YEGIL MBAAX NE YEESU ne Saŋ a bindtuuna 3 - NQAARIIT NE ROOG

Yeesu fa Nikodeem

¹ A jeg’a koy o koor oxaa fogna no Farisiya we too a ne’el Nikodeem, a ref o leng no kelfa ke no Yaawuur we.

² A gara a soƥiid a Yeesu o yeng o njeek, soo a layin ee: «O Caajangin oxe! I anda xil ee o caajangin o inooru na Roog refo, yaam o leng waagee o fi xa anddiloor axe o fi’aa, Roog a refangee fo ten.»

³ Yeesu a doonaan ee: «No ndigil, no ndigil, mexe layang ee: O kiin waagee o ga Maat ne Roog a refangee kaa rimel o rimel o xas olaa inoorna na asamaan.»

⁴ Nikodeem a layaan ee: «Ca, nam o kiin a waage waag o rimit yaa ta nogoyna? Ndax a waaga o nomtoox no fud ya um, soo a rimatinel?»

⁵ Yeesu a doonaan ee: «No ndigil, no ndigil, mexe layang ee: O kiin waagee o rok no Maat ne Roog, too rimtaand foofi fo Yiif le Roog.

⁶ Kuu cer a ndimna no cer a fogu, too kuu hatna no Yiif le Roog, no ten a fogu.

⁷ Baa ke layoonga yee o rimel o xas waru a nuun, a jaaxɗandong.

⁸ Nqeñ ne kaa wuuɗaa muu feluuna, o nanaa ñax le, ndaa koy andiro me ta inooraa, ne’atiim me ta jofaa. Neene deŋ a reftu no kiin oxaa rimteena Yiif le Roog.»

⁹ Nikodeem a dakooxaan o lay ee: «Nam kaaga a waagu jegit?»

¹⁰ Yeesu a doonaan ee: «Coo, o ref o caajangin o maak oxe Isra’el, too andiro keene!

¹¹ No ndigil, no ndigil, mexe layang ee: Ke i andna i laytaa, too a refangee kaa i ndoonna a ngid, i naangee o seede’aa lakas, ndaa koy nu njaɓee ke i seede’aa.

¹² Nu ngimangee ye layuuma a nuun ke jofna no ke refna took lanq ke koy, nam nu ngimitkaa yaa layuuma a nuun kaa jofna no kaa refna na asamaan?

¹³ O leng mosee o ŋaay na asamaan, a refangee oxe fudooritna na asamaan, ta ref o Ƥeenqe no kiin oxe genna na asamaan.

¹⁴ O Ƥeenqe no kiin oxe a wara o yoɗtel ne Moyiis a yoɗit’ina fangool faa na koƥ-a-ƥor alaa,

¹⁵ ndax oxuu gimna no Ƥeenqe a jeg o ñoow o fagkeer ole.

¹⁶ Yaam Roog a fexa adna fee boo a ci’it o Ƥiy o leng kut onqe ta jegna, ndax oxuu gimna no ten saŋkooxkee muk, ndaa ndax ta jeg o ñoow o fagkeer ole.

¹⁷ Roog koy, luliidee o Ƥeem na adna fee, ndax ta hate adna fee, ndaa ndax ta muclin na pexey o Ƥeem.

¹⁸ Oxuu gimna no ten hate’kaand, ndaa oxuu gimeerna a hate’e boo a ƴut, yaam ne ta gimeerna no Ƥiy o leng kut onqe Roog.

¹⁹ O nanangaa hate faaga koy, kaa ye a qoolaand ale a garna na adna fee, wiin we kaa nqaƴin, a njil o niɓaan ole, yaam a pi den kaa mbaaxaƭar.

²⁰ Oxuu refna a anda yee oxaa na fi’aa paaxeer bugee maa xoolna, too kaa laqtooxaa a qoolaand ale, yaam ndik a pi um a nguytoox.

²¹ Oxe na ñaaƴaa no ndigil ne koy, kaa garaa na qoolaand ale, ndax fop a nga ee Roog na ɗoxaa a pi um.»

Saŋ o Paabatiise xe a dakooxa o seede’an a Yeesu

²² Cinj kaaga, Yeesu a yoona fo daalbe um, da ndet no jegel olaa Yudee. A refa maaga fa den, a batiise’aa.

²³ Saŋ o mat, oxaa batiise’tooga Enon paam Saliim, yaam maaga kaa may’u foofi lool, too wiin a ngarooga ndax da mbatiise’el.

²⁴ Na jamaane faaga, Saŋ ɓek’afulaand kaso.

²⁵ Daalbe we Saŋ a ñimatira fo o Yaawuur no kaa jofna no njap.

²⁶ A ngara me Saŋ, soo a layin ee: «O Caajangin oxe! Oxe reeƭna fa wo ye i ndefaa kaltaa o xuluɓ ole Yordaan, too o seede’an’un de, kaa batiise’aa ndiiki. Wiin we fop, maaga a njoobatu.»

²⁷ Saŋ a doona a den ee: «O kiin waagee o jang colu muud fee ta daawitna na Roog.

²⁸ Nuun weeke ngeenooxna, nu maada ye layuuma a koom ee: Refiim Kiristaa fee, o Muumucil oxe regteena. Oxe halaniiduuna a ƭat um soom refum.

²⁹ O kor-no-kulook oxe jegu o kulook oxe, ndaa xaariit fee ten na diikooxan soo a geenoox, a naaga o jegaa o ɗaay o maak, yaa ta nanna o ñuxur um. Neene koy, o ɗaay ole mi a nandu, too ten taxu ta may boo a ɓaxoox.

³⁰ Ten fa xoox um kaa war o yoɗoox, mi o mat um fudoox.»

Oxe hatna took

³¹ «Oxe inoorna took hupu fop. Oxe hatna a lanq, a lanq rek a refu, too ke ta laytaa, a lanq a hataa. Oxe hatna took hupu fop:

³² Kaa layaa ke ta ga’na, a nanin, ndaa koy o leng jaɓee seede um.

³³ Oxe jaɓna seede um o mat, a lalta a qool qac ee Roog ndigil oo.

³⁴ Oxe Roog a lulna, a ƭelem Roog a layaa, yaam Roog naagee o hendaƭooxaa yaa ta ci’taa Yiif le ten.

³⁵ Faap fee kaa fex o Ƥeem boo a xaƴtin fop.

³⁶ Oxuu gimna no Ƥeenqe, a jega o ñoow o fagkeer ole. Oxuu nananeeruuna koy, jegkee o ñoow oleene, too fuux le Roog oxe cay took um.»