YEGIL MBAAX NE YEESU ne Saŋ a bindtuuna 18 - NQAARIIT NE ROOG

Yeesu a dame

¹ Yaa Yeesu a layna neene boo a ƴut, a inooxa fo daalbe um, a njoot a Ƈufnand alaa Kederon, soo a ndok na ƭing alaa reeƭna maaga.

² Yudaa fee nar’uuna o ɓoxot a and’a o lunq olaaga a paax, yaam maaga Yeesu a mer’u o fokataa daalbe um.

³ Yudaa a inooxa, a yoon fo alkaati ke saasadax maak we fo Farisiya we a ngebil’ina. A saq’a xa cam fo xa lampa fo ƥonax.

⁴ Yeesu o mat, a and’a fop ke nar’uuna o dal, a xetiida fa den, a laamit a den ee: «An nu mbaaƭaa?»

⁵ A layaan ee: «Yeesu o Naanasaret oxe.» A doona a den ee: «Mexey!» Yudaa fee naruuna o ɓoxot o mat, oxe geenooxa a ndeer den.

⁶ Yaa Yeesu a layna a den ee: «Mexey!» a ndakooxa a cinj, a mbat a yen.

⁷ Yeesu a dakooxa o laamit a den ee: «An nu mbaaƭaa?» A ndoona yee: «Yeesu o Naanasaret oxe.»

⁸ Yeesu a laya yee: «Mee ndax layaam a nuun ee mexey! A refangaa yee mi nu mbaaƭaa kañ, nqaƴyo weeke boog da ndet.»

⁹ Kaa lay’u naaga, ndax a ƭelem um akeeke a mbadnoox: «O kiin o leng sax no we doxnaxamoona mo’ee.»

¹⁰ Simoŋ Piyeer fee ɓonoox’ina laƥ a woosaan, a facin o tag oxe no saasadax o maak oxe boo nof ñamaak naa a ɗeg. O tag oxaaga koy, Malkis a ne’’e.

¹¹ Yeesu a laya a Piyeer ee: «Nomti laƥ ne no xool um. Ndax kaa yerkiim o kaas coono le Faap fee a sepaxama?»

Maa no saasadax o maak oxaa

¹² Xiixire we fo aa-adax den fo alkaati ke no Yaawuur we nqotiidna a Yeesu, a ndamaan, a ngumin,

¹³ soo a ƥisin pitik maa Xaan-Koor fee reeƭna o seemir Kayif. Kayif koy reeƭu o saasadax o maak no hiid olaaga.

¹⁴ O ten o mat as’u Yaawuur waa yee: «O leng a xon moƴu xeet fee fop a nduguñel.»

Piyeer a laya yee andee a Yeesu

¹⁵ Simoŋ Piyeer fo o taalbe o lakas a ndeefana a Yeesu. O taalbe xeene yoon’ina fa Piyeer koy, o saasadax o maak oxe a and’aan. Ten tax’u ta rok boo no maax um,

¹⁶ Piyeer o mat, a yoqand na carind alaa. Oxe o saasadax o maak oxe a and’ina, a reta maa no mbindaand onqaa yetoogna a carind alaa, a lay fo ten, soo Piyeer a rokiid.

¹⁷ Ye ta joonaa, o tag oxe a layaan ee: «Wo itam o taalbe no qoye refo.» Piyeer a doonaan ee: «Refinum de.»

¹⁸ Dag we fo alkaati ke a ngeƥanda fiɗel, a ndaƭooxaa, yaam kaa jopir’u a ƥuuɓ. Piyeer oo a gara, a geenoox paam den, a raƭooxaa.

Yeesu oxe laamteel

¹⁹ O saasadax o maak oxe a laamta a Yeesu kaa jofna no daalbe um fo a cangin um.

²⁰ Yeesu a doonaan ee: «Naa moofum o don es took a layaa, kaam jangnaa kam pind a qeƭ ke, kam Mbind Roog ne Yaawuur we fop a ndefaa. Jegee dara kaa layuuma na pet.

²¹ Xar taxu o laamtaxam boog? Ke layuuma, laamteen we nan-gilooxoogaxama. A anda xil fa lay es.»

