YEGIL MBAAX NE YEESU ne Saŋ a bindtuuna 5 - NQAARIIT NE ROOG

Yeesu a wodanda o ƥoof

¹ Cinj kaaga, Yaawuur waa a ndoo­fandooga xew kam Yeerusaleem, too Yeesu a reta maaga ten itam.

² Na teeru faa Yeerusaleem koy, a jeg’a ndokand naa ne’eena Ndokand ne no paal ke. Paam ndokand naaga, a jeg’a o ul o maxe. Yaawuur we kaa nqoyoogun Betesda, too a jeg’a a qul a ƥetak akaa ndeeruuna, a ƭiiftel kaa fi’na nen jibir faa geenniteena a toodook.

³ A jeg’a wiin jiru mayu waa mbondooxna ɗuga jibir faaga: Fuuliin, xaruyiin, ɓoofiin. [Oxuu refna na den kaa cungoogu yaa foofi le a yo’nooxkaa,

⁴ yaam kaa jeg’u malaaka faa fudooxiidoogna kam o ul ole leek-leek. Kaa garoogu a jumband foofi le, too oxuu eet’ina o naag teen coloƥ yaa foofi le a jumbandeena a wodooga boo ceŋ, kuu jir um a waag’ina waag o ref.]

⁵ A jeg’a maaga o koor oxaa jir um a jeg’ina fo ten xa kiid qarɓeen tadik fo xa kiid ɓetaa tadaq.

⁶ Yaa Yeesu a ga’na ta wondoox, a anda yee a miña o jir, too a layaan ee: «Ndax bugaa o wod?»

⁷ O baad oxaa a doonaan ee: «O Yaal oxe, jegiim o leng oxaa ɓekaxama kam o ul ole yaa foofi le a yo’neena, too um naagangaa beret boo um helko fo fi’aa tus, o lakas ee coloƥ a adooxaam.»

⁸ Yeesu a layaan ee: «Inooxi jang o sar of, too ñaaƴ.»

⁹ Ndak fo ndak, o koor oxaa a woda. A dalfooxa o kaf o sar um, a ref na ñaaƈ. Kaaga xaa xew’a na bes fee na ñootnax ale.

¹⁰ Yaa Yaawuur waa a nga’na oxe wodand’eena, a layaan ee: «Xaye bes fee na ñootnax ale oo. Kebil ke ci’irang o roxondoox o sar of jayang-jayangnaa fo ten.»

¹¹ A doona a den ee: «Oxe wodandaxama kaa layaam ee: ‹Jangi o sar of, too ñaaƴ!› »

¹² A laamtaan ee: «An layong ee jangi o sar of ñaaƴ ee?»

¹³ Kaa koy, oxe wodand’eena and’ee oxe ta refna, yaam Yeesu kaa naag’u mes a ndeer no wiin mayu waa ndeeƭna maaga.

¹⁴ Taa mbaaambir naa, Yeesu a soƥaan kam Mbind Roog naa soo a layin ee: «Refee wodandee? Ba o bakaadat koy yaam ndik kaa moƴna faaxaƭar a dalong!»

¹⁵ O koor oxaa a reta a lay Yaawuur waa yee Yeesu wodand’un.

¹⁶ Ten tax’u Yaawuur we a ndaabaa a Yeesu, yaam ne ta fi’oogna keene na bes fee na ñootnax ale.

¹⁷ Yeesu a laya a den ee: «Faap es kaa gen no jalaa, too mi itam mexey no calel.»

¹⁸ Yaawuur we a moƴa o say koy, a mbaaƭaa maa da mbartuuna, yaam laafee bes fee na ñootnax ale soom a day teen, ndax a doon a lay ee Roog refu Faap um, a fodandooraa a Roog.

Sañ-sañ no Ƥiy onqe Roog

¹⁹ Yeesu a ɓaata o lay a den ee: «No ndigil, no ndigil, mexe layaa a nuun ee: O Ƥeenqe waagoodee dara. Ke ta fi’aa fop, kaa ga Faap um a fi’an. Kuu Faap fee a fi’aa, o Ƥeenqe kaa fi’an itam.

²⁰ Faap fee kaa fex o Ƥeenqe boo a lalan ke ta fi’aa fop, too xan a lalin a pi akaa ngupna wene, ndax nu ndam xa ton.

²¹ Ne Faap fee a xontooxnoortaa, a ñoowdandaa, neene o Ƥeenqe a cooxtitaa o ñoow oxuu feluuna.

