YEGIL MBAAX NE YEESU ne Saŋ a bindtuuna 11 - NQAARIIT NE ROOG

Fa nqon fee Lasaar

¹ A jeg’a oxaa jirna, too a ne’el Lasaar, a gen Betani. Mari fa Marta we ndeeƭna o maag fo ndeɓ itam, maaga a ngen’u.

² Mbaambir naa, Mari feene o mat na yipkaa o Yaal oxe ƭuumooxel, soo a fortit a caf um wiil le ten. O camin um Lasaar o mat jir’u.

³ Mari fa Marta a lulta maa Yeesu yee: «O Yaal oxe, oxe fexoona, oxaa jira.»

⁴ Yaa oxe luleena a retna maa Yeesu boo a layin kaaga, Yeesu a laya yee: «Jir leene xotiidee, o ndam Roog taxu ta gar. Kaam ee kaa gar ndax o Ƥeenqe Roog a ɓoxotel o ndam.»

⁵ Yeesu koy, kaa fex’u a Martayiin Lasaariin bo.

⁶ Yaa ta yegneena yee Lasaar kaa jir, retee ndak fo ndak. A moofa na saate faa ta soƥ’eena boo a jeg ñaal ƭik,

⁷ soo a sogkaa o lay daalbe um ee: «Aca koy, i nomtoox Yudee.»

⁸ Daalbe we a layaan ee: «O Caajangin oxe! Miñee dara aa-adax we no Yaawuur we a mbaaƭoogu maa da mbartoonga fo a kac, soo wo o lay ee i nomtoox Yudee!»

⁹ Yeesu a doona yee: «Ndax kaa ñaal muum refee baxtu xarɓaxay fo baxtu ƭik? Oxuu na ñaaƴaa njoloor, tolofkee, yaam a qoolaand ale na adna feeke na kid um a fodaa.

¹⁰ Oxuu na ñaaƴaa o yeng koy, ñakkee o tolof, yaam a qoolaand a leng widiran.»

¹¹ Yaa ta layna neene, a doona yee: «Xaariit in Lasaar kaa ɗaanaa, ndaa waraanum o yokik.»

¹² Daalbe we a layaan ee: «Ca, o Yaal oxe, a naagangaa o ɗaanaa kañ, xan a wod.»

¹³ Yeesu koy, fa nqon a ne’oogu, den o mat da mboog ee o ƭaan no xaa na tane’aa a ne’aa.

¹⁴ Maaga, a feedna a den ee: «Lasaar a ñaka.

¹⁵ Kaa koy, sawaraam lool yaam nuun, no ke reeƭeeruuma maaga ye ta xonna. Xan nu mbaag o ngim tigi. Acayo, i ndet maa ten.»

¹⁶ Maaga, Tomaa fee lastitoogeena Didiim, a laya daalbe lakas we yee: «Aca, i nqonik fo ten boog fe.»

Yeesu refu a qontax fo o ñoow

¹⁷ Yeesuyiin a mbadiida, a soƥ Lasaar a xon boo a jeg ñaal nahik na mboy.

¹⁸ Betani koy, goƭ’ee a Yeerusaleem lool. Ndeer den fad’ee kilomeet tadik sax.

¹⁹ Ten tax’u Yaawuur mayu a ngara, a njaapiid a Marta fa Mari o camin den oxe ñakna.

²⁰ Yaa Marta a nanna yee Yeesu oxe garaa, a ƴufa a xetookin, Mari o mat, a yoq no mbind naa.

²¹ Marta a laya a Yeesu yee: «O Yaal oxe, o reeƭangaa meeke, o camin es xonkoogee.

²² Kaa koy, me i ndefna sax, andaam ee kuu xeɗoona a Roog, ta ci’ong o ten.»

²³ Yeesu a layaan ee: «Xan o camin of a xontoox.»

²⁴ Marta a doonaan ee: «Andaam ee xan a xontoox no ñaal mbalakaand naa kañ.»

²⁵ Yeesu a layaan ee: «Mi refu a qontax fo o ñoow. Oxuu gimna na mi a ñoow, a xonangaa sax,

²⁶ too oxuu na ñoowaa, a gim na mi, xonkee muk. Ndax gimaa kaaga?»

²⁷ A layaan ee: «Ii, o Yaal oxe, gimaam ee wo refu Kiristaa fee, o Muumucil oxe regteena, o Ƥiy Roog onqe war’ina o gar na adna fee.»

Yeesu a loola

²⁸ Yaa Marta a layna naaga, a reta, a xoy a Mari fee o ndeɓ um na pet, soo a layin ee: «O Caajangin oxe a fadiida de. Oxe laamtang sax.»

²⁹ Yaa Mari a nanna kaaga, a naaga daket a inoox, a ret maa Yeesu.

³⁰ Yeesu rokiid’afulee kam saate fee. Maa Marta a waas’uuna a reeƭu.

