YEGIL MBAAX NE YEESU ne Saŋ a bindtuuna 7 - NQAARIIT NE ROOG

Xa teɓ axe Yeesu ngimee no ten

¹ A cinj kaaga, Yeesu a dalfooxa o widaa Galile. Bug’ee o wirlooxaa kam Yudee, yaam ne Yaawuur we a mbaaƭoogna maa da mbartuuna.

² Ndoofeen naa no Yaawuur waa, refna Xew fee no ƭiif ke, kaa matiid’u.

³ Xa teɓ um a soƥiidaan a layin ee: «Ga’aa koy, ndiiki waagaa o ret Yudee, ndax daalbe of fop a mbaag o nga a pi of.

⁴ Waay waay, oxaa bugna o andel, naagee o ɗuuɗaa a pi um! O naagangaa o fi’aa ke o fi’aa kañ, fi’i boo fop a nga’ong.»

⁵ O nanangaan koy, kaa xa teɓ um sax ngim’ee no ten.

⁶ Yeesu a laya a den ee: «Hap es fadafulee, nuun koy hap nuun mosee o fadaƭar.

⁷ Adna fee mbaagee o sib a nuun. Mi koy, mbaagiraam o ñak o sib, yaam kaam seede’anaa a den a qool qac ee ke da mbi’aa faaxee.

⁸ Nu mbaaga o ndet, mi o mat retkafuliim, yaam hap es fadafulee.»

⁹ Yaa ta layna a den a ƭelem akaaga, a yoqa Galile.

Yeesu na Xew fee no ƭiif ke

¹⁰ Yaa xa teɓ axe Yeesu a ndetna na xew faa, a reta ten itam. Ret’ee koy ndax ta laltinoox, ndaa na pet.

¹¹ Yaawuur we kaa mbaaƭoogun na xew fee, too a laamtiraa yee: «Ndi mam a refu ref?»

¹² A jeg’a ñimatir ƭomu a ndeer no wiin we no kaa jofna no ten. Leng we kaa layoogu yee: «O kiin o paax oo.» Lakas we o mat a ndamtin na: «Heey, ha’aa! Oxeene na ruuxandaa moƴ-o-jaak we fop a koƥ.»

¹³ O leng jaɓ’ee o lay ke ta xalaataa tigi no ten, yaam a saɗaraa Yaawuur we.

¹⁴ Yaa xew faa a rokna a ndeer, Yeesu a reta no Mbind Roog naa, a jangnaa.

¹⁵ A cangin ale Yeesu a bet’a Yaawuur we boo da ndamtin na: «Nam a andtu a Pind a Tedu ke, too goƭee teen na cang?»

¹⁶ Yeesu a doona a den ee: «Refee yee na mi fa xoox es ke um jangnaa a hatu. Oxe hata no xe luliidaxama.

¹⁷ Oxuu bugna o fi ke Roog a bugna, xan a and ndax a cangin ale mi na Roog a hatu ndax nam, ndi mi na kañaa kañ a xoox es.

¹⁸ Oxe na kañaa a xoox um, gon um a bugu o jootand, ndaa oxe na waaƭaa gon no xe luluuna a joot, oxaaga ndigil kak a layaa, too njofaƭar leng refee no ten.

¹⁹ Kaa refee yee Moyiis cooxu a nuun kebil ke? O leng na nuun boo nu nqet naagee o fi’aa ke kebil ke a simitna. Xar taxu nu mbaaƭaa maa nu saktaxama pexey?»

²⁰ Wiin waa ndeeƭna maaga a layaan ee: «Too refee kaa jini a ref fa wo! An na waaƭaa maa ta saktoonga pexey ee?»

²¹ Yeesu a doona a den ee: «Mexey fi’a a pi katil a leng kut, soo nu mboor a kid tee kaa nu njaaxiɗ.

²² Moyiis a cooxa a nuun nquc – refee koy sax ee no ten a inooru, ndaa no daan maak we – soo nu nqucnaa na bes fee na ñootnax ale.

²³ Nu naangangaa o nqucaa o kiin na bes fee na ñootnax ale, yaam ndik kebil ke Moyiis a ƭapel, xar taxu nu mbuuxanaam yaam ne wodanduuma o kiin bo tee ceŋ na bes fee na ñootnax ale?

²⁴ Baa o nand a taxat nu ƥanjaa, naangyo ndoonaa a kid nuun no cofel.»

Ndax Yeesu refu Kiristaa fee?

²⁵ Leng-leng no waa ngenna Yeerusaleem a layooga yee: «Andum oxeeke kaa refee oxe da mbaaƭoogna, ndax da mbarin?

²⁶ E, soo ta layaa neeke, too o kiin saɗiran o lay ee a ngid of lanq key teen. Too ree aa-adax we kaa ngimat ee o ten refu Kiristaa fee, o Muumucil oxe regteeena.

²⁷ Kaa koy, andiim ne ta saxitkaa, yaam oxeeke i anda o rimel um, too yaa Kiristaa fee a garkaa, o leng andkee me ta hatkaa.»