²² Faap fee naagee o hate’aa, yaam nqeloor nuu refna, na xa ƥay no Ƥeenqe a doonun,

²³ ndax fop a niwit o Ƥeenqe ne da niwitna a Faap fee. Oxe niweerna o Ƥeenqe, niwee a Faap fee luliiduuna.

²⁴ No ndigil, no ndigil, mexe layaa a nuun ee: Oxuu nan-gilooxna fa lay es, a gim no xe luliidaxama, a jega o ñoow o fagkeer ole, too geenooxkee no nqeloor naa muk, yaam kaa inoor na fa nqon a rok no ñoow.

²⁵ No ndigil, no ndigil, mexe layaa a nuun ee: Waxtu fee xe mbaambir, too a fadiida sax. Waxtu feene refu waxtu fee xon we a nankaa o ñuxur no Ƥeenqe Roog, too we na nankan xan a ñoow.

²⁶ Yaam ne Faap fee fa xoox um a ñoownitaa, a ci’tu o Ƥeenqe itam ta ñoownaa.

²⁷ A ci’aan itam sañ-sañ faa ta hate’taa, yaam ten refu o Ƥeenqe no kiin oxe.

²⁸ Baa keene a jaaxɗand a nuun, yaam waxtu fee xan a gar, faa we ndefna kam poy ke fop a nankaa o ñuxur um

²⁹ soo a sutoox. We mbi’na paax xan a nqontoox, a ndok no ñoow, we mbi’na paaxeer a nqontoox, a ndet no nqeloor.»

Ke Yeesu a seede’aneena

³⁰ «A yoqtangee dara ndax na mi soom, waagiim o fi dara. Ne um nantaa um hate’taa, too kate ne mi kaa jof bo, yaam naagiim o waaƭaa ke buguuma, ndaa ke oxe lulaxama a bugna.

³¹ A soƥangaa yee mi na seede’anaa a xoox es, ke um layaa a waaga o ñak o jaɓel nen seede fa saƭku.

³² Kaa koy, a jega o lakas oxaa na seede’anaxam, too andaam xil ee seede um ndigil kak oo.

³³ Refee nu lulit’a maa Saŋ boo ta lay a nuun a qool qac ke ta andna no ndigil ne?

³⁴ Refee koy ee um war o geƈnoox no seede no kiin. O nanangaa um lay a nuun keene, kaam bug soom nu muc.

³⁵ Saŋ reeƭu o jam ole na kaƥaa, a meleƈaa, too nu mbug’a o moof o ndik sax, mbelakinoox yoora kaƥ ne ten.

³⁶ Seede es koy hupu ne Saŋ, yaam a pi ake Faap fee a doxnaxama ndax um fi a den, ndefna ndef ke um fi’aa ndiiki, kaa laltaa yee Faap fee lulaxam.

³⁷ Faap fee lulaxama fo o mem um koy sax a seede’anaxam. Nu mosee o nan o ñuxur um, nga a tagid um ne’aand,

³⁸ too fa lay um genee na nuun, yaam nu ngimee no xe ta luliidna.

³⁹ Kaa nu ƥaalaa a Pind a Tedu ke, yaam mboog ee na den nu mbaagu o njegit o ñoow o fagkeer. Den na seede’anaxam toox de!

⁴⁰ Ii, keene koy, too nu mbugee o ngar na mi, ndax nu njeg o ñoow!

⁴¹ O ndam es, naaginum o suqtitaa no wiin we.

⁴² Andaam a nuun a paax: Nu mbexee a Roog na qeeñ nuun.

⁴³ Kaam gar no gon Faap es, soo nu nquruloox. O lakas a garangaa no gon xoox um koy, nu mbarakooxin.

⁴⁴ Kaa koy, nam nu mbaagu o ngimit sax, nuun we na ƈufanaa o ndam o ngatu no wiin we, mbañ o naaɓ o ndam o ngatu na Roog?

⁴⁵ Ba nu mboog ee xam jamb a nuun mbaambir Faap fee. Ke na jambaa a nuun refu kebil ke Moyiis, den we ndefna yaakaar nuun.

⁴⁶ Nu ngim’angaa ke Moyiis a bindna, nu ngimkooga ke layuuma itam, yaam a binda kaa jofna na mi.

⁴⁷ Nu ngimangee ke ta bindna, nam nu mbaagu mbaag o ngimit ke um layaa?»