YEGIL MBAAX NE YEESU ne Saŋ a bindtuuna 10 - NQAARIIT NE ROOG

O kaynaak fo paal um

¹ «No ndigil, no ndigil, mexe layaa a nuun ee: Oxe naageerna o reeftaa ged no ndokand ne, ndax a ñoƴaa o gur, o kuuɗ oo. Kaam ee a cuut a maak oo.

² Oxe andoona koy ee no ndokand ne a reeftaa refu o kaynaak oxe.

³ Xan oxe fe’iidna a xaƴin ta suur, too paal ke a andda o ñuxur um. Kaa taaraa no gon mbaal nuu refna, a ɗox a den da sutoox.

⁴ Boo andoona koy ee a suta paal um fop, kaa adooxaa, da ndeef, yaam a anda o ñuxur um.

⁵ Ndeefankee o kenar. Kaa nqofaa no ten bo, yaam andee o ñuxur um.»

⁶ Yeesu a naxooxa a den keene, ndaa and’ee ke ta tekitna.

Yeesu, o Kaynaak o paax oxe

⁷ Yeesu a dakooxa o lay a den ee: «No ndigil, no ndigil, mexe layaa a nuun ee: Mi refu ndokand ne no paal ke.

⁸ We adooxiidaxama fop, guuɗ fo a cuut oo, ndaa koy paal ke nan-gilooxee a den.

⁹ Mi refu ndokand ne. Rokitna na mi, xan a muc. Xan a rok, a sutoox, too xan a jeg o suufand.

¹⁰ O kuuɗ, nguuƭ fo a bar fo yaq na inan. Mi koy, kaam gar, ndax paal ke mi a njeg o ñoow, a njegin ta dey sik.

¹¹ Mi refu o kaynaak o paax oxe. O kaynaak o paax kaa cooxtaa o ñis um yaam paal ke ten.

¹² O gaylooƥe le andoona yee jegoodee paal ke koy, oxaa ga’aa o moon a garaa, ta ƴuf a xaƴ paal ke, too maaga xan o moon ole a war leng ke, ke yoqna a pasaroox.

¹³ O gaylooƥe le, o nanangaa ta ƴufaa, kaa jegoodee paal ke, too ngaaliran lool.

¹⁴ Mi koy, mi refu o kaynaak o paax oxe. Kaam and paal ke mi, da andaam,

¹⁵ ne andtuuma a Faap fee, Faap fee a andaam. Kaam cooxtaa o ñis es yaam paal ke mi.

¹⁶ Jegaam koy paal lakas kaa ndefeerna no ged leeke, too waraam o xotiid a den. Xan a nan o ñuxur es, ged leng kut a jegat, da mbog o kaynaak o leng koŋ.

¹⁷ Faap fee kaa fexaam, yaam ne naruuma o ɓoxot o ñis es, jangatinin.

¹⁸ O leng suqtiran na mi, mi o mat na cooxtan no fud-o-letu. Jegaam sañ-sañ faa cooxtitanuuma fa sañ-sañ faa jangtanuuma: Keene mat refu ke Faap fee a heblaxama.»

¹⁹ Yaawuur waa a nqaajoorahina yaam a ƭelem akeene.

²⁰ Mayu na den kaa layoogu yee: «Oxene kat, jini damun! Yoonee fo yiif um. Ndi xar taxu nu nan-gilooxan?»

²¹ Lakas we a layaa yee: «A ƭelem akeene ndefee a ƭelem no xaa jini a damna. Ndax jini a waaga o ga’noor o puul?»

Yaawuur we a mbesa a Yeesu a cinj

²² Ƈiid naa a fadiida, a jopir Xew fee na barke fee no Mbind Roog ne Yeerusaleem a roofandeel.

²³ Yeesu a foƭtooga a caf um kam Mbind Roog ne ɗuga jibir Salomo.

²⁴ Aa-adax we no Yaawuur we a ngara, a ndeerin, soo a layin ee: «Ndi boo a mban o bugko jaageejnooraa a in? A soƥangaa kañ ee wo refu Kiristaa fee, o Muumucil oxe regteena, layeen a in a qool qac!»

²⁵ Yeesu a doona a den ee: «Um layin a nuun, nu ngimiran! Ke fi’uuma no gon Faap es a lalta a qool qac oxe refuuma,

²⁶ ndaa koy, nu ngimee, yaam nu mbogee no paal ke mi.

²⁷ Paal ke mi kaa nan-gilooxaa o ñuxur es. Andaam a den, too a naangaxam o ndeefaa.

²⁸ Kaam ci’aa a den o ñoow o fagkeer ole, too saŋkooxkee muk. O leng suqitkee a den no ɓay es.

²⁹ Faap es fee ci’axama a den hupu fop, too o leng waagee o suqtit a den no ɓay Faap es.

³⁰ Mi fa Faap fee o leng i ndefu.»

³¹ Maaga, Yaawuur we a ndakooxa o kaf a kac, a mbugin o mbar.

³² Yeesu a laya a den ee: «Fi’aam mbaambir nuun a pi a paax a mayu, da ngat na Faap fee. Alum na pi akeene taxu nu mbugaam o mbarit a kac?»

³³ Yaawuur we a ndoonaan ee: «A pi a paax taxee i mbugong o ndoom a kac, ndaa yaam wen le wenoona. Woxey refa o kiin, soo fi’ooxaa Roog.»

³⁴ Yeesu a doona a den ee: «Ndax no kebil ke kaa bindaand ee: ‹Kaam ee roog nu ndefu?›

³⁵ A layange kañ ee we fa lay fee Roog a doxneena roog a ndefu, e too a pind ake mbaagaand o sañit,

³⁶ yaaga oxe Roog a kesna, a luliidin na adna fee a layangaa yee: O Ƥiy Roog refum, nu mbariran o lay ee: Wenaa a Roog.

³⁷ Um fi’angee a pi Faap es, ba nu ngim na mi.

³⁸ Kaa koy, a soƥangaa yee a pi um saqum, koo nu ngimangiraam oo, ngimyo a pi akeene, ndax nu mbaag o nga xil ee Faap fee oxe na mi, mi, um ref no ten.»

³⁹ Maaga, a ndakooxa o mbaaƭaa maa da ndamtuuna, ndaa a ɓostooxa a den.

⁴⁰ A inoora maaga, a ret kaltaa Yordaan, maa Saŋ a eet’ina o batiise’taa, soo a moof maaga.

⁴¹ Mayu a ngara no ten, a layaa yee: «Saŋ o Paabatiise xe fi’ee o anddiloor o leng, ndaa fop ke ta layna no kiin oxeeke ndigil kak oo.»

⁴² Maaga, mayu a ngima no ten.