Ke bindeena no xe ne’eena YOB 14 - NQAARIIT NE ROOG

¹ O kiin kaa rimel fo o neew doole too waaganee a xoox um dara. O ñoow um kaa raƥ soo a may coono.

² Kaa saqtitaa nen mbiɗ soo a leeƥ, a ƴuftaa nen yook too geenooxkee.

³ No ten a kid of a ngaanu, soo o ɓisan no nqel!

⁴ Kaa xoolna waagee o suttel muk no kaa xoolaƭaritna nen o kiin!

⁵ Ñaal ke no ñoow no kiin kaa ngapel, o dalin a qool a podne ta jegkaa, too jolkee muk ke hapananoona.

⁶ Xaƴeen, fañatin o gay, ci’een ta jeg a xoox um o ndik, ndax ta waag o felakinoox nen o saadlaand yaa njeeƈ ne a mudna.

⁷ Ndaxar a jega yaakaar. A ɗegange sax oo, a naaga o saqtatinaa, a sut dugatin.

⁸ Boo a paƴ ake ten a nogoyna kam lanq ke, fanq le ten a xon kam fo ut ole,

⁹ foofi le a matiidangaa rek, ta dalfoox o saqit, a sut xa looɓ nen njimb nqas.

¹⁰ Kaa koy, o kiin a xonangaa rek, a ñak doole um. O kiin a ñakangaa, mam a refataa?

¹¹ A banj ake xan a ñak foofi, xa quluɓ axe a ŋiis soo a mbeer koroŋ.

¹² Neene o kiin oxe a ɗaanitkaa o ƭaan o yokooxkaand too inooxatinkee boo muk. Feek asamaan fee oxey maadaa, inooxkee muk no ƭaan ole ten.

¹³ Cey! O ɗasin’angaam kam jaaniif rek, muuraam teen boo yaa fuux le wo a ɓooskaa, soo o dalnanaam waxtu faa o wetandooxkaxam!

¹⁴ Kaa koy, ndax o kiin a waaga xon soo a ñoowatin? Yaaga muñkoogaam boo yaa ñaal ke yoqteema a mbaafna, boo yaa oxe na jaɓankaxam a garna.

¹⁵ Maaga, xoykoogaxamo, um jaaɓong, o bug o ga’atin jale na xa ƥay of.

¹⁶ Yaaga moofkatiro limaa a taaraand es, a kid of a ñakat o ngaan no pakaad es.

¹⁷ Njofaƭar es kaa wegkoogel rap kam nafa, tooñ es o sing a den.

¹⁸ Kaa koy, ne o joong ole a yurdooraa soo a muux, a ƥil ake a sektoox me da ndeeƭna,

¹⁹ poofi ke a nqoosaa a kac ake, soo o koroŋ ole den a ɓisloox lanq ke, neene mat o yaqtaa yaakaar no kiin.

²⁰ Kaa o maafan, ta ret too nomtooxiidkatee. Kaa o suptaa mukit um soo raxin koƭu.

²¹ Xa ƥiy axe ten a niwange, andkee teen dara, da nqeefel, yegkee teen tig.

²² A ƭomaand cer um soom a yegaa, a andaa naqad xeeñ um doŋ.