Hoose 2 - NQAARIIT NE ROOG

Yaakaar ne Isra’el

¹ Yaag oo toox de, Ii-isra’el we xan a mos o mayit nen pep lanq na ƥeeraamb o maag, mbaagaandeena o eed mbaat da limel. Me da layteel ee: «Nu ndefee xeet es», xan a layel ee: «Xa ƥiy Roog fa ñoow jok fee.»

² Yudaa fa Isra’el xan a mbokatoor, a mbog o aa-adax o leng kut soo a ngame saax le, yaam ñaal ne Yisre’el xan a magin lool.

³ Layyo fog faap goor we nuun ee: «Nuun ndefu ‹xeet es› », soo jigeen we nuun, nu lay a den ee: «Nuun ndefu ‹we fexuuma›.»

Isra’el kaa nand fo o tew o tamooxeer

⁴ O Yaal oxe kaa tee: «Xa ƥees, layooryo fa ya nuun, kaam ee nu layoor fo ten, yaam refatee o tees, too mi yoo refatiim o kor um! Fat a watin na mukit um xa anddiloor njaga um, soo no ƭeen ke ten, ta watin xa anddiloor ceeq um!

⁵ Mbaat toox xam wolin ƭuc, fi’in nen bes faa ta rimeena, nandandin fo a koƥ-a-ƥor ale. Xam fi’in ta refat nen lanq beeru koroŋ, a xonaa fo a koɗom.

⁶ Yirimkiim xa ƥiy axe ten, yaam xa ƥiy xa timte no njaga a ndefu.

⁷ Ya den kaa jaga’aa, oxe fudna a den kaa fi’aa cednooxu. Kaa layaa yee: ‹Xam reefan xa pes es axe na cooxaxam ñaamel es fo yerel es, fale es fa gaare es, diwliin es fa biiñ es.›

⁸ Ten taxu xam wegit a ƭat um taxas kiƈ, widnin o ɗiiɗing, ndax suurkee na ƭat um.

⁹ Xan a daab xa pes um, ndaa daawkee a den. Xan a waaƭ a den, ndaa ga’kee a den. Cinj kaaga, xan a lay ee: ‹Xam nomtoox maa no kor o eetaand es, yaam yaaga moƴ’um o ɗaay ee ndiiki.›

¹⁰ O tew oxeene and’ee yee mi cooxoogun bele fee fa biiñ fa nqas fee fa diwliin fee. Mi ci’’un xaaliis fee fa wurus fee, soo ta fi’tin xa taaƴ axe Baal.

¹¹ Ten taxu ci’katinum bele yaa fo a saxad fa biiñ fa nqas na waxtu a nir ale, too xam jaɓ fale es fa gaare es mbar’ina o sing cer ƥor um.

¹² Ndiiki koy, xam wolin ƭuc na kid na xa pes um, too o leng yaqankiraam o fi’in.

¹³ Xam xuuf ke na felakinan fop, refna toofeen ke ten fo pumbaay ke ten no fo nqool fo ndeɓ ne, pes a ñootnax ke ten fo qew ke ten fop.

¹⁴ Xam fiitin a ƭing taxar biiñ ake ten fo tun ke ten, ta layoogna yee: ‹Ndabid ne xa pes axe mi a cooxaxama yoo.› Xam supit a den suungaan, soo muumeen-a-koƥ ke a nduudin a den.

¹⁵ Xam inooxanin yaam ñaal ke ta cuuraayoogna a Baaliin, a mosandoortaa xa keɗ um fo ceq um. Kaa reefoogu xa pes um, soo mi o mat, ta weecaam. Mi o Yaal oxe layun.

¹⁶ Ten taxu xam naxin, ɓisin na koƥ-a-ƥor alaa soo lay fo ten na yelem.

¹⁷ Maaga um ɓoxotitkan a ƭing taxar biiñ um soo supit a yulanq Taamaala le o don-maax yaakaar. Maaga a jaaɓitkaa nen ye ta roogaa, nen a koom alaa ta sutoorna Misira.»

Bes fee no njofooratin ne

¹⁸ «A koom, xan a xoyaam ee: ‹O kor es›, too xoykatiraam ee: ‹Baal fee mi.› Mi o Yaal oxe layun.

¹⁹ Xam ñuf no don um a kon ake Baaliin. A kon den ne’kataand sax.

²⁰ A koom, xam dalnan a den ngiɓoor fo muumeen-a-koƥ ke fo tiiƭ ke fo ƥood ke no lanq ke. Xam ɓol kam saax le a qali le fo laƥ ne, ndax xire jibkatee, soo fi da ngen no yaadax.

²¹ Xam bugir fa wo, o refanaam boo kili, kaam ee xam bugir fa wo no cofel fo na ƭat, no damax fo no mbeq.

²² Xam bugir fa wo no ngor, too xan o andaam, mi o Yaal oxe.

²³ A koom xam jaaɓ a asamaan fee, asamaan fee a jaaɓ lanq ke,

²⁴ lanq ke a njaaɓ bele fee fa biiñ fee fa diwliin fee, soo weene a njaaɓ a Yisre’el. Mi o Yaal oxe layun.

²⁵ Xam duufan a xoox es a Yisre’el kam saax le too xam fex a ‹Loo-Ruhama›, lay a ‹Loo-Ami› yee: ‹Wo refu xeet es›, soo ten oo, ta layaam ee: ‹Wo refu Roog es.› »