YEGIL MBAAX NE YEESU ne Saŋ a bindtuuna 20 - NQAARIIT NE ROOG

A qontax ale Yeesu

¹ No mbuyukuun naa na diiboor faa, a soƥ tige a maad o niɓaanaa, Mari-Magdala a reta na mboy alaa, a ga ɓil le a mboy ale a wegit’eena a watnel.

² A ƴufa a ret maa Simoŋ Piyeer fo maa no taalbe xe Yeesu a fex’ina bo, a lay a den ee: «O Yaal oxe a sute na mboy alaa de, too i andee me ta dooneena.»

³ Piyeer fo o taalbe o lakas oxe a ndalfooxa o sutoox, a mbaaƭooxanik a mboy alaa.

⁴ Den ɗik fop kaa ƈufoogu, ndaa o leng oxe a daɗa a Piyeer boo a adooxin na mboy alaa.

⁵ A dalfooxa o wootnoox, too a ga’a njoor ne o dal ole a laxasit’eena, ndaa koy rokee.

⁶ Simoŋ Piyeer fee reef’ina took um a fadiida, a rok kam a mboy ale, a ga njoor ne o dal ole a laxasit’eena

⁷ fo ke laxas’eena no xoox le Yeesu. Keene koy fokat’aand fo njoor ne laxasit’eena o dal ole, kaa dor’el a doonel o saax.

⁸ Naaga, o taalbe xe adooxiid’ina na mboy alaa a roka, ten itam, a ga, soo a gim.

⁹ Kaa and’afulee a Pind a Tedu ke lay’ina yee xan a xontoox a ndeer no xon we.

¹⁰ A mbi’a naaga, a nqaad.

Mari a xeta fa Yeesu

¹¹ Mari koy, kaa geenoox’u paam a mboy ale, a loolaa. Kam xa lool um a ƴuuga, a bug o wootnoox kam a mboy ale,

¹² too a ga’a malaaka ƭik kaa saqna tikoorik tan, a moof me o dal ole Yeesu a wondin’eena. O leng oxe a moof’a me xoox le a fod’ina, o lakas oxe na caf ake.

¹³ A laya a Mari yee: «Ndi tew oxe, xar taxu o loolaa?» A doona a den ee: «Kaa o Yaal es a guuɗel, too andiim me da ƥisuuna.»

¹⁴ Yaa ta layna naaga, a wiƈaqilooxa, a ga a Yeesu ta geenoox, ndaa andid’iran.

¹⁵ Yeesu a layaan ee: «Tew oxe, xar taxu o loolaa? An o waaƭaa?» Mari kaa foog’u yee oxe na yetooxaa a ƭing ale me poy ke a ndefna yoo. Neene a layaan ee: «Yaal mbind! A soƥangaa yee wo ɗasnun, layaam me doonanoona, ndax um xotin.»

¹⁶ Yeesu a layaan ee: «Mari!» Tee beret, a layin na hebre yee: «Rabuuni!» O ɗelem oleene kaa tekit o caajangin es.

¹⁷ Yeesu a layaan ee: «Ba o duqaam, yaam ŋaayafuliim maa Faap es. Reti maa na xa teɓ es, lay a den ee mexey ŋaayaa maa Faap es fee Faap nuun, refna ref Roog es fee Roog nuun.»

¹⁸ Mari-Magdala a reta, a yegin daalbe we yee a ga’a o Yaal oxe, too keene o mat a lay’un.

Yeesu a feeñooxa daalbe um

¹⁹ Na bes diiboor faaga, taa no yaar olaa, daalbe we kaa mbokatoor’u, a mbegoox, yaam a saɗaraa Yaawuur we. Begax ke fop kaa mbeg’el. Maaga, Yeesu a gara, a geenoox a ndeer den, a lay a den ee: «Nu yaaree jam!»

²⁰ Yaa ta layna naaga, a lala a den xa ƥay um fo o saax um. Daalbe we a ƭaay’a lool, ye da nga’na o Yaal oxe.

²¹ Yeesu a dakooxa o lay a den ee: «Jam fa nuun! Ne Faap fee a lultaxama, mi itam, mexe lultaa a nuun neen.»

²² Cinj a ƭelem akeene, Yeesu a wuuɗa took den, a lay a den ee: «Ndaawyo Yiif Tedu le!

²³ Oxuu nu layna yee: ‹Roog a waasanaang pakaad of›, xan a waasanel a den. Kaa koy, oxuu nu layna yee: ‹Roog waasanirang pakaad of›, xan a maad fa den.»

Yeesu fa Tomaa

²⁴ Tomaa fee na xoyeel Didiim, too a fog’u no xarɓaxay fo ɗik waa, reeƭee fa den yaa Yeesu a garna.

²⁵ Daalbe lakas we a layaan ee: «I nga’a o Yaal oxe.» Maaga, a doona a den ee: «A refangee kaam doon a ngid na xa yul axe na xa teng axe, ɓek teen nqol es, o ɓay es, um doonin no saax um, gimkiim muk.»

²⁶ Yaa da moofna boo bes faa a dakooxiid, daalbe we Yeesu a mbokatoora, a soƥ maaga a Tomaa. Ye fop a naagna rap a wegel, Yeesu a feeñta a ndeer den, a lay ee: «Nu yaaree jam!»

²⁷ Cinj kaaga, a laya a Tomaa yee: «Ɓeki meeke nqol of, ɗeet xa ƥay es. Dooni o ɓay of no saax es, fañat o gimaƭar, ndaa gimi.»

²⁸ Tomaa a doonaan ee: «O Yaal es, Roog es!»

²⁹ Yeesu a layaan ee: «Kaa o ga’aam, soo gimkaa. We ngimna na mi koy, too nga’iraam, a ƭaaya.»

Ke Saŋ a muukitna

³⁰ Yeesu a fi’ahina mbaambir daalbe um xa anddiloor xa mayu xaa mbindaandeena no safe leeke.

³¹ Ke bindeena teen, kaa bindel, ndax nu ngim ee Yeesu refu Kiristaa fee, o Muumucil oxe regteena, refna ref o Ƥeenqe Roog. Nu ngimangaa, xan nu ndaaw o ñoow ole no gon um.