Hoose 13 - NQAARIIT NE ROOG

Ke siiknoor ne Efrayim fa Roog a rimkaa

¹ A mbanuu a carind ale Efrayim a lay’ina, a carind a lakas ake fop a ndiid. O ten doon’u o ɓay kam Isra’el, ndaa a qica hate took um boo a yen, yaam a faɗooxaa a Baal.

² Ndiiki koy, owe maad o mbakaadaa. A njalna o daaƴ o jawne fa xaaliis fee den, pangool kaa da nqalaatanna a qoox den. Fop kaa ndef kaa o kiin o baane’u a jalna. A laye kaa jofna na Efrayim ee: «Kaa da sadaxtaa wiin, a mboonaa fo nqeel!»

³ Ten taxu yoo xan a sooƴ nen eel nqes, nen a liim ale na yenaa no njeeƈ-tanqin, nen ñaax yelefu le na yetaa maa goƭna cukand ne, nen fo suun ole na sutooraa no bomb le.

⁴ O Yaal oxe kaa tee: «Mi refu o Yaal oxe Roog nuun sutitna a nuun Misira. Nu andee a roog fa lakas faa jolna mi, too jegee o Muumucil oxaa refeerna mi.

⁵ Mi, topatooxaam a nuun kam a koƥ-a-ƥor alaa, no lanq beeru koroŋ.

⁶ Kaa koy, ye nu mbadiidna na xa suufand xa quƥu sap axe, nu ñaama boo ngiñ, kaam ee nu ñaama boo ngiñ, xeeñ nuun a magnandoox soo nu mbeecaam.

⁷ Xam ref na nuun nen njogoy, nen o ƴaxal olaa na ɓeedaa a nuun na ƭat.

⁸ Xam song a nuun nen ursu ndew naa xa ƥeem a ngifeena, too xam faar xoor le no ngang nuun. Xam lisit a nuun nen njogoy ƥasil, soo ƥaaɓaan ke na koƥ ale a sir a nuun.

⁹ Wo Isra’el, ke na saŋkang refu yee kaa o siiknoor fa mi, siiknoor fo xe waag’oonga o ƴufig.

¹⁰ Taa o maad of boog? Fat a muclong kam teeru ke wo fop! Taa haahate of we lay’oona yee: ‹Cooxaam o maad fo gelwaar?›

¹¹ Ci’aaxoong o maad kam fuux es, ndaa xam jaɓin na wo kam ngañak es.

¹² Njofaƭar ne Efrayim a geeke a paax, bakaad um a damel.

¹³ Xa ƭomel gaaj xan a ngar took um, ndaa kaa nand nen o ƥiy onqaa andoona yee, na hap um sutooxee no fud ya um.

¹⁴ Ndax xam suqit a den na katil fee jaaniif, wat a den na fa nqon fee? Cey fa nqon, taa taamaala of? Wo jaaniif, taa yaq fee wo? Kaam koon yirmande fee.

¹⁵ Efrayim a bug oo neep nen ndaxar a ndeer no fog um, ndaa nqeñ ne no batand xan a gar, buuƭ ne no Yaal oxe a yoɗoor na koƥ-a-ƥor ale. Xan a ŋiisin kas ke ten, a weerin a cur ake ten, kalal ke ten fo tig oo tig cegu njiriiñ ke ten fop a mbaltel.