Ke bindeena no xe ne’eena YOB 22 - NQAARIIT NE ROOG

Elifaas a doona a Yob

¹ Maaga, Elifaas fee genna Temaan a janga fa lay faa yee:

² Ndax o kiin a jegana a Roog o njiriiñ? Ha’aa! O yaal-o-and oxe sax jeganiran o njiriiñ.

³ O jofangaa, xar a ɗaxu o Cegu katil oxe? O ñakangaa ƥanjel, xar a xotitkaa teen?

⁴ Ndax ne saɗaranoona taxu ta xawang, a layooraa fa wo?

⁵ Kañaan ƭomu of kañ fo tooñ of ke naangna gañ taxu ta xawang,

⁶ yaam kaa o rabdinooxoogu fog of ngaasnit no kaa kiin a andeerna, jaɓ ñirax den, xaƴ a den ƭuc.

⁷ Ci’oogiro foofi oxe weeroogna fo a koɗom, oxe xonoogna fo nqeex, o fañin o ci ñaamel.

⁸ Kaa o jegoox’u saax le, wo xe yaal doole, dalaa teen, wo fee magnandooxna.

⁹ Kaa o raxoogu ñaaw we o ƥor, o waan ole, o yirif xa ƥay um.

¹⁰ Keene mat taxu pog ke a ndeerong, soo diid le a damong ndak fo ndak.

¹¹ O yeng ole a yena took of, too ga’atiro dara, poofi ke no jaɓ ole a ƭuudang.

¹² Ndax Roog kaa refee took-ee-took, na asamaan? Ɗeetangi ne xa qoor axe a ngoƭitna took.

¹³ Kaa o layaa yee: «Xar Roog a andu? Ndax a waaga o hate, too a eel a niɓu a ndeerin?

¹⁴ A eel ake kaa singin, too naagee ga’aa tus. Took asamaan fee soom a widaa.»

¹⁵ Ndax kaa o bug o maad na ƭat a yaayaaga le, wiin jofaƭaru we a ndeefaa,

¹⁶ na ineel meen, too hap den fadafulee, nen tabax naa a ƈufnand a maƥna?

¹⁷ Kaa layoogu a Roog ee: «O Cegu katil oxe, goƭi a in! Jeganiro in o njiriiñ!»

¹⁸ Yaag oo toox de, Roog neqin’u pind den. Mi koy, yooniim muk na ƭat no soxodu we!

¹⁹ Jofu we na nga’kaa njom ne den xan a mbelakinoox, too oxe xoolna qac xan a xaadnoox a den ee:

²⁰ «Fañ we in owey a moocande, fiɗel a raaɓ fop ke da nqaƴna!»

²¹ Ndiiki koy, wo Yob, jofooratini fa Roog, jamsa’oor fo ten, too yaaga xan o jeg ne bugoona.

²² Nan-gilooxi ke ta jangnang, fa lay fee ten, o ɓekin no xeeñ of.

²³ O nomtooxiidangaa no Cegu katil oxe, sut njofaƭar ne no mbind of, xan o jegatin doole.

²⁴ Deɓi wurus of a lanq, wurus fee hatna Ofiir sax, o deɓin ndeer a kac ake na ƈufnand ale.

²⁵ Fi’i o Cegu katil oxe wurus of fo juum xaaliis of.

²⁶ Maaga, xan o ɗaay of a ref no Cegu katil oxe, o cok of a ref took mbaambir um.

²⁷ Xan o xeɗin, ta jaɓ a qeƭ of, o waag o fadin ke reganoona.

²⁸ Xan o jeg ne bugoona no kuu o jeemaa, a qoolaand a meleƈ na ƭat of.

²⁹ Boo Roog a yisinna o kiin, kaa o layaa yee a magnandax um taxun, ndaa pexey oo naa Roog a muclitan.

³⁰ Feek kaa wataa oxuu tooñeerna, o qoolel xa ƥay of na taxkaa o muclel.