Ke bindeena no xe ne’eena YOB 40 - NQAARIIT NE ROOG

Yob waru o doon

¹ Maaga, o Yaal oxe a laamta a Yob ee:

² «Ndax oxe na felaatooraa fo o Cegu katil oxe xan a jaɓ o nomtoox a cinj? Ndax oxe na ɓanjaa a Roog a jega kaa ta doonna no keene fop?»

³ Maaga, Yob a doona o Yaal oxe yee:

⁴ «Mi kañ, refiim tus, ndi xar um doonkang boog? Kaam dam o don es.

⁵ Layaam kupu, ndaa ɓaatkatinum.»

Ndax Yob kaa foog ee Roog a refu?

⁶ Maaga, o Yaal oxe a doonta a Yob ndeer a und alaa yee:

⁷ Maaƭooxi too ref o koor! Xam laamtong, o doonaam.

⁸ Ndax kaa o bug o lay ee hate es jofee, gadnaam tooñ ne, pay fo ɓur le?

⁹ Ndax doole of a foda fa fee Roog, o ñuxur of a fangoortaa nen ƭuuɗ ke ten?

¹⁰ Mosandoorti boog o magnel fo ngiin maak, rokoox o ndam fo o niwel.

¹¹ Jiici ga’atinooxu we, fuux of a biltooxan a den, o neewand a den.

¹² Kaam ee naagi ga’atinooxu we jak, fudin a den, soxodu we, o duguñ a den me da ndefna.

¹³ Uupi a den fop kam lanq ke, oxuu refna na den o naagin gik kam jaaniif.

¹⁴ Maaga, mi fa xoox es sax, xam kañong, yaam ne doole of a ci’oonga o ndam.

Behemot

¹⁵ Ɗeetangi a Behemot fee sakuuma nen a wo. Kaa suufaa nen nqoox.

¹⁶ Kaa koy, ndaw a jeg doole no ndet ne, a nex ake no fud um a ndinq bo!

¹⁷ Kaa saƭkandaa a las ale ten nen ndaxar seedar, xa pamb axe no fek le ten a ndef nen o ƥaak o dakne.

¹⁸ Xa kiiƈ axe ten kaa saƭkit nen a ŋol xanjar, a coonjoor ale ten a nandtaa a celem.

¹⁹ Ten moƴu o wod no ke Roog a sakna, too o saasak um doŋ waaganun tig.

²⁰ Ten xañtun xa cegel axe na xa coong axe fo muumeen ke na mbirlooxaa teen fop.

²¹ Kaa wondooxaa ɗuga ñaañamb le, a ɗasaa a ndeer jaj le na banj ake.

²² Ñaañamb le kaa singan, ta ñootnooxaa no yook ke no qawul ke na ƈufnand ale.

²³ O koroŋ ole a jegangaa doole yoo, firɓandkiran. A ƈufnand ake a laxaaɓangaan sax oo, taxkee ta jaaxiɗ.

²⁴ Ndax a waage o dam, yaa ta ɗeetaa jar? An waagun o rok o heɗ no ñis ndax ta harnin?

Niŋki-naŋka

²⁵ Ndax xan o jaarik a Niŋki-naŋka fo o oos? Ndax waagaa o humit o don ole ten o ƥaak?

²⁶ Ndax waagaano o yuuɓ o ƥaak no ñis, yul a kaaɓaaɓ ale fo njelem ŋook?

²⁷ Foogaa moos ee xan a moof a xeɗooxang, a layang fa lay fa mbelu?

²⁸ Ndax xan a hiɓoor fa wo, a ref o paɗ of boo kili?

²⁹ Ndax xan o ŋastan ne ndiiƭ a ŋastiteel? Ndax xan o humanin xa ƥeef xa tew, da ƭoxan?

³⁰ Ndax xan mal no faafaal a njikookin, a lasrandin jula we?

³¹ Ndax waagaa o yul ƭool ne ten fo a bej mbaat o dib xoox le ten fo a salma?

³² Songangeen boo ga, yaaga ɓaatkatino.