YEGIL MBAAX NE YEESU ne Saŋ a bindtuuna 8 - NQAARIIT NE ROOG

O tew o seeseeq oxe

¹ Yeesu a dalfooxa o ret no Joong olaa no taxar oliiw kaa.

² Kaa koy, ye a kid a nqoolna a nomtooxa no Mbind Roog naa, soo saax le fop a ngar a ndeerin. Maaga, a moofa, a jangnaa a den.

³ Jaajangin we no kebil ke Moyiis fo Farisiya we a ƥisiida o tew oxaa beteena fo xaa refeerna o kor um.

⁴ A ƥisiidaan ndeer no we lang’ina, a nan-gilooxaa a Yeesu, soo a mbaambir fa Yeesu, a layin ee: «O Caajangin oxe, o tew oxeeke kaa betel fo xaa refeerna o kor um.

⁵ Too koy, Moyiis kaa lay kam kebil ke ten ee o tew oxuu fi’na keene, kaa war o wartel a kac. Ii, wo koy, xar layo teen?»

⁶ O nanangaa da laamtan, o ndamnoorin soom a mbug’u. Yeesu o mat, oxe yoornooxa, a bindaa a lanq fo nqol um.

⁷ Ne ngoor ke laamtooguuna a taar o marin, Yeesu a dalfooxa o let, a lay a den ee: «Oxuu moseerna o fi bakaad na nuun, fat a eet o deɓ took um ɗak.»

⁸ A dakooxa o yoornoox, a bindaa a lanq.

⁹ Yaa da nanna kaaga a ndalfooxa o mbojoox o leng o leng, maak we a adoox. Yeesu fo o tew oxe soom yoq’atu maaga, o tew oxe a geenoox rek.

¹⁰ Yaa Yeesu a dakooxna o let, a ga’a o tew oxe soom, too a laamtaan ee: «Tew oxe, taa we njamboogoonga koy? O leng hate’irang?»

¹¹ O tew oxe yee: «Ha’aa fe, o Yaal oxe.» Yeesu a layaan ee: «Mi itam, hate’iroong. Reti! Kaa koy, ba o bakaadat.»]

Yeesu, a qoolaand adna

¹² Yeesu a dakooxa o lay faan laa yee: «Mi refu a qoolaand adna. Oxuu reefaxama, ñaaƴkee no niɓaan, too xan a jeg a qoolaand o ñoow.»

¹³ Took kaaga, Farisiya we a layaan ee: «Ca, o refanangaa xoox of o seede kañ, seede of deyee.»

¹⁴ Yeesu a doona a den ee: «Ke um layanaa layan a xoox es fop oo, a ƭelem es ndigil kak oo, yaam kaam and me inooruuma, and me um jofaa. Nuun koy, nu andee me inooruuma, ne’atiim me um jofaa.

¹⁵ Ne nu nga’taa nu ngate’taa, too mi o mat hate’itkiim o kiin neene.

¹⁶ Um hate’angaa o kiin itam, kaa war, yaam refiim sang es, Faap fee lulaxama, oxe fa mi.

¹⁷ Kam kebil ke nu mbarakooxna kaa bindel ee: Ke wiin ɗik a seede’na, ndigil oo.

¹⁸ Me ta refna koy, kaam seede’anaa a xoox es, Faap fee lulaxama a seede’anaxam itam.»

¹⁹ A laamtaan ee: «Taa faap of?» Yeesu a doona yee: «Nu andiraam, nu andee a Faap es. E, yaam nu and’angaam, nu andkooga a Faap es.»

²⁰ Yeesu oxe layta a ƭelem akeene maa halal faa a geekoogeena kam Mbind Roog naa, a soƥ ta jangnaa, ndaa o leng doon’iran o ɓay yaam hap um fad’afulee.

«Nu mbaagkee o ngar me um jofaa»

²¹ Yeesu a dakooxa o lay a den ee: «Mexey retaa, too xan nu mbaaƭaam, ndaa pakaad nuun nu nqonitkaa. Nu mbaagkee o ngar me um jofaa.»

²² Took kaaga, Yaawuur we a laya yee: «Too refee kaa bug o xiroox? E, yaam kaa lay ee nu mbaagkee o ngar me um jofaa.»

²³ Yeesu a dakooxa o lay a den ee: «Nuun, a lanq nu ngatu, mi, um hat took. Wiin adna feeke nu ndefu, too mi o mat, refiim o kiin adna fee.

²⁴ Ten taxu um lay a nuun ee pakaad nuun nu nqonitkaa. Nu ngimangee oxe refuuma kañ, a woora yee kam pakaad nuun nu nqonitkaa.»

²⁵ A laamtaan ee: «Wo refu an?» Yeesu a doona yee: «Oxe um layaa a nuun no mberaand naa boo ndiik.

²⁶ A jega mayu kaa waruuma o layit na nuun fo kaa waruuma o ɓanj na nuun. Kaa koy, oxe lulaxama, ndigil rek a layaa, too ke nantuuma no ten, um yegnaa adna.»

²⁷ Xool’ee a den dara yee Faap fee a ne’aa.

²⁸ Maaga, Yeesu a laya a den ee: «A koom alaa nu yoɗkaa o Ƥeenqe no kiin oxe rek, nu andkaa oxe refuuma, and itam ee ke um fi’aa refee pexey xoox es. Ke um layaa fop, Faap es jangnaxam o ten.

²⁹ Oxe lulaxama, oxe fa mi. Xaƴiraam sang es, yaam kaam fi’aa kili ke feluuna.»

