Ke bindeena no xe ne’eena YOB 21 - NQAARIIT NE ROOG

Yob a doona a Sofaar

¹ Maaga, Yob a laya yee:

² Nan-gilooxyo, kaam ee nu nan-giloox fa lay es! Ci’aamoo a yaalax aleene rek.

³ Kaa um xeɗaa a nuun nu ci’aam um lay, too um layangaa boo ƴut, nu mbug oo nqaadnoox.

⁴ Ndax ƭomatax es took no kiin a njagnu? Yaaga boog, mi ɓuru o ñak o muñ.

⁵ Ƭeetaamoo, njaaxiɗ soo ndam xa ton.

⁶ Um naagangaa xalaataa ke dalaxama, kaam diidaa, cer es fop a sendaa.

⁷ Xar taxu soxodu we a nqaƴel a ñoowaa? Xar taxu da nogoyaa, o sedel den a ɓaatooxaa?

⁸ Kaa nga’aa we mbaqaqoorna na den da neq, xa taan den a ƭaayaa na kid den.

⁹ Pind den kaa ndef na jam, caƭar wiirkee me den. too o samb ole Roog dalkee took den.

¹⁰ Qoox ke den kaa mbilaa too mbudukee, naak ke den a ngandaa too yaqooɗkee.

¹¹ Kaa nqaƴaa xa caaƈ axe den da ndaaplooxaa nen fo mbaal, mboƥ ne den a ndef na fa ŋas,

¹² a ngimaa, a yoonandtin a ñal fo fo nqilimb, a mbecaa fo a liit.

¹³ Ñaal ke den fop no ɗaay a ndefan, a nqaadaa jaaniif too ñadkee.

¹⁴ Yaag oo toox de, kaa da layoogu a Roog ee: «Goƭi a in, a ƭat in yongee na wo!»,

¹⁵ a nqalaataa yee: «Ndi xar o Cegu katil oxe a refu boo a tax i ndagooxan? Xar i nqotitkaa teen, yaa i nqeɗan?»

¹⁶ Wiin weene kaa mboog ee den sakooxu o neq den, ndaa mi koy, yooniim teen.

¹⁷ Ndax nu mosa nga o ñoow no soxodu we a sooƴ nen o lampa ñufu, o njakad a yen took den, Roog a las a den no fuux le ten?

¹⁸ A mban nu mosu nga da nand nen boob laa nqeñ a maƥna, nen ñaax laa a saaqul a adinna?

¹⁹ Kaa nu layaa yee xa ƥiy axe no soxodu xe Roog a xawaa. Yaag oo toox de, ten Roog a hel’u o xaw, ndax ta gomin ten fa xoox um.

²⁰ Ten war’u o ga fo a kid um o torox um, a buq fuux le no Cegu katil oxe.

²¹ Ndi a cinj fa nqon um, xar a ƭat um a yongatu na xa ƥeem?

²² Ndax Roog a soxla’a o jangnel keene, ten fee na hate’aa malaaka ke sax?

²³ Oxeene kaa xonaa na tedaanga, na jam fo no ɗaay.

²⁴ Xalatooxkee dara no cer um, a saxit nen o ndeɓandoong.

²⁵ Oxaana a xontaa naqad o laaw um, too mosee o yaadoox kom leng.

²⁶ Den ɗik fop xan a mbondook kam lanq ke, a ndefat ñaamel max ke.

²⁷ Andaam a paax ke refna a qalaat nuun, hate fa leng kut nu mbofanaxam.

²⁸ Kaa nu layaa yee: «Taa mbind ne no kiin o maak oxe? Taa ƭiif ne soxodu we a ngen’ina?»

²⁹ Kaa koy, ndax nu mosee o laamit ñaañaaƴ we, ndi kaa nu njaɓee ke da nga’na?

³⁰ No ñaal ne na taamaala fee, o soxodu xe kaa ɓostooxaa, a daɗ yaa fo fuux le.

³¹ An na ɓanjkan na pesoorooƭ um? An na rabidkan ke ta fi’na?

³² A gasange no poy kaa, a mboy um kaa topatooxeel.

³³ Gaagas jaaku na adooxanan, wene a ndeef, too leeñ le na mboy ale kaa yelefaa took um.

³⁴ Xar taxu boog nu yaalaxam a yaal a cegee njiriiñ? Kuu nu mbaagataxama ndoon xa maaƥ xa ƥor oo.