Ke bindeena no xe ne’eena YOB 16 - NQAARIIT NE ROOG

Yob a doona a Elifaas

¹ Yob a laya yee:

² Nanaam fa lay fa nandu neene a caf a pagkatar! Nu yaaliidiraam! Kaa nu ƥaatiidaam naqad!

³ Fa lay fa njegee njiriiñ fene mat mban a fagkaa, ndi xar sax na xijlaa a nuun nu ƭangtooxaa neeke?

⁴ Nu ndeeƭangaa na seek es, mi itam waag’aam o lay nen a nuun. Laykoogaam a nuun boo wee xa kene, gong-gongnaa o nqoox.

⁵ Saƭakinitkoogaam a nuun fa lay es, ɗelem es a yaal a nuun.

⁶ Um naagangaa o layaa, o ƭomel es wañooxkee, um maar o don es, ɗaxkee teen tig.

⁷ Wo Roog, paangaa doole es, ƥasil es fop, o moocand a den.

⁸ Naagaxamo nuus, ta ref seede, mboraanaq ne mi a jambaxam ee mi garu fo ten.

⁹ Kam fuux um Roog kaa songaam, a listaxam, a ƴaxrandanaxam a ñiiñ. O pañ es oxeene xe jiicaxam.

¹⁰ Wiin we kaa yaƥatanaam xa ton, a mbenaxam, a ngefaxam paƭ soo a mbokatooranaam den fop.

¹¹ Roog kaa ɓoxotaam xa koor xa yaraand axe, a deɓaam na xa ƥay no soxodu we.

¹² Kaam yaadoox’u, ta damaam no log, a yo’naam, a jiƭtaam, cinj kaaga ta inatinaam, ndax ta fi’aam a roomand a kas um.

¹³ A kas ake ten kaa yetaa me widaxama fop, a ndibaxam na qisiil too jegee teen yirmande, soo o soylaar es, ta ɓaxin a lanq.

¹⁴ Kaa digantaxam nen o qiixire, a gaañaxam, a gaañatinaxam.

¹⁵ Ɗiisaam o saaku, adnin no cer es, lup a tagid es a lanq.

¹⁶ Kaam lool boo a kid es a ƥooyoox, o niɓaan taruus a muur a den.

¹⁷ Yaag oo toox de xa ƥay es yednee, too a qeƭ es mosee ñak o xool.

¹⁸ Wo lanq ke, ba o ɗasin fo’oy es, too baa dara feg xa buuq es.

¹⁹ Maadaam o jegaa o seede na asamaan, o paafarit es oxe jiŋ took-ee-took.

²⁰ Qaariit es owey nqaadnooxaxam, ndaa na Roog haanum, a kid es a nqaaraa fo xa kooniit.

²¹ Ngela fat o seede es a ɗeg hate fee ndeer es fa Roog, ne ta reftaa ndeer o kiin fo o kend um!

²² Fat a ñof o ɓek teen o ɓay um, yaam xa kiid es owey mbagiidaa, um waajaa xot a ƭat ale na ñaaƈ a katkaand ale.