Heseki’el 44 - NQAARIIT NE ROOG

O don-maax ole no batand kesaneena o Yaal oxe

¹ O koor oxe a nomtiidaxam farna fo o don-maax tafil ole no Mbind Roog ne faambir’ina no batand. Kaa weg’el rap.

² O Yaal oxe a layaxam ee: «O don-maax olene xan a wegel, wetooxkee too o leng reefkee teen, yaam mi o Yaal oxe Roog fee Isra’el teen roktum. Xan a gen no wegel.

³ No ke farna no kelwaar oxe koy, xan a waag o moof teen ndax ta ñaam ñaamel um mbaambir no Yaal oxe. Xan a rokit na ƭat ale no ndambalaan onqe no don-maax ole soo a sutoorit na ƭat a leng kut ale.»

Xa kataakoon axe njaɓkaand kam Mbind Roog ne

⁴ O koor oxe a ɓisaxam farna fo o don-maax ole no ɓemb-roog o janoon mbaambir Mbind Roog ne. Ɗeetaam too ga’aam o ndam onqe no Yaal oxe mayƭand’ina Mbind ne no Yaal oxe.

⁵ Maaga, yenaam, gung a lanq. O Yaal oxe a layaxam ee: «Wo fee o ƥiy no kiin, horooxi too ɗeet a paax, wet nof of! Nan-gilooxi fop ke um laykang ta jagin no bargal ke fop no Mbind ne no Yaal oxe fo no kebil ke ten fop. Fat tokand ke no Mbind ne Roog fo xa sutoorand axe fop a ngaalong.»

⁶ Fat o lay faafañ we mbind Isra’el ee: «Keeke o Yaal oxe na refkaa boo faw a layu: Nuun mbind Isra’el, deyƭooxaam sik na pi a cednooxu ke nuun!

⁷ Nu ƥeka kam Mbind ne mi xa kataakoon axaa nqucooxeerna na qeeñ den, nqucooxee no cer den, ndax nu maasand Mbind ne mi. Ye nu ƥoxotaxam ñaamel es, neebam fee fo fo’oy le no sadax ke, nu ƭega ngiɓoor ne mi na pexey a pi a cednooxu ke nuun fop.

⁸ Nu topatooxee calel ke no tig tedu ke mi ndaa kaa nu ndalin wiin weene, ndax da topatooxaa calel es na seek nuun kam Mbind ne mi.

⁹ Keeke layum, mi o Yaal oxe na refkaa boo faw: O gataakoon o leng olaa xucooxeerna no xeeñ, xucooxee no cer rokkee no Mbind ne mi, o leng na xa kataakoon axe ngenna a ndeer Ii-isra’el we.»

Bargal ke njaginna no Leelewi we

¹⁰ «No ke jofna no Leelewi we mbaasaxama ye Isra’el a ruuxna a koƥ soo a fesaam ndiiñ ndax ta reef pangool ke ten, xan a ngadoox tooñ den.

¹¹ Kam Mbind ne mi, diidimle soom a ndefkaa, waa payandeena na xa ton-maax axe no Mbind Roog ne, ndax da njalanaa Mbind ne. Xan a nqirsanaa xeet fee cegel ke njagandaneena sadax toxel ke fo sadax lakas ke, too xan a ngeenooxaa mbaambir den, ndax da njalan a den.

¹² Feek kaa njalanoogu xeet fee mbaambir pangool ke den soo a ndeeƭu no mbind Isra’el ɓil laa na tolofnooraa, a maafnooraa a den na bakaad, mexe daaɓooxan fa den o ɓay es took ee: Xan a ngadoox tooñ den. Mi o Yaal oxe na refkaa boo faw layun.

¹³ Matiidkiraam ndax da mbadnanaam calel no saasadax, kaam ee matiidkatee tig oo tig tedu ke mi, tig oo tig ke mi moƴna o ted. Xan a ngadoox gaci den fo cednooxu ke da mbi’na.

