Heseki’el 38 - NQAARIIT NE ROOG

Ke layeena na Gog

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, geleerooxi farna fa Gog, no saax le Magog, o kelwaar o maak oxe Mesek fa Tubal, soo jo’tanaam o ten!

³ Fat o lay ee: Keeke layum, mi o Yaal oxe na refkaa boo faw: Xam ɓekong o ɓay, wo Gog fee o kelwaar o maak oxe Mesek fa Tubal!

⁴ Xam serong o nomtoox, rokong xa keɗ na kaaɓaaɓ soo sutong, wo fo xiixire of fop, pis of fo ŋaaŋaay pis of, ndokooxna den fop boo a qiicaa, a yaj a maak no xiixire waa saqna pegoor maak fo teɓ fo laƥ.

⁵ Peepersi we, Kuukuus we fo Puupuut we a yoona fa den, a saq pegoor maak fo xa maxande.

⁶ Gomeer fo a yaj no xiixire um fa Bet-Togarma fo a yaj no xiixire um, no cat kaa no ɓemb-roog o janoon, qeet pagkatar, owey fa wo.

⁷ Jagandooxi, waaj, wo fo a yaj ake mbokatoorna a ndeerong. Wo na refkaa o aa-adax den.

⁸ A cinj a pe a mayu, xam xoyong. No camaane ke na ngaraa, xan o songik saax laa we ngenna teen a ƥostoor’ina no laƥ ne, soo a mbokattel a ndeer qeet mayu took xa coong axe Isra’el mbes’ina a pec. Kaa da sutit’el a ndeer qeet ke, too xan a ñoowaa no woor me da ngenna.

⁹ Xan o fadtiid nen a und, ref nen eel laa na muurkaa saax le, wo fo a yaj no xiixire of fo qeet pagkatar ke yoonna fa wo.

¹⁰ Keeke layum, mi o Yaal oxe na refkaa boo faw: A koom xan a qalaat a inoor no xeeñ of soo o fof yuuƥ mbaaxeer

¹¹ ee: ‹Xam inooxan saax laa naagna faŋ, songik wiin yaadooxu waa ndefna no woor me da ngenna den fop kam teeru kaa njegeerna saŋe mbaat a kinglir mbaat begax.

¹² Xam ret jang o jeg ole soo walit kalal ke. Xam doon o ɓay no kefatin ke ngenatineena, took xeet faa fokatteena ndeer a saax ake, a njeg xa siir fo kalal, a ngen a ndeendeer ale no lanq ke.›

¹³ Saba fa Dedaan, jula we Tarsis fo a saax ake mbiduuna fop xan a laamtong ee: ‹Ndax kaa o jangiid o jeg ole? Ndax o walit kalal ke taxu o fokat a yaj no xiixire lene fop, ndax o ɓis xaaliis fee fa wurus fee, jang xa siir axe fo o jeg ole soo jaɓ paax mayu?›

¹⁴ Ten taxu, wo fee o ƥiy no kiin, jo’tanaam a Gog ee: Keeke o Yaal oxe na refkaa boo faw a layu: A koom, yaa Isra’el fee xeet es a ngenkaa no woor, xan o andin.

¹⁵ Xan o inoortiid no mbiñ onqe genoona, no cat ke no ɓemb-roog o janoon, wo fo qeet pagkatar ke yoonna fa wo, fop a ŋaay pis, mbokatax maak, a yaj no xiixire mayu.

¹⁶ Xan o songik a Isra’el fee xeet es nen eel laa na retaa a muurik saax le. Xan keene a xew no camaane palakaand ke too xam songnoorong a xeet es, ndax qeet ke a andaam, yaa um tedlandkeel na kid den na pexey of, wo Gog!

¹⁷ Keeke layum, mi o Yaal oxe na refkaa boo faw: Ndax wo ne’oogum yaaga, reefandin no duleer we Isra’el ndefna dag es, andoona yee no ñaal kaaga, ngap xa kiid xa kiid, a njo’it’a yee xam songnoorong xeet es?

¹⁸ A koom, no ñaal naa Gog a garankaa o fiisel ole Isra’el, xan fuux le mi a biltoox. Mi o Yaal oxe na refkaa boo faw layun.

¹⁹ Kam naal es fo kam fiɗel le no fuux le mi, mexe layan ee: No ndigil, a koom xan yo’nax maak a jeg no lanq ke kam saax le Isra’el.

²⁰ Liƥ ke no maag ole fo tiiƭ ke na asamaan xan a send mbaambir es, den fo muumeen-a-koƥ ke fo ƥood ke fop fo wiin we fop ndefna took lanq ke. Xa coong axe xan a ngirdoox, taax-took ke fop a luƈtoox, saŋe ke fop a ngaakoox.

²¹ Xam ɓisiid xire took Gog na xa coong axe mi fop. Mi o Yaal oxe na refkaa boo faw layun. Oxuu refna xan a geleerooxan o pog um fo laƥ.

²² Xam layoor fo ten na pexey piste fo fo’oy. Xam ɓisiid mbuyaam maak fo a kalam a ƥuuɓu fo fiɗel fo nqeen took um, took a yaj no xiixire ke ten fo took qeet pagkatar ke yoonna fo ten.

²³ Xam feeñil o magnel es fo o tedel es. Xam andnoor a xoox es na kid no qeet mayu kaa na andkataa yee mi refu o Yaal oxe.»