³¹ Yaa Yaawuur waa yaalooguuna kam mbind naa a nga’na a inax a ñofu laa ten, a mboog’a yee kaa loolkaa no poy kaa. A ndalfooxa o inoox, soo a ndeefanin.

³² Yaa Mari a fadiidna maa Yeesu, a dalfooxa o yen na caf um, a layin ee: «O Yaal oxe, o reeƭangaa meen, o camin es xonkoogee.»

³³ Yaa Yeesu a ga’na Mariyiin Yaawuur weyiin a loolaa, cer um fop a naanga dayum, ta gooy bo.

³⁴ A laamta a den ee: «Mam nu ngeeku o dal ole?» A ndoonaan ee: «O Yaal oxe, gari ga!»

³⁵ Yeesu a naaga ɓusiid, a lool.

³⁶ Yaawuur waa a laya yee: «Ƭeetyo rek ne ta fexit’uuna!»

³⁷ Leng-leng na den a laya yee: «Ten fee ga’noorna fuul, ndax kaa waag’ee o fi boo o qoye xonkee?»

Lasaar a xontooxnoore

³⁸ Cer ke Yeesu a ndakooxa o naang dayum, ta xot a ƭat, a waaƭooxanik poy kaa. A mboy alaa luf a reeƭu no ɓil maak, a wegtel ɓil lakas.

³⁹ Yeesu a laya yee: «Mbatinyo ɓil le.» Marta fee o cigeen no xe ñakna, a layaan ee: «O Yaal oxe, a wara o xooñataa de, yaam a jega kam fee ñaal nahik.»

⁴⁰ Yeesu a doonaan ee: «Kaa layiroong ee o gimangaa, xan o ga o ndam Roog?»

⁴¹ Ɓil laa a dalfooxe o watin, Yeesu a daxaaƴoox, a lay ee: «Faap, mexe gidmang, yaam jaɓaa a qeƭ es.

⁴² Andaam ee mosiraamo o fañan tig. O nanangaa um lay, lakas we ndefna meen taxun, ndax da mbaag o ngim ee wo luliidaxam.»

⁴³ Yaa ta layna kaaga boo a ƴut, a doona teen a maak ee: «Lasaar, sutooxiidi!»

⁴⁴ O qon oxe a sutooxiida, a caf ake fo xa ƥay axe a saawel njoor boo na mukit fee. Yeesu a laya yee: «Murteenoo, nqaƴin ta ret!»

Yaawuur we owe mbaaƭaa o mbar a Yeesu

⁴⁵ Mayu no Yaawuur waa mboytiid’ina a Mariyiin, a nga’a ke Yeesu a fi’’ina, too a ngima no ten.

⁴⁶ Kaa koy, leng-leng a ndeta maa no Farisiya waa, a mbetandoox a den ke Yeesu a fi’’ina.

⁴⁷ Maaga saasadax maak we fo Farisiya we a ndalfooxa o mbokat Mal maak ne den, a lay ee: «Xar i mbi’kaa ndiiki koy? O kiin oxeeke, oxe fi’aa xa anddiloor xa mayu de!

⁴⁸ I nqaƴangaan no ke ta fi’aa, xan fop a ngim no ten, too yaaga xan Roorom we a ngef teeru fee, a tas xeet fee.»

⁴⁹ Kayif fee reeƭna o saasadax o maak no hiid olaaga a laya a den ee: «Nu nga’ee tiye a qool qac.

⁵⁰ Ndax nu mboogee yee o leng kut a xonan xeet fee boo xeet fee duguñkaand moƴu?»

⁵¹ Layit’ee a ƭelem akeene o ƥor. Ne ta reeƭna oxe adooxanna saasadax we fop tax’u Roog a riñin ta yegnit yaaga yee Yeesu a wara o xon, ndax xeet fee a muc.

⁵² Reeƭee koy soom yaam xeet fee, ndaa ndax xa ƥiy Roog axe pictoorna a nqurel, a ndefat xeet fa leng koŋ.

⁵³ No kaa xotitna no ñaal naaga, a ngebooxa o mbarin.

⁵⁴ Kaaga tax’u Yeesu ñaaƴoogatee kam Yudee maa wiin we a nga’tuuna. A dalfooxa o inoor maaga, a genik maa matna a koƥ-a-ƥor alaa, no mbiñ onqaa ne’eena Efrayim, ten fo daalbe um.

⁵⁵ Xew fee na colandax ale a matiida, wiin mayu a ndet Yeerusaleem, a ƥogdinook.

⁵⁶ Kaa mbaaƭoogu a Yeesu kam Mbind Roog ne, a layaa yee: «Ndi nu mbooga yee xan Yeesu a gar na xew fee?»

⁵⁷ Saasadax maak we fo Farisiya we kaa ngebil’u yee o kiin a andangaa me Yeesu a refna, fat a layin, ndax da ndamin.