Hoose 8 - NQAARIIT NE ROOG

Oxuu duufna nqeñ, a saxad a und

¹ O Yaal oxe kaa tee: «Jibni a tuluɓ ale! O njakad onqey yaaraa took Mbind es nen a canjiik, yaam xeet es kaa ƭeg ngiɓoor es, a mbañ a cangin es.

² Owe mbalalooxaxam ee: ‹Roog in, i andaang, in Ii-isra’el we.›

³ Isra’el kaa pilid ke faaxna, ten taxu xan o pañ oxe a daabin.

⁴ Kaa ndalnaa maad, too asooxkiraam, a njilaa kelfa, too yegkinum. Kaa njalnaa pangool fo qaaliis ke den fa wurus fee den, a qicaa took den a saŋkax.

⁵ Nuun Saasamari we, ndeɓ o nqeel wurus onqe moƴ’u na nuun. Fuux es a biltooxana a nuun. Kaa nu nqoolaƭarkaa boo a mban?

⁶ O nqeel onqe Isra’el a inooru, too refee Roog. O kiin o baane’u rek jalun. Ten taxu o nqeel onqe Samari xan a fi’el xa ƥek xa ƥek.

⁷ Feek nqeñ a nduufu, a und a saxadkaa. Bele fa njegee xa yaƥ watkee mbiɗel, too lanq ke a mbatangaa tig sax oo, wiin jan na muudoorkan.

⁸ Isra’el a ɗuude salquƈ. Oxey ndiiki a ndeer qeet ke, nen o ƥaxañ olaa o leng a bugateerna.

⁹ Isra’el kaa ƴufanaa Asuur nen o faam-a-koƥ olaa berooxna, Efrayim a jiktaa mbugir ne neexil.

¹⁰ A mbug oo nger qeet ke, ndaa xam fokat a den ndiiki, too miñkatee dara xan a coono yoora ndoq ne no maad oxe no gelwaar we.

¹¹ Nuu Efrayim a moƴna o maxtaa xa sadaxand axaa ta ɓoxottaa sadax fa mbaasnoor pakaad, kupun a jegtaa fo mbiñ naa ta bakaadtaa.

¹² Um bug oo jaqtanin a cangin es, bindanin o ten, ndaa xan a ɗeetin nen tig kenar.

¹³ Xeet fee Isra’el kaa mbaraa muumeen kaa da sadaxaxam, soo a ñaamaa a tegeƴ ake, ndaa jaɓiim a den, mi o Yaal oxe. Ndiiki koy, wetandooxaam tooñ den too xam xaw a den yaam pakaad den. Xan a nomtoox cook Misira.

¹⁴ Isra’el a weecta o saasak um soo a maxin pind no maad, Yudaa a mayƭand teeru saƭku koŋ ke, ndaa xam hebliid fiɗel kam teeru ke den, soo ta raaɓ pind mosu ke den.»