Ke bindeena no xe ne’eena YOB 32 - NQAARIIT NE ROOG

JEETAAY LE ELIHU ( 32—37 ) Elihu a ɓeka o don um na fa lay fee

¹ Goor daduk waa ndoon’atee a Yob, yaam ne ta ɗeet’ina a xoox um nen o cofu.

² Maaga, Elihu fee o ƥiy Barakel, na qaw ale Buus too a fog no ƥasil ne Raam, a fuuxa boo a buɓaa. A dalfooxa o biltooxan a Yob, yaam ne ta layoogna yee ten ɓuru a Roog.

³ A biltooxana itam qaariit tadik ke ten, yaam ne da njeg’ateerna kaa da ndoonna a Yob, ta nand ee Roog juumu.

⁴ Ne da maag’ina a Elihu, a cunga boo fop a lay boo a ƈut.

⁵ Kaa koy, ye Elihu a ga’na yee qaariit tadik ke Yob njegatee kaa da ndoonna, a biltooxa fo fuux.

Elihu a xooldanda ke taxna ta war o lay

⁶ Maaga, Elihu fee o ƥiy Barakel fee genna Buus a janga fa lay faa yee: Kaam ref o ndeɓandoong, soo nu ndef maak. Ten taxu um saɗar, jeg a yiif-a-ƭak no feeñil a nuun o and es.

⁷ Kaam layoogu taa kam es ee: «Maak we mbaru o lay, yaal xa kiid xa mayu xe a aqatin o and ole.»

⁸ Kaa koy, no ndigil o kiin oxuu refna a jega yiif, yaam o Cegu katil oxe wuuɗun no ten.

⁹ Refee soom ee maak we njegu o and, refee itam ee fuumu we doŋ andu a ƭat.

¹⁰ Ten taxu um lay ee: Nan-gilooxaamoo, um feeñil a nuun o and es, mi yoo!

¹¹ Kaam cungoogu ke nu laykaa, hornooxaa o jeg-yiif ole nuun, ye nu mbaaƭaa xa ƭelem xa qoolu xaa nu ndoonitna.

¹² Kaam nan-giloox a nuun a paax, ga ee o leng na nuun ɓuriran, too nu mbaagee o tipit xa ƭelem axe ten.

¹³ Ba nu lay ee: «O yaal-o-and a refu. Roog soom waagun o ɓur, ndaa refkee o kiin.»

¹⁴ A soƥ’angaa yee mi a laytaa, doonkoogaanum kaa guutatirna fo ke nu ndoonuuna.

¹⁵ Kaa nu ndiid, nu ndoonatee too nu njegatee kaa nu layna.

¹⁶ Feek nuun wey cel, mbañat o ndoon, ndax kaam maadkaa o cungaa nu lay?

¹⁷ Na las es, kaam bug o doon itam, feeñil o and es, mi yoo.

¹⁸ Jegaam a qalaat a mayu, too yiif es kaa riñaxam um lay.

¹⁹ Kam es kaa nand nen biiñ fa nqas faa jegeerna o feesand, nen poxos qas kaa na mbaajaa o mbuɗid.

²⁰ Xam lay, ndax um waag o jeg jam, yaƥat o don es soo doon.

²¹ Faritkiim o leng too jeykiim o kiin itam.

²² Waagiim a waag o jey o kiin sax. Um fi’angaan, oxe sakaxama a inkoogaxam meen no ñofu.