Hoose 3 - NQAARIIT NE ROOG

O tew oxe a ɗeetlooxe

¹ O Yaal oxe a layaxam ee: «Retahini, o bugir fo o tew oxeene jegna xa pes too a seeqaa. Bugteen ne bugtuuma Ii-isra’el we, mi o Yaal oxe, ke da ngeleerooxaa farna fo roog lakas ke fop oo, a mbex o ƥoxotaa a den xa kaf xa tim biiñ.»

² Wattaanum boog xa monjong xarɓaxay fo xa monjong xa ƥetaq xaaliis fa nqoolu fo kilo teemeed ɓetuu fa leng lorso.

³ Layaanum ee: «Xan o moof fa mi a pe a miñu kaa jaga’keeroona, bugirkiro fo o koor o leng, too mi yoo yoonkiim fa wo.»

⁴ Ii-isra’el we xan a moof a pe a miñu kaa da njegkeerna o maad fo o aa-adax, sadax fo a ƥil akaa da mbaɗooxaa, o jamb fo nitaal pangool ke.

⁵ Cinj kaaga, Ii-isra’el we xan a ngeleeroox, a mbaaƭ o Yaal oxe Roog den fo o ndaan onqe Dawid fee o maad den. Xan a sendaa, yaa da matiidaa o Yaal oxe fo o paaxel um no camaane ke na ngaraa.