Heseki’el 39 - NQAARIIT NE ROOG

Gog a xasanahine

¹ «Wo fee o ƥiy no kiin, jo’tanaam a Gog ee: Keeke o Yaal oxe na refkaa boo faw a layu: Xam ɓekong o ɓay, wo Gog fee o kelwaar o maak oxe Mesek fa Tubal.

² Xam ɓisong, ɗoxong, intong no cat kaa no ɓemb-roog o janoon soo ɓisiidong took xa coong axe Isra’el.

³ Xam duguñ a qali le wo pokooxoona no ɓay o janoon of soo samin a kas ake wo saqoona no ɓay o ñamaak of.

⁴ Xan o yen took xa coong axe Isra’el, wo fo a yaj no xiixire of fop fo qeet ke yoonna fa wo fop. Xam ɓoxot o dal of ta refik ñaamel a tud ake fo kuu na yetaa fo ƥaaɓaan ke na koƥ ale.

⁵ Xan o xon kam ee kam a koƥ ale, yaam layaam. Mi o Yaal oxe na refkaa boo faw layun.

⁶ Xam hebliid fiɗel kam Magog fo ndeer no we ngenna na pimb ake mboorna, too xan da and ee mi refu o Yaal oxe.

⁷ Xam andnoor gon tedu es a ndeer Isra’el fee xeet es too xaƴkatiim gon tedu es a maasandel. Neene, qeet ke xan a and ee mi refu o Yaal oxe, o Tedu xe Isra’el.

⁸ Keene fop xan a xew too xan a fadnoox. Mi o Yaal oxe na refkaa boo faw layun. Ten refu ñaal ne ne’ooguuma.

⁹ Maaga, we ngenna no teeru ke Isra’el xan a sutoox. Xan a ngeƥand fiɗel, a umbtin ƥonax ke: Pegoor maak fo teɓ ke, a qali ke fo a kas ake, a sakoor ake fo a salma ke. Xan a mbi’it a den fiɗel laa na kaƥaa boo xa kiid ɓetaa ƭaq.

¹⁰ Ndaxanikkee xa cuuƭ na koƥ ale too seɓkee a den kam suungaan le, yaam ƥonax ke na ndefkaa umbel ke na fiɗel le. Xan a mbalit o jeg no we mbalit’ina o jeg den soo a njang kalal ke no we njang’ina kalal ke den. Mi o Yaal oxe na refkaa boo faw layun.

¹¹ A koom, xam ci a Gog maa ta gaseena kam Isra’el, ta ref a yulanq no dak-a-faaf we no batand ne no maag o Xanju le. Xan a weg a ƭat ale no ñaañaaƴ we. Maaga Gog fo a yaj um a ngaskeel too xan a xoyeel a yulanq ale na yaj ale Gog.

¹² Mbind Isra’el xan a ngasaa a den boo a qool ɓetaa ƭaq, ndax da nqooland saax le.

¹³ Xeet fee no saax le fop xan a ngas a den, too xan gon den a joot teen na bes fee um ɓoxotkeel o ndam. Mi o Yaal oxe na refkaa boo faw layun.

¹⁴ Cinj a qool ɓetaa ƭaq ake, xan goor a njilel, a ngadnel o mbidaa saax le cay, ndax da mbaaƭ xa tal axe maadna luuñaa a lanq, a ngas a den, ndax da nqoolaand saax le Isra’el.

¹⁵ We mbarna o mbid saax le xan a mbidin. O leng na den a ga’angaa xa kiiƈ no kiin, xan a fi paam den juum a ƥil boo yaa gaagas we a ngaskaa a den kam a yulanq ale na yaj ale Gog.

¹⁶ Xan a jeg sax teeru faa na ne’keel Hamoona tekitna a yaj. Neene saax le a xoolanditkeel.

¹⁷ Wo fee o ƥiy no kiin, keeke layum, mi o Yaal oxe na refkaa boo faw: Layi o xos ndiiƭ oluu refna fo ƥaaɓaan ke na koƥ ale fop ee: Mbokatooryo, ngar, korolooxanityo muu refna sadax fee mi um ɓoxotanaa a nuun. Sadax fa maak oo took xa coong axe Isra’el. Xan nu ñaam cer, yer fo’oy.

¹⁸ Xan nu ñaam cer ke na salma-koor ake soo yer fo’oy le no gelwaar we na adna fee, den fop a suk paal fo fo mbaal fo a suk pambe a ndefu fo qoox kaa ngudeena took Basan.

¹⁹ Xan nu ñaam neebam boo ngiñ tem soo yer fo’oy boo nqeƴ na sadax fee mi um warankaa a nuun.

²⁰ Xan nu ngiñ tem no roon ole mi refna pis fo ŋaaŋaay pis, a salma-koor fo goor xiixire we fop. Mi o Yaal oxe na refkaa boo faw layun.

²¹ Xam feeñil o ndam es a ndeer qeet ke, too xan qeet ke fop a nga kate ke um fadinkaa fo o ɓay es ole um doonkaa took den.

²² Mbind Isra’el xan a and ee mi refu o Yaal oxe Roog den no kaa xotitna no ñaal naaga a jof mbaambir.»

Ndaƥand ne na waare fee Heseki’el

²³ «Qeet lakas ke xan a and ee mbind Isra’el kaa ƥisel gilaa saax took o hup doole, yaam tooñ den fo ngore’aƭar den na mi. Ɗasnaam a den itam mukit es soo ɓoxot a den na xa ƥay no fañ den, ndax laƥ a ñaam a den.

²⁴ Rabdaam a den nqoolaƭar den fo pakaad den. Neene, ɗasnaam a den mukit es.

²⁵ Ten taxu keeke layum, mi o Yaal oxe na refkaa boo faw: Ndiiki xam supit muj fee Yakoob, yirim mbind Isra’el fop soo naalaa gon tedu es.

²⁶ Maaga, xan a mbeecit o ñiwaƭarel den fo ngore’aƭar ne da mbi’na na mi ye da ngenaa no woor kam o fiisel den, too o leng jom’andkatee a den.

²⁷ Yaa um nomtitiidkaa a den a ndeer qeet ke, fokatit a den na saax ake no fañ we den, xam tedlandel na pexey den na kid no qeet mayu.

²⁸ Neene, xan da and ee mi refu o Yaal oxe Roog den, ɓis’ina a den gilaa saax took o hup doole me no qeet lakas ke soo fokat a den no fiisel den. Xaƴkiim maaga o leng na den.

²⁹ Ɗasinkatiim a den mukit es, yaam ne ɓaxuuma Yiif es took mbind Isra’el. Mi o Yaal oxe na refkaa boo faw layun.»