Ke bindeena no xe ne’eena YOB 18 - NQAARIIT NE ROOG

Bildad a doona a Yob

¹ Maaga, Bildad fee genna Suwax a janga fa lay faa yee:

² Nuun we yoon es, ndi mban nu mbaaskaa fa lay feeke? Nqalaatyo a paax boog, yaam in yoqte o lay.

³ Xar taxu nu njaɓ i ƭeetel nen naak? Ndax kaa nu mboog ee panxoy i ndefu?

⁴ Wo Yob, fuux of ɗaxkirang dara, a refangee a ɓaatong naqad. Ndax o sagin of a waaga tax lanq ke a ndefat a koƥ-a-ƥor, soo a ƥil ake a sektoox na seek den?

⁵ O ñoow ole no soxodu xe xan a sooƴ nen a qoolaand alaa ñufna, a ɓut goy nen ƈulfaan naa giimna.

⁶ O lampa le yoorooxuuna xan a ñuf ɗuƭ, a qoolaand ale a niɓaanat no ƭiif um.

⁷ A caf ake ten nduufoox’ina xan a neewat doole, too ke ta jeemaa, xan a maafnoorin.

⁸ Xan o jaf um a lok no mbaal, ta dak took a semb a pogir,

⁹ mbog o ƥaak a damin na caf, o foog a naagin nuus.

¹⁰ O ƥaak ole kaa ɗasnel kam lanq ke, ke na damkan a ref na ƭat um.

¹¹ A qufil ake kaa ngartin muu refna, a mayooxiidan.

¹² O njakad oxe ɓeedan, o torox a fodin no saax.

¹³ Xan jir a ɓuus cer um, a seel a ŋees a caf um fo xa ƥay um.

¹⁴ Kaa ɗistel no ƭiif um ne ta genoogna fo o woor, a ɗooqeel farna fo o maad oxe na fa nqon fee.

¹⁵ Ƭiif ne ten ta refateerna, a waage gen, suufur a yipel no ngenand um.

¹⁶ A paƴ ake ten xan a mbeer, a naaq um a leeƥ.

¹⁷ Xan betandoor um a ñuf no lanq ke, gon um ne’kataand sen.

¹⁸ Kaa riñtel na qoolaand, a rok no niɓaan, a raxtel na adna fee.

¹⁹ Xaƴee xa ƥiy, xaƴee xa taan a ndeer xeet um, ne’atiim oxaa na ñoowaa no mbind um.

²⁰ We ngenna no mudand xan a njaaxiɗ na yaq fee ten, we no batand a ndaprapnaa.

²¹ Keene na cungaa ngenand no cofaƭaru xe, mbind no xe andeerna a Roog a muukoor neene.