³⁰ Ye Yeesu a layaa keene, mayu a ngimata no ten.

We njegna a qoox den fo we njegeeruuna

³¹ Yeesu a laya Yaawuur we ngimatna no ten ee: «Nu ngenangaa na fa lay es, daalbe es tigi nu ndefu.

³² Xan nu and ndigil ne, too xan ndigil neene a wat a nuun.»

³³ A ndoonaan ee: «In de, xa taan Abraham i ndefu, too i mosee o ndef o paɗ no kiin. Yaaga koy, nam waago o layit ee xan i mbatel?»

³⁴ Yeesu a doona a den ee: «No ndigil, no ndigil, mexe layaa a nuun ee: Oxuu na fi’aa pakaad, o paɗ bakaad oo.

³⁵ O paɗ koy, a paƴ um nqooɗee no mbind no yaal um, ndaa ake no ƥiy o ndime nqe o mat a nqooɗa, too teen a genkaa boo faw.

³⁶ Yaaga koy, boo o Ƥeenqe a watna a nuun, xan nu njeg a qoox nuun tigi.

³⁷ Andaam xil ee xa taan Abraham nu ndefu, ndaa kaa nu mbaaƭaa maa nu njangitna o ñis es, yaam nu mbugee o njaɓ ke um jangnaa.

³⁸ Ke ga’uuma no mbind Faap es um laytaa, nuun o mat, nu mbi’aa ke nu nanitna na faap nuun.»

³⁹ A ndoonaan ee: «Abraham refu faap in fe!» Yeesu a laya yee: «Nu ndeeƭangaa xa ƥiy Abraham, nu saq a pi’oorooƭ Abraham.

⁴⁰ Nu mbaaƭee tus toox de, a refangee maa nu nquufitna ñoot o ñis es, too layiim a nuun dara, a refangee ndigil ne nantuuma na Roog. Abraham mosee o fi nandu neene.

⁴¹ Nu mbi’ee nen o ten, nen a faap nuun nu mbi’aa.» A layaan ee: «I ndefee xa ƥiy ceeq fe! Faap fa leng koŋ i njegu, ta ref Roog.»

⁴² Yeesu a laya a den ee: «Roog a reeƭangaa Faap nuun, nu mbexkoogaxam, yaam na Roog inoorum, garaa. Refee yee mi inu a xoox es, o ten luliidaxam.

⁴³ Ndi xar taxu nu nga’ee a qool qac ke um ne’aa a nuun? Yaam kaa felee o nanel soom!

⁴⁴ Saytaane o mat refu faap nuun, too nu mbugee o mbadin dara, a refangee ke faap nuun a diirooxaa. No mberaand naa boo ndiik o baawar oo, too geenooxkee no ndigil muk, yaam ndigil leng refee no ten. A naagangaa o maaɓaa koy, no ndap xeeñ um a suttan, yaam o maamaaɓ oo, too ten refu faap o maaɓ.

⁴⁵ Mi koy, ne um layaa a nuun ndigil taxu nu ngimee na mi.

⁴⁶ An na nuun waagaxam o ne bakaad faa mosuuma o fi? Um naagangaa o layaa ndigil koy, xar taxu nu ngimee na mi?

⁴⁷ Oxe fogna na Roog, kaa nan-gilooxaa fa lay Roog. O nanangaa nu nan-gilooxee fa lay es, kaa nu mbogee na Roog.»

Yeesu fa Abraham

⁴⁸ Yaawuur we a layaan ee: «Refee keene i layaa lay! Ke i layna yee jini damong kañ, ndigil oo! O Saasamari o mat refo!»

⁴⁹ Yeesu a doona yee: «Jini damiraam de. Kaam ɓoxotaa a Faap es tedaanga rek, soo nu mbaaƭaa maa jegtuuma gaci.

⁵⁰ Waaƭiim maa gon es a yoɗteena. Kaa koy, a jega oxaa buguuna, ta ref o Kaahate xe.

⁵¹ No ndigil, kaam ee oxuu gayna a ƭelem es, xonkee muk.»

⁵² Maaga, Yaawuur waa a mboola a layin ee: «Ahaa! Refee tige a feedatinooxa! Wo kañ, jini damong! E, Abraham a xon, duleer we a nqon, soo o fi nene layik ee: Oxuu gayna a ƭelem es xonkee muk!

⁵³ Ii, wo hupu o taan in Abraham fee xonna? Duleer we sax a nqona! Ndi mam doono a xoox of?»

⁵⁴ Yeesu a laya a den ee: «Um naagangaa o kañaa a xoox es, ngiin es saƭkee. Kaa koy, Faap es na kañaxam, ten fee nu nqoyaa Roog nuun, too nu andiran.

⁵⁵ Mi koy, andaanum, too um layangaa yee andinum oo, xam nandat fa nuun, ref o maamaaɓ. Andaanum tigi, too mexe gayaa fa lay um.

⁵⁶ Abraham fee faap nuun a ɗaay’a lool, yaam a yaakaaroogu a kar es soom. A ga’aan itam, too a felakinoox’a.»

⁵⁷ Yaawuur we a layaan ee: «Nam a waagu o jegit? Woxey jegiro xa kiid qarɓeen ƥetik sax, soo layaa yee ga’aa a Abraham?»

⁵⁸ Yeesu a laya a den ee: «No ndigil, mexe layaa a nuun ee: Yaaga Abraham rimafulaand, refum.»

⁵⁹ Took kaaga, ngoor kaa a ngisa a ƭak, ndax da ndeɓin o ten, ndaa Yeesu a naaga mes, a sutoox Mbind Roog naa.