¹⁴ Xam gadin a den a topatax ale no Mbind Roog ne too xan a mbadin calel ke mbareena o mbi teen fop.»

Bargal ke njaginna no saasadax we

¹⁵ «Saasadax Leelewi we o mat ndefna xa taan Saadok, topatooxna calel ke no Mbind ne mi ye Ii-isra’el we a nduuxna a koƥ, a ngoƭaam, weene xan a matiidaam, a njalanaxam, a ngeenooxaa mbaambir es, ndax da ƥoxotaam neebam fee fo fo’oy le. Mi o Yaal oxe na refkaa boo faw layun.

¹⁶ Weene xan a ndok no Mbind ne mi, a matiid a taabul ale mi, ndax da njalanaam, too xan a topatoox calel es.

¹⁷ Yaa da mbadiidkaa na xa ton-maax axe no maax-kam ole, xan a ndokoox toki coor, saqkee dara no cer den kaa fi’teena leen, boo da mbadnaa calel den na xa ton-maax axe no maax-kam ole fo kam Mbind Roog ne.

¹⁸ Xan a saq tañalax njoor took xoox le fo fo njata coor no tet den. Ngumnooxkee yaam onj le.

¹⁹ Yaa da sutooxkaa ndax da ndet no maax-tafil ole, no maax-tafil ole farna fa xeet fee, xan a mbol toki ke da mbadnitaa calel den soo a ndoon a den kam tok tedu ke. Xan a ndokoox ñirax lakas, ndax tedlanditkee xeet fee toki tedu ke den.

²⁰ Nduusooxkee too nqaƴkee wiil den tee simbiñ, ndaa kaa mbar o mboy wiil den.

²¹ O saasadax o leng yerkee biiñ yaa ta rokna no maax-kam ole.

²² Ngiligkee o tew o ñaaw mbaat o tew o baase, ndaa xan a ngilig no mboƥ ndoog ne mbaqaqoorna no mbind Isra’el mbaat o ñaaw oxe reeƭna o tew no saasadax.

²³ Xan a njangin xeet es da njektirand ke tedna fo ke tedeerna, a andnoor a den njektir ne ndeer ke xoolna fo ke xoolaƭarna.

²⁴ Ñimatir a jegangaa, xan a ƭat a tax da ngeenoox, too xan a ngate’it bargal es. Xan a ngay itam kebil es fo bargal es no toofeen ke mi fop, too xan a tedland pes a ñootnax ke mi.

²⁵ O saasadax duqkee o dal, yaam ndik ta xoolaƭarand a xoox um. O dal no we ndimuuna soom mbaat ole no ƥeem o ngoor mbaat o ndew mbaat o maag um o koor mbaat o cigeen um oxaa dolooxafuleerna waagun o tax o xoolaƭar.

²⁶ A cinj ƥogdinax ne ten, xan a limanel ñaal ɓetuu ƭik.

²⁷ No ñaal ne ta rokkahinaa kam Mbind Roog ne, no maax-kam ole ndax ta fadin o far um kam Mbind tedu ne, xan a ɓoxot sadax fa mbaasnoor pakaad um. Mi o Yaal oxe na refkaa boo faw layun.

²⁸ Keeke refu lam ne da njegkaa: Mi na refkaa lam den! Nu cooxkee a den kaa da njegna kam Isra’el. Mi na refkaa o jeg den.

²⁹ Xan a ñoowtaa ci’it ke fo sadax fa mbaasnoor pakaad ke fo sadax camsa’oor ke, too fop ke um kesankeel kam Isra’el den na njegkan.

³⁰ Ke moƴna o faax no taawlax ke fop fo fop ke nu mbatnanaxam boo ta xet, saasadax we na njegkan. Xan nu coox saasadax we ke moƴna o faax no qiiw ke nuun, ndax barke fee a fudoox no pind nuun.

³¹ Saasadax we ñaamkee njegel leng naa medna mbaat ta listel, ta ref ndiiƭ mbaat njegel ngatu no siir mbaat no ged.»