YEGIL MBAAX NE YEESU ne Saŋ a bindtuuna 13 - NQAARIIT NE ROOG

Yeesu a ɓogana daalbe um a caf

¹ Yaa Xew faa na colandax alaa a faambnooxna, Yeesu a anda yee waxtu um a fadiida, ta war o inoor na adna feeke, a jof maa Faap um. Ne ta fexna wiin um we na adna fee, a fadnatina o mbeq um fa den.

² O ƈiƴ oxe koy, a ɓek’a no xeeñ Yudaa o Iskariyot oxe fee o ƥiy Simoŋ xalaat faa ta jikoorna a Yeesu.

³ Yeesu a and’a yee maa Roog a inooru, a wara o nomtoox maa ten. A anda itam ee Faap fee a doona fop na xa ƥay um.

⁴ Yaa da ndeerna, a nju’ooxaa, Yeesu a dalfooxa o inoox, a wol sabadoor um, soo a humnoox portir.

⁵ Cinj kaaga, a xafa foofi no ƥaxañ, a ref no ɓoganaa daalbe we a caf. Yaa ta ɓogna boo a ƴut, a watna ke ta humnoox’ina, soo a fortitin a caf ake boo da mbiis.

⁶ Ye ta fadiidna me Simoŋ Piyeer, oxeene a layaan ee: «Ca! O Yaal oxe, wo o mat o ɓogaa a caf es!»

⁷ Yeesu a doonaan ee: «Ke um fi’aa, waagafulino o and, ndaa ndiik ta feedatinooxong.»

⁸ Piyeer a layaan ee: «Waay, waay ɓogankiraamo a caf!» Yeesu a doonaan ee: «Um ɓogangee a caf of, fogkiro fa mi a las.»

⁹ Simoŋ Piyeer ee: «Yaaga koy o Yaal oxe, ne’iim a caf ake soom, ndaa ɓogi xa ƥay axe fo xoox le sax.»

¹⁰ Yeesu a layaan ee: «Oxe ɓogooxna boo a ƴut, ɓog a caf rek a soxla’u, ndax ta xoolatinoox boo qac, too nu nqoola, ndaa koy refee nuun fop.»

¹¹ A and’a xil oxe jikooxkooguuna, ten tax’u ta lay ee: «Nuun fop nu nqoolee.»

¹² Ye ta ɓogna a caf den boo a rokooxatin sabadoor um, a reerahina fa den, soo a lay ee: «Ndax ke fi’uuma a roka na qoox nuun?

¹³ Kaa nu nqoyaxam o Caajangin oxe fo o Yaal oxe. Nu mbi’a paax, yaam ten refum ndigil.

¹⁴ Yaaga koy, mi fee o Yaal oxe fo o Caajangin oxe, um ɓoganangaa a nuun a caf, nu mbara o ƥoganraa a caf itam.

¹⁵ Kaam halan a nuun a ƭat, ndax nu ndeef o jaf es, mbi’aa ne fi’anuuma a nuun.

¹⁶ No ndigil, mexe layaa a nuun ee: O tag hupee o Yaal um, ne’atiim o tuleer a hup oxe inuuna.

¹⁷ Nu andangaa keene, soo mbi’an koy, nu ƭaaya!

¹⁸ Refee koy ee nuun fop taxu um layaa, andaam we jiluuma. Kaa koy, kaa a Pind a Tedu ke a mbar o mbadnoox: ‹Oxe fogtooguuma o roon, a falaxam.›

¹⁹ Kaam layan a nuun yaaga tig xewafulee, ndax boo ta fadiidna, nu ngim ee ‹mi refu oxe refuuma›.

²⁰ No ndigil, no ndigil, mexe layaa a nuun ee: Oxuu dalinna oxaa luluuma, mi fa xoox es a dalnu, too dalnaxama, oxe luliidaxama sax a dalnu.»

Yeesu a yegnita yee xan Yudaa a hodin

²¹ Yaa Yeesu a layna naaga boo a ƴut, o njaaxɗand o maak a rokaan, boo ta lay a qool qac ee: «No ndigil, no ndigil, mexe layaa a nuun ee: Xan o leng na nuun a ɓoxotaam.»

²² Daalbe we a ƭeetra, o leng andee oxe ta ne’aa.

²³ O leng no daalbe we refna ref oxe Yeesu a fex’ina bo, kaa moof’u paam Yeesu.

²⁴ Maaga, Simoŋ Piyeer a caxa oxeene, ndax ta laamit a Yeesu yee: «An na in o ne’aa?»

²⁵ Oxe moof’ina paam Yeesu a ɗaara farna fo ten, a laamtin ee: «O Yaal oxe, an oo na in?»

²⁶ Yeesu a doonaan ee: «Oxe um suupankaa o ɗeg, cooxin oo!» Yaa ta suupna o ɗeg ole, a cooxaan a Yudaa fee o ƥiy Simoŋ o Iskariyot oxe.

²⁷ Yaa Yudaa a daawna o ɗeg ole, Saytaane a muura yiif um. Maaga, Yeesu a layaan ee: «Ke naroona o fi, fi’een no ñofu.»

²⁸ Kaa koy, o leng no we ndeer’ina fa den and’ee ke taxna ta layin a ƭelem akeene.

²⁹ Ne Yudaa a geekoogna xaaliis fee da njegoogna, a tax’a lakas we a mboogaa yee Yeesu kaa layin soom ee: «Jiki ke i soxla’na na xew fee», mbaat ta siman ta dimle teen rool we.

³⁰ Yaa Yudaa a jangna o ɗeg ole Yeesu a coox’uuna, a sutooxa, a soƥ tige a yengat.

Kebil nqas ne

³¹ Yaa Yudaa a sutooxna, Yeesu a laya yee: «Ndiiki o Ƥeenqe no kiin oxe a ɓoxote o ndam, Roog a ɓoxotel o ndam no ten.

³² A soƥangaa koy ee no ten Roog a ɓoxotte o ndam, xan Roog a ɓoxotin o ndam na xoox um itam, too miñkatee sax.

³³ Nuun we xa teɓandoong es, miñkatiim dara fa nuun. Xan nu mbaaƭaam, too ne laytanuuma Yaawuur we, mexe layaa a nuun itam ee: Nu mbaagkee o ndet me um jofaa.

³⁴ Mexe cooxaa a nuun kebil nqas: Fat nu mbexir! Kaam ee fat nu mbexrit, ne fextuuma a nuun.

³⁵ Boo nu mbexirna, xan fop a and ee daalbe es nu ndefu.»

Yeesu a yegnita yee xan Piyeer a xañatiloox

³⁶ Simoŋ Piyeer a layaan ee: «O Yaal oxe, mam o waajaa?» Yeesu a doonaan ee: «Waagiraamo o reefan ndiiki, ndaa i moofangaa boo taa, xan o waagaam o reefan.»

³⁷ Piyeer a layaan ee: «O Yaal oxe, xar waagu yaqan um reefanong ndiiki? Um waagong o wuusan o ñis es sax!»

³⁸ Yeesu a doonaan ee: «Xan o wuus o ñis of yaam mi? No ndigil, no ndigil, mexe layang ee: A siik laykee, too layiro boo a caf a tadak ee andiraamo.»