Hoose 4 - NQAARIIT NE ROOG

Layoor ne ndeer Roog fa xeet fee ten

¹ Nuun Ii-isra’el we, nan-gilooxyo fa lay fee no Yaal oxe. O Yaal oxe a jega fa nuun layoor, yaam o damax fa yirmande fo o and a Roog njegee kam saax le.

² Lakas refee teen kaa jolna a kaañ fo ƈiƴtir, barir fo kuuƭ, ceeq fo a ƭom-yedar fo boom took boom.

³ Ten taxu saax le xan a wootat, fop we ngenna teen a ŋeesoox, den fo muumeen-a-koƥ ke fo tiiƭ ke. Liƥ ke no maag ole sax xan a sooƴ.

O ngod onqe no saasadax we

⁴ O Yaal oxe kaa tee: Refee koy ee oxuu refna ware o xasan mbaat ta ɓanjel, ndaa wo, o saasadax o maak oxe o mat, um layoorkaa.

⁵ Xan o tolof njoloor o mbuc, o tuleer oxe itam a tolof fa wo o yeng ole, too xan o saŋiknoor a Isra’el fee ya of.

⁶ Xeet es owe saŋkooxaa took o ñak-o-and. Feek kaa o deɓ o and ole, xam raxong no calel no saasadax es. Ne weectoona a cangin es, mi Roog of, mi itam neene um weecitkaa xa ƥeef.

⁷ Saasadax we fop ne mbodeena a tooñaxam. Xam supit o ndam den gaci.

⁸ Sadax fa mbaasnoor bakaad fee na xeet es a ñoowtaa, ten taxu da mbug xeet fee a moƴ o mudaa na bakaad.

⁹ Ke na dalkaa saasadax we na dalkaa dal a xeet fee. Xam inooxan a den yaam a pesoorooƭ den soo rabid a den a pi den.

¹⁰ Xan a ñaamaa too ngiñkee, a njaga’aa, ndax da njeg xa ƥiy, ndaa taxkee da njeg. Keene fop xan a dal a den, yaam kaa mbañaam o niw, mi o Yaal oxe.

¹¹ Njaga ne fa biiñ fee kaa ngulmandaa.

¹² Xeet es kaa nga’raa fo xa taaƴ den, too o loq den na feeñlaa a den ke da mbarna o mbi. Yiif njaga kaa mo’andaa a den, da nqaƴaam, a mbaɗooxaa roog lakas, nen o tew oxaa soobooxna no njaga.

¹³ Kaa sadaxtaa took xa cul axe na xa coong axe, a ndoxaa cuuraay took a ñaang ake, ɗuga ngariñ, poopilye fo mbudaay, yook den a ƥuuɓna yem. Ten taxu xa ƥiy xa tew axe nuun xan a njaga’ik, rew we na xa ƥiy nuun a seeqaa.

¹⁴ Jambkiim xa ƥiy xa tew axe nuun yaam ne da njaga’aa mbaat seemir we nuun yaam ne da seeqaa, yaam goor we fa qoox den na mbootkaa fo a caga ke, a sadaxtaa fo rew we kesaneena njaga ne nu ƭeetaa nen tedu, ne o feƭit oleeke a laytuuna yee: ‹Xeet fee jegeerna o and kaa mo.›

¹⁵ Wo Isra’el, o jimbooxangaa no njaga, baa Yudaa a xawnoor a xoox um, yaa ta fi’na leng kut ke. Ba nu ndet Gilgal, kaam ee ba nu ndet boo Bet-Awen, ndaaɓoorit maaga yee: «Ne ta wooritna yee o Yaal oxe xe ñoowaa!»

¹⁶ Feek Isra’el kaa ɓoow boo nen naak faafañ, o Yaal oxe xaƴkiran ta jeg a xoox um nen mbaal kam xa suufand xa yaaju.

¹⁷ Efrayim a hiɓoora fo pangool ke. Xaƴeen!

¹⁸ Den fa ƈuteeru a yer rek, yaqanu da njimboox no njaga, too gaci moƴanu a den o niwel.

¹⁹ Nqeñ ne xan a maƥ a den, too xan a sed ɓot yaam sadax ke den.