Heseki’el 8 - NQAARIIT NE ROOG

Pangool ke kam Mbind Roog ne

¹ No hiid o ɓetuu fa lengandeer ole, no ñaal ƥetkandeer ne no nqool o ɓetuu fa lengandeer onqe, moof’aam kam mbind es, too maak we Yudaa a moof’u mbaambir es, o ɓay no Yaal oxe na refkaa boo faw a doonooxa took es.

² Ɗeetaam, too ga’aam kaa na nandtaa o kiin, ke xotitna no ke nandtoogna ndet um boo a lanq a ref fiɗel, soo ke xotitna no ndet um a jof took a jeg’a nen meleƈ xanjar laa na miric-miricnaa.

³ A letna kaa saxitna nen o ɓay, a pok joƥ wiil no xoox es. Yiif le a gifaxam, a yoɗaam ndeer asamaan fo lanq, soo a ɓisaam Yeerusaleem no peeñil katu na Roog, farna fo ndokand ne no don-maax kam ole faambirna fo o ɓemb-roog o janoon, me nitaal roog fa naalu fee a sipeena, ten oxe na gartaa naal ne.

⁴ A jeg’a maaga o ndam onqe na Roog fee Isra’el nandtoogna mbeeñil ne ga’uuma na yulanq alaa.

⁵ A layaxam ee: «Wo fee o ƥiy no kiin, yoɗi a kid of farna fo ɓemb-roog o janoon!» Yoɗaam a kid es farna fo ɓemb-roog o janoon, too no saax o janoon ole no don-maax ole na ɓisaa no sadaxand ole a jeg’a nitaal roog fa naalu.

⁶ Roog fee Isra’el a layaxam ee: «Wo fee o ƥiy no kiin, ndax ga’aa ke da mbi’aa, cednooxu maak ke mbind Isra’el a mbi’aa ndax um goƭ Mbind tedu ne mi? Kaa koy, xan o ga’ahin cednooxu maak lakas.»

⁷ Maaga, a ɓisaxam no ndokand naa no maax ole. Ɗeetaam too ga’aam o yul no tabax ne.

⁸ A layaxam ee: «Wo fee o ƥiy no kiin, ɓaati o yul ole!» Gefaam tabax ne, too a fi’a o gur.

⁹ A layaxam ee: «Roki too ga qoolaƭaru paaxeer ke da mbi’aa mene!»

¹⁰ Rokaam, ɗeet too ga’aam nitaal xa qos ƥood axuu ndefna fo muumeen tiimbel kuu ndefna. Nitaal roog keene no mbind Isra’el fop kaa samandaalel took tabax ke, me widuuna fop.

¹¹ Maak qarɓeen ɓetuu ɗik no mbind Isra’el kaa mbod’u mbaambir den, soo Yaasaniya fee o ƥiy Safan a fod a ndeer den. Oxuu refna kaa deegoox’u no ɓay um o njaq cuuraay soo eel yelefu a yoɗooxaa.

¹² Roog a layaxam ee: «Wo fee o ƥiy no kiin, ndax ga’aa ke maak we no mbind Isra’el a mbi’aa no niɓaan ole, oxuu refna kam a ndok pangool um? Kaa da layaa yee: ‹O Yaal oxe ga’ee a in, a waasa saax le pelek.› »

¹³ A layahinaxam ee: «Xan o ga’ahin cednooxu maak lakas kaa da mbi’aa.»

¹⁴ Cinj kaaga, a ɓisaxam farna fo ndokand naa no don-maax ole no Mbind ne no Yaal oxe, ole refna no ɓemb-roog o janoon, too a jeg’a maaga rew waa moofna, a ñaawooxaa a Tamuus.

¹⁵ A layaxam ee: «Wo fee o ƥiy no kiin, ndax ga’aa? Xan o ga’ahin cednooxu maak kaa ngupna keeke.»

¹⁶ Maaga, a ɓisaxam farna fo o maax-kam olaa no Mbind ne no Yaal oxe. No ndokand ne no Mbind ne no Yaal oxe, ndeer o ndambalaan onqe fo o sadaxand ole, a jeg’a ngap goor qarɓeen ƭik fo goor ɓetuk waa mbes’ina Mbind ne no Yaal oxe ndiiñ, a ngung farna fo batand, a mbaambir fo njeeƈ ne.

¹⁷ A laamtaxam ee: «Wo fee o ƥiy no kiin, ndax ga’aa keene? Ndax kaa mbind Yudaa ndeyƭooxee no mbi’aa cednooxu ke da mbi’aa mene? Kaa da mayƭandtaa saax le ngiin fo’oy soo a ndefahin no tooñaxam. Den oo weene a mbaƭa a naaq ngeec no ñis den.

¹⁸ Mi itam xam fesoor fo fuux, a ngid es yirimkee a den too wuuskiim a den. A mbalalooxangaa no nof es, nan-gilooxkiim a den.»