²² Took a ƭelem akaaga, o leng no alkaati kaa reeƭna maaga a ranjaan mbaƭ, a layin ee: «Neene o doonitkaa o saasadax o maak oxe?»

²³ Yeesu a layaan ee: «Um layangaa cageer, lalteen, ndaa ke layuuma a jagangaa, xar taxu o fadaam?»

²⁴ Cinj kaaga, Xaan-Koor a ruuñaan fo mbeñ um fop a Kayif fee o saasadax o maak.

Piyeer a dakooxa o lay ee andee a Yeesu

²⁵ Simoŋ Piyeer o mat oxe raƭooxaa rek. O leng no we ndeeƭna fo ten a layaan ee: «Kaa fogiro no daalbe we no qoye?» A xaña, a lay ee: «Fogiim na den.»

²⁶ O leng no dag we no saasadax o maak oxe reeƭna o pog no qoyaa Piyeer a ɗeg’ina nof naa a layaan ee: «Mee ndax ga’aaxoong fo ten kam a ƭing alaa?»

²⁷ Piyeer a dakooxa o xañatiloox, too ndak fo ndak a siik a laya.

Yeesu mbaambir Pilaat

²⁸ A inoorta maa Kayif fa Yeesu, soo a ndet no xeloorand olaa, refna ref me gofornoor fee a genoogna. Mbeet naa a xoola, too den Yaawuur we koy mbad’ee kam faa, yaam a mbañaa soɓe a daawit a den no xeloorand olaa, a yaqan a den da ñaam njaw ne na bes fee na Colandax ale.

²⁹ Naaga, gofornoor Pilaat a sutooxiida, a lay a den ee: «Xar nu njambaa oxeeke?»

³⁰ A ndoonaan ee: «A reeƭangee o piifi paaxeer, i ƥisiidkoogiran me wo.»

³¹ Took kaaga, Pilaat a laya a den ee: «Ƥiseenoo ngate’tin ne a ƭat nuun a simtituuna.» Yaawuur we a layaan ee: «Kaa i nqañtel a bar o kiin.»

³² Naaga fa lay fee Yeesu a lay’ina a fadnoortu, ye ta lalitna ne ta xonitkaa.

³³ Pilaat a roka no xeloorand olaa, a xoy a Yeesu, soo a layin ee: «Ndax wo refu o maad oxe no Yaawuur we?»

³⁴ Yeesu a doonaan ee: «Koo xalaatanin a xoox of, ndi lakas layong o ten?»

³⁵ Pilaat a doonaan ee: «Mi yii? Kaam ref o Yaawuur! Mee ndax xeet of fo saasadax maak we ngoƥattong me mi! Mi kañ, kaam laamtang ke fi’oona.»

³⁶ Yeesu a doonahinaan ee: «Maat es inooree na adna feeke. Maat es a inoor’angaa na adna feeke, dag es a nqire’kooga, ndax ɓoxotkaandeem Yaawuur we. Kaa koy, maat es inooree na adna feeke.»

³⁷ Pilaat a layaan ee: «O maad refo boog?» Yeesu a doona yee: «Ne’aano boo ƴut, o maad refum tigi. Kaam rimel, gar na adna fee, ndax um seede’anaa ndigil ne. Oxuu fogna no ndigil ne kaa nan-gilooxaa o ñuxur es.»

³⁸ Pilaat a layaan ee: «Xar refu ndigil?» Cinj kaaga, Pilaat a sutooxahina, a ret maa no Yaawuur waa. A gara, a lay a den ee: «Ga’iim sik fa leng no kiin oxene.

Xan Yeesu a warel

³⁹ Ne andoona koy ee kaa nu njeg o mbaax onqaa layna yee na Xew fee na colandax ale, o leng no we ƥekeena kaso a sutel, ndax nu mbuga um xaƴan a nuun o maad oxe no Yaawuur we?»

⁴⁰ Maaga, a mbuuqa yee: «Ba xaƴin, xaƴi a Barabaas!» Barabaas koy, a cuut a maak a maak a reeƭu.