YEGIL MBAAX NE YEESU ne Saŋ a bindtuuna 17 - NQAARIIT NE ROOG

A qeƭ ale Yeesu

¹ Yaa Yeesu a layna neene boo a ƴut, a daxaaƴooxa na asamaan, a lay ee: «Faap, waxtu fee a fadiida! Ndiiki koy, ɓoxoti o Ƥeef o ndam, ndax ten itam ta ɓoxotong o ndam.

² Ci’aano sañ-sañ took pindel ke fop, ndax ta waag o coox we doxnanoona o ñoow o fagkeer ole.

³ O ñoow o fagkeer ole koy refu yee da andong, wo fee refna Roog fa leng fa ndigil fee, a and itam oxe luliidoona, ta ref Yeesu Kiristaa.

⁴ Ɓoxotaaxoong o ndam na adna fee, muuk calel ke sep’axamoona.

⁵ Ndiiki koy, Faap, ɓoxotaam o ndam onqe jeg’uuma a paam of, yaaga adna ferooxafulee.

⁶ Andnooraam gon of a ndeer no wiin we lasaxamoona na adna fee. Na xa ƥay of a ndeeƭu, o ɓoxotaam a den, da ngeek fa lay of.

⁷ Ndiiki, a andata yee ke cooxaxamoona fop na wo a hatu,

⁸ yaam daawnaam a den a ƭelem ake cooxaxamoona, too a njaɓa a den. A anda tigi yee na wo hatum, too a ngima yee wo luliidaxam.

⁹ Den um xeɗanaa. Xeɗaniim wiin adna we, ndaa we lasaxamoona um xeɗanaa, yaam wo jegu a den.

¹⁰ Kuu jeguuma wo a refanu, too kuu jegoona mi a refanu, too o ndam es a feeñta na den.

¹¹ Refatiim na adna fee, too den o mat, owe na adna fee. Ndiiki mexe garaa na wo. Faap fa Tedaan fee, koo xoxtiti a den doole fee no gon of, gon leene ci’axamoona, ndax da mbokatoor, a ndef o leng nen a in.

¹² Ye um refaa fa den na adna fee, kaam xoxtitoogu a den doole fee no gon of le ci’axamoona. Kaam gayoogu we lasaxamoona, too o leng na den ruuxee a koƥ, a refangee oxe war’ina o saŋkoox, ta jegit neen ndax a Pind a Tedu ke a mbadnoox.

¹³ Ndiiki koy, mexe hebooxaa me wo, maad o laytaa keeke na adna fee, ndax da may fo o ɗaay es.

¹⁴ Kaam coox a den fa lay of, adna fee a sib a den, yaam ne da mbogeerna na adna fee, ne fogteeruuma teen, mi itam.

¹⁵ Xeɗiim koy, ndax o sut a den adna fee, ndaa o saytoox a den no paaxeer oxe.

¹⁶ Ne fogteeruuma na adna fee, a mbogteeru teen itam.

¹⁷ Tedlandti a den ndigil of. Fa lay of refu ndigil ne.

¹⁸ Ne lultaxamoona na adna fee, neene lultum a den na adna fee itam.

¹⁹ Tedlandaam a xoox es yaam den, ndax da tedit no ndigil ne.

²⁰ Xeɗaniim a den, den soom, ndaa itam we na ngimkaa na mi yaam fa lay den,

²¹ ndax den fop da ndef o leng. Faap, ne reftoona na mi, um ref na wo, kaam xeɗaa da ndefit neen na in itam, ndax adna fee a mbaag o ngim ee wo luliidaxam.

²² Ci’aam a den o ndam onqe ci’axamoona, ndax da ndef o leng ne i ndefitna o leng,

²³ mi na den, wo na mi, da ndef o leng kut. Neene xan adna fee a and ee wo luliidaxam, a and itam ee fextaa a den, ne fextaxamoona.

²⁴ Faap, kaam bug muu refuuma we lasaxamoona a moof fa mi, ndax da nga o ndam es, refna onqe ci’axamoona, yaam kaa o fexaam yaaga adna ferooxafulee.

²⁵ Faap fa njofu fee, adna fee andirang, ndaa mi o mat, andaaxoong, too weeke a anda yee wo luliidaxam.

²⁶ Andnooraam a den gon of, too xam gen no andnooran, ndax o mbeq onqe fexaxamoona a ref na den, um ref na den.»