YEGIL MBAAX NE YEESU ne Saŋ a bindtuuna 15 - NQAARIIT NE ROOG

Ndaxar biiñ ne fo a naaq um

¹ «Mi refu ndaxar biiñ ndiindigil ne, Faap es a ref o yaal um.

² O par oluu saxna na mi, soo a fañ o rim, xan a ɗegin. Oluu na rimaa teen koy, xan a calasin, ndax ta moƴ o rim.

³ Me nu ndefna sax nu nqoola yaam fa lay fee nu nanitna na mi.

⁴ Saxyo na mi, um sax na nuun. Ne o par a waageerna o rimit, a refangee kaa sax no ndaxar, nuun itam nu mbaagee o saq xa tim, a refangee kaa nu sax na mi.

⁵ Mi refu ndaxar ne, nu ndef xa par axe. Oxuu saxna na mi, um sax no ten, xan a saq xa tim xa mayu. Um refangee fa nuun, nu mbaagoodee dara.

⁶ Oxuu saxeerna na mi, xan a deɓel tafil nen o par o ɗege, too xan a weer. A weerangaa koy, xan a deɓel na fiɗel, a doxik.

⁷ Nu saxangaa na mi, fa lay es a gen na nuun, nu mbaaga o nqeɗ kuu nu mbugna, too xan nu ci’el o ten.

⁸ Faap es xan a ɓoxotel o ndam, yaa nu mayna fo xa tim. Neene nu ndefitkaa daalbe es itam.

⁹ Ne Faap fee a fextaxama, fextum a nuun, yaaga koy, ngenyo no mbeq es.

¹⁰ Nu naangangaa o ngayaa kebil ke mi, xan nu ngen no mbeq es, yaam neene o mat gaytum kebil Faap es boo gen no mbeq um.

¹¹ Kaam lay a nuun keene, ndax o ɗaay es a dal na nuun, o ɗaay nuun a waag o ñak sik.

¹² Keeke koy refu kebil es: ‹Mbexrityo, ne fextuuma a nuun.›

¹³ O mbeq jolkee jaɓ o xon yaam qaariit of.

¹⁴ Qaariit es nu ndefu, yaa nu ndeefaa ke hebluuma a nuun.

¹⁵ Xoyatiim a nuun dag es, yaam o tag naagee o andaa dara no ke o yaal mbind um a bugna o fi. Kaam xoy a nuun xaariit, yaam layaam a nuun fop ke jangtuuma na Faap es.

¹⁶ Refee koy ee nuun njilaxam, ndaa mi jilu a nuun, doon teen dalin a nuun, ndax nu saqik xa tim, xa tim axe a ngen na nuun, ndax kuu nu nqeɗna a Faap fee no gon es, ta ci’in a nuun.

¹⁷ Ke hebluuma a nuun refu nu mbexir.»

Gimu we fo lakas we

¹⁸ «Adna fee a sibangaa a nuun, andyo yee mi a eetu o sib.

¹⁹ Nu mbog’angaa na adna, a fexkooga a nuun, yaam ke fogna fo ten rek a fexu, ndaa koy feek nu mbogee no ten, ndoon teen um jil a nuun, xan a sib a nuun.

²⁰ Mbetandooxyo ke layuuma a nuun ee: O tag hupkee o yaal mbind um. A ñagadilangaam, xan a ñagadil a nuun itam. Boo da ngayna a ƭelem es, xan a ngay ake nuun.

²¹ Gon es xan a tax da ndoon a nuun coono keene fop, yaam andee oxe luliidaxama.

²² Um layiid’angee fa den, njegkoogee bakaad, ndaa ndiiki, ye da andna ndigil ne, soo a mbañin o ndeef, njegkee qañatiloor.

²³ Sibaxama, a siba a Faap es itam.

²⁴ Um fi’’angee a ndeer den a pi akaa o leng a moseerna o fi, njegkoogee bakaad. Ndiiki koy, a nga’a a den boo a ƈut, soo a sibaam, a sib a Faap es.

²⁵ Keene fop kaa xew, a fadand ke lay’eena na mi kam a Pind a Tedu ke yee: ‹Kaa ndiy a sibaam.›

²⁶ Boo o Yaayaal oxe um luliidkaa me nuun, yaa retuuma maa na Faap faa a garna, xan a lalit oxe refuuma. O Yaayaal oxeene refu Yiif le saqna ndigil ne, too na Faap fee a hatu.

²⁷ Nuun itam, xan nu seede’ankaam, yaam naa ferum calel, nuun wey fa mi.»