²⁸ Yeesu a foda kam Mbind Roog naa, a lay a maak ee: «Kaa nu mboog ee nu andaxam, and me hatuuma! Atiim mene a xoox es. Oxe luliidaxama koy, ndigil kak a layaa, ndaa nu andee oxeene.

²⁹ Mi o mat andaanum, yaam no ten inoorum, too o ten luliidaxam.»

³⁰ Kaa mbaaƭoogu maa da ndamtuuna, ndaa o leng duq’iran, yaam hap um fad’afulee.

³¹ Mayu no wiin waa a ngima no ten, too a layaa yee: «Kiristaa fee a garangaa, ndax xan a fi xa anddiloor xa kupu axe oxene a fi’na?»

Alkaati a lule, ndax da ndam a Yeesu

³² Kaa wiin waa a layoogna na Yeesu a naaga xot no nof no Farisiya waa. A ndalfooxa o nga’ir fo saasadax maak waa, soo a lul alkaati, ndax da ndet a ndam a Yeesu.

³³ Yeesu a laya yee: «Miñkatiim fa nuun, yaam kaam retaa maa no xaa lulaxama.

³⁴ Xan nu mbaaƭaam, ndaa nu nga’kiraam, too nu mbaagkee o ngar me um refkaa.»

³⁵ Naaga, Yaawuur we a layra yee: «Ndi mam a rokkaa boo i mbaagkiran o nga? Ndax kaa retaa kam teeru ke no Geegeres we, maa ta waagna o soƥ xeet fee in pictoorna, soo a jangin itam we ndefeerna Yaawuur?

³⁶ Xar a ƭelem akene ta layna a tektu: ‹Xan nu mbaaƭaam, ndaa nu nga’kiraam, too nu mbaagkee o ngar me um refkaa›?»

A cur foofi fo ñoow

³⁷ Na bes fa mbalakaand faa, refna ref bes faa moƴna o magin na xew faa, Yeesu a inooxa a geenoox, a lay a maak ee: «Oxuu hoɗomeena, fat a gar a yer me mi!

³⁸ Oxuu gimna na mi, xan a cur foofi kaa na ñoownaa a mbalit kam um, ne a Pind a Tedu ke a laytuuna.»

³⁹ Yeesu koy, Yiif Tedu le na ci’keel we na ngimkaa no ten a ne’oogu, ye ta layna keene. Na waxtu faaga, Yiif Tedu le ci’it’afulaand, yaam ne Yeesu a ɓoxot’afulandeena o ndam.

Mayu a xalaate na Yeesu

⁴⁰ Yaa wiin waa a nanna a ƭelem akaaga, leng-leng a laya yee: «Oxeeke o mat refu o Tuleer oxe.»

⁴¹ Lakas we koy, kaa layoogu yee: «Ten refu Kiristaa fee o Muumucil oxe regteena.» Wene a mbodit mene a ndamtin na: «Ca! Ndax Kiristaa fee a waaga o hat Galile?

⁴² Kaa a Pind a Tedu ke layee yee Kiristaa fee no kurcala Dawid a hatkaa? Kaa ndoonee teen ee Betleheem fee refna teeru faa Dawid a waru o inoor?»

⁴³ Wiin waa a nqaajoora yaam o ten.

⁴⁴ Leng we kaa mbug’un o ndam a mbegnin, ndaa o leng duq’iran.

Ngimaƭar ne no aa-adax we no Yaawuur we

⁴⁵ Alkaati ke luliid’eena a naanga temel a nomtoox maa no saasadax maak waa fo Farisiya waa. Yaa da mbadiidaa mbadiid rek, ngoor ke a laamta a den ee: «Xar taxu nu ngartiran?»

⁴⁶ Alkaati kaa a ndoona a den ee: «Kaa naa adna gode ɓaax, o kiin mosee o lay fa lay fa nqentu naana!»

⁴⁷ Farisiya waa a laya a den ee: «Mbaar refee nuun itam kaa a qoox nuun a laxadel?

⁴⁸ Kaa nu mos o nga o leng no aa-adax we mbaat o leng no Farisiya we oxaa gimna no ten!

⁴⁹ We mbatna o mbid a ƭak-ƭaknanan, refee kaa ndef wiin halakooxu waa andeerna dara no kebil ke Moyiis.»

⁵⁰ Nikodeem fee mos’ina o inoox, a ret maa Yeesu, too a ref o leng na den, a laya a den ee:

⁵¹ «Ndax kebil ke Moyiis i mbarakooxna a njaɓa o kiin a xawel, too xaƴaand a xoxit a xoox um, soo ke ta fi’na a ɓaalel?»

⁵² We ta laytoogna a ndoonaan ee: «Mbaar refee wo itam o Kaagalile refo? Hori boo ga, ndax o tuleer a mosa o hat Galile.» [

⁵³ Cinj kaaga, o kiin oo kiin a xaada.