-gilooxeen boog, too baa ta daɗong.