YEGIL MBAAX NE YEESU ne Saŋ a bindtuuna 21 - NQAARIIT NE ROOG

Na peepeer ale Tiberiya

¹ Cinj kaaga, Yeesu a dakooxa o feeñoox daalbe we na peepeer alaa no Maag olaa Tiberiya. Neeke a feeñoorit’u a den:

² Simoŋ Piyeer fa Tomaa fee na xoyeel Didiim fa Natana’el fee genna Kana no jegel olaa Galile fo xa ƥiy axe Sebede fo daalbe Yeesu ɗik lakas yoon’u.

³ Simoŋ Piyeer a laya a den ee: «Mexe faalkaa de.» A layaan ee: «In oo de, xan i yoon fa wo.» Naaga, a sutooxa, a ndok no suk, ndaa no yeng olaa, ndamee dara.

⁴ Yaa a kid a nqoolaa, Yeesu a gara boo na tambando faa, ndaa daalbe we andid’iran.

⁵ Yeesu a laya a den ee: «Xa koor, kaa nu njegee kaa nu ñaamna?» A ndoona yee: «Ha’aa.»

⁶ A laya a den ee: «Ndeɓyo mbaal ne na ñamaak, too xan nu ndam.» A ndeɓa maaga mbaal ne, boo o qicin sax a ɓoowoogata a den, yaam ta may fo liƥ.

⁷ Maaga, o taalbe xe Yeesu a fex’ina a laya a Piyeer ee: «O Yaal oxe yoo!» Yaa Simoŋ Piyeer a nanna yee o Yaal oxe yoo, too a yoq’u cer ƥor, a dalfooxa o rokoox ndoki um, a humnoox, soo a jimboox kam foofi laa.

⁸ Daalbe lakas we a ngarta suk ne, a qicaa mbaal ne naagna muut fo liƥ. Ngoƭ’ee dara, yaam ngap meetar teemeed rek ndeeƭu a ndeer den fa tambando fee.

⁹ Yaa da sutooxna, a nga’a na ƥeeraamb ale fiɗel fa ngeƥande, liƥ a ndoonel took fee. A soƥa maaga itam mbuuru.

¹⁰ Yeesu a laya a den ee: «Ƥisiidyo liƥ ke nu sogaa o ndam.»

¹¹ Simoŋ Piyeer a roka no suk naa, a qic mbaal ne dam’ina liƥ teemeed fo liƥ qarɓeen ƥetik fo liƥ tadik maak. Ke liƥ ke a may’ina may fop oo, mbaal ne gef’ee.

¹² Yeesu a laya a den ee: «Ngaryo ñaam.» Kaa koy, o leng no daalbe we saɗ’iran o laamit ee: «Wo an oo?» yaam a and’a yee o Yaal oxe yoo.

¹³ Yeesu a matiida, a jang mbuuru ne fo liƥ ke, a cooxin a den.

¹⁴ Keene reeƭu jaf dadkandeer le Yeesu a feeñooxna daalbe um, naa ta xontooxu a ndeer no xon we.

Yeesu fa Piyeer

¹⁵ Yaa da ñaktooxna boo a ƈut, Yeesu a laamta a Simoŋ Piyeer ee: «Simoŋ, o ƥiy Saŋ, ndax o mbeq of fa mi hupu o mbeq no weeke fa mi?» A doonaan ee: «Iyo moos, o Yaal oxe, andaa yee fexaaxoong.» Yeesu a layaan ee: «Topatooxi fo mbaal es.»

¹⁶ A dakooxaan o lay ee: «Simoŋ, o ƥiy Yoona, ndax fexaxamo?» Piyeer a doonaan ee: «Iyo moos, o Yaal oxe, andaa yee fexaaxoong.» Yeesu a layaan ee: «Gayi paal es.»

¹⁷ A dakooxa o laamit jaf dadkandeer ee: «Simoŋ, o ƥiy Yoona, ndax fexaxamo?» Maaga, Piyeer a naqadilooxa yaam ke ta laamtuuna boo a caf a tadak ee «Ndax fexaxamo?», too a doonaan ee: «O Yaal oxe, dara kunpa’irang. Andaa xil ee fexaaxoong.» Yeesu a layaan ee: «Topatooxi paal es.

¹⁸ No ndigil, no ndigil, mexe layang ee: Ye o refaa no ndeƥandoong, kaa o xiisnanoogu a xoox of o kurcala of, retaa maa feloonga. Kaa koy, boo nogoyoona, kaa o bugko letnaa xa ƥay of, o lakas a xiisnanong o ten, a ɓisang maa bugeeroona.»

¹⁹ Kaa lay’u keene ndax ta lalit ne Piyeer a xonitkoogna, ndax Roog a ɓoxotel o ndam. Cinj a ƭelem akaaga, a layaan ee: «Reefaam!»

Yeesu fo o taalbe lakas oxe

²⁰ Yaa Piyeer a reefanaa a Yeesu, a wiƈaqilooxa, a ga o taalbe xe Yeesu a fex’ina a reefanaa a den. Oxeene reeƭu oxe moof’ina paam Yeesu na cu’ax a palakaand alaa, too a laamit’un ee: «O Yaal oxe, an na ɓoxotkang?»

²¹ Yaa Piyeer a ga’uuna, a laya a Yeesu yee: «O Yaal oxe, oxaana koy, nam a mujitkaa?»

²² Yeesu a layaan ee: «Um bugangaa ta ñoowaa boo yaa um garkaa, xar warong teen? Wo kañ, reefaam rek!»

²³ Naaga, gimu we fop a nana ta layteel ee o taalbe xeene xonkee muk. Kaa koy, Yeesu lay’ee a Piyeer ee o taalbe xeene xonkee. Kaa lay’un soom ee: «Um bugangaa ta ñoowaa boo yaa um garkaa, xar warong teen?»

²⁴ O taalbe xeene o mat seede’u keene, soo a bindin. I anda itam ee seede um a saƭka.

²⁵ Yeesu a fi’a lakas mayu. A soƥ’angaa yee aluu refna teen a bind’e, foogaam ee a safe ke nqeƈkoogee na adna fee.