YEGIL MBAAX NE YEESU ne Saŋ a bindtuuna 9 - NQAARIIT NE ROOG

Yeesu a wodanda o koor oxaa rimteena mbuulaanaq

¹ Yeesu a joona, a ga o koor oxaa rimteena mbuulaanaq.

² Daalbe we ten a laamtaan ee: «Ndi o Caajangin oxe! Mbuulaanaq ne no qoye, pakaad um ngartun, ndi pakaad no we ndimuuna?»

³ Yeesu a doona a den ee: «Pakaad um mbaat pakaad no we ndimuuna ngartiran. O ga’angaa ta fuul, kaa a pi Roog a mbar o mbeeñit no ten.

⁴ Ye i maadna o ndefaa no ñaal, kaa i mbar o mbi calel ke no xe luliidaxama, yaam o yeng faambre, too a fadiidangaa, dara daawankataand.

⁵ Ne refuuma na adna, mi refu a qoolaand adna.»

⁶ Yaa ta muukna a ƭelem akeene, a duxda a lanq, soo lanq quƥu keene ta jangin, a ɗuumin na kid ake no puul oxe,

⁷ a layin ee: «Reti muktook no Ul olaa Silowe.» (Silowe kaa tekit «Oxe luleena».) O qoyaa a reta, a muktoox, too yaa ta gatna, a kid um a ƭeeta jar.

⁸ Gentand um fo we and’uuna fop, a andtin a sadaxnax, a layooga ye da nga’uuna yee: «Ee, kene refee oxe moofoogna mene a sadaxnooxaa?»

⁹ A jega waa layoogna yee: «Ten o mat oo!» Lakas we a ndamtin na: «Heey, refee o ten de, kaa nand rek!» Ten o mat, kaa doonoogu yee: «Mi yoo moos.»

¹⁰ Ngoor kaa a laamtaan ee: «Nam fi’o boo waagat a ka koy?»

¹¹ A doona yee: «Oxe ne’eena Yeesu xuƥandu lanq de, a ɗuumaam o ten na kid, soo a layaam ee: ‹Reti muktook no Ul olaa Silowe.› Mi yoo, naagaam daket, ret muktoox, a kid es ee jar.»

¹² A laamtahinaan ee: «Taa o koor oxe o ne’aa?» A doona yee: «Kaam and!»

Farisiya we we ƥaalaa ne ta woditna

¹³ Wiin we a ndama oxe wodand’eena, soo a ƥisin maa no Farisiya waa.

¹⁴ Na bes fee na ñootnax ale koy, Yeesu a xuƥand’u lanq, soo a wodand a kid ake no qoye.

¹⁵ Ten taxu Farisiya we a ndefa no laamtaa o qoye, ne ta fi’na boo a waagat a ka. A laya a den ee: «Kaa xuƥand lanq, a ɗuumaam o ten na kid, um ɓogook, waagat a ka.»

¹⁶ Naaga, leng-leng no Farisiya waa a laya yee: «Oxe fi’na keene hatee na Roog, yaam a ƭat um yongee na bes fee na ñootnax ale.» Lakas na den a laya yee: «Ndi nam o paabakaad a waagu o fi’it xa anddiloor xa nandu neene?» Ñimatir maak a jega a ndeer den.

¹⁷ A ndakooxa o laamit o puul oxe yee: «Wo o mat, xar layo no ten, wo fee ta wodandna?» A laya a den ee: «O tuleer oo.»

¹⁸ Aa-adax we no Yaawuur we ngim’ee yee o koor oxe a mos’a o fuul boo a waagat a ka, too a nqoyna we ndimuuna.

¹⁹ Yaa da ngarna, a laamta a den ee: «Ndax oxene o ƥiy nuun onqe nu layna yee kaa rimtel mbuulaanaq oo? Nam a waagtatu a ka koy?»

²⁰ We ndimuuna a ndoona yee: «I anda yee o ƥiy in oo, and itam ee mbuulaanaq a rimte.

²¹ Kaa koy, no ke farna no waag a ka um ndiiki, a ñaama a in, too i andee oxe ga’nooruuna. O ten oo xeene. Laamteenoo, yaam o maak jiŋ oo. Xan a lay a nuun a qool qac ne fop a xewitna.»

²² Kaa lay’u keene, yaam a saɗaraa aa-adax we no Yaawuur we. Weene kaa ngukir’u yee oxuu layna yee Yeesu refu Kiristaa fee o Muumucil oxe regteena, xan a sutel no mbokatax ne no Yaawuur we.

²³ Ten tax’u da lay ee: «Laamteenoo, yaam o maak jiŋ oo.»

²⁴ Farisiya waa a ndakooxa o nqoy o koor oxe fuul’ina, soo a layin ee: «Waraa o ne’aa barke Roog, yaam i anda yee oxe wodandoonga o paabakaad oo.»

²⁵ A doona a den ee: «Ta ref o paabakaad mbaat ta ñakin o ref, a jega kaa wooraxama: Mi daal, o puul reeƭum, ndiiki waagataam a ka.»

²⁶ A ndakooxaan o laamit ee: «Xar a fi’u? Nam a fi’u boo o waagat a ka?»

²⁷ A doona a den ee: «Um layin a nuun, nu mbañaam o nan-giloox! Xar taxu nu mbug o ndak o nan kaa farna teen koy? Too ree kaa nu mbug o ndef daalbe um!»

²⁸ A mbenaan, soo a ndoon teen, a layin ee: «Wo refu taalbe um kañ. In o mat, daalbe Moyiis i ndefu.

²⁹ I anda xil koy ee Roog a laya fa Moyiis, ndaa oxeene, o leng andee maa ta hatna.»

³⁰ O qoye a doona a den ee: «Nuun daal, nuun mbetaxam! Nu andee me ta hatna yii? Too ta tax um waagat a ka o?

³¹ I anda toox de yee Roog naagee o jaɓaa a qeƭ no paabakaad, ndaa oxuu na niwan, a fi’aa ke ta bugna, a naagaan o jaɓanaa.

³² O leng mosee o nan maa o kiin a wodanditna a kid no timte mbuulaanaq.

³³ Oxeene a inoor’angee na Roog, waagkoogee o fi dara.»

³⁴ A ndoonaan ee: «Woxe rime kam bakaad, soo tee koo bug o jangin a in.» Naaga, a ndalfooxaan o ndax.

Yeesu a feedna yee na Roog a inooru

³⁵ Yeesu a yega yee o qoyaa kaa rax’el. Yaa ta xetna fo ten, a layaan ee: «Ndax gimaa no xe na xoyeel o Ƥeenqe no kiin oxe?»

³⁶ A doona yee: «O Yaal oxe, an oo boo um gimaa no ten?»

³⁷ Yeesu a layaan ee: «Ga’aano! O ten na layaa fa wo.»

³⁸ O qoyaa a laya yee: «O Yaal oxe, gimaam», too naaga a faɗooxaan.

³⁹ Yeesu a layaan ee: «Kaa jeg kaa xoolandiiduuma na adna feeke. Kaam gar, ndax we mbuulaanaq a damna a nga, we mboogna yee kaa nga’aa a mbuul.»

⁴⁰ Yaa leng-leng no Farisiya we ndeeƭna fo ten a nanna kaaga, a layaan ee: «Kaa o bug o lay ee kaa i mbuul.»

⁴¹ Yeesu a doona a den ee: «Mbuulaanaq-yiif a dam’angaa a nuun, nu njegkoogee bakaad. Kaa koy, nuun we layaa yee nu mbaaga a ka, ten taxu yoo, pakaad nuun a sax na nuun.»