Heseki’el 37 - NQAARIIT NE ROOG

Mbeeñil ne na xa kiiƈ xa beeru xe

¹ O ɓay ole no Yaal oxe a doonooxa took es, soo o Yaal oxe a ɗoxtaam Yiif um, a doonaam kam a yulanq alaa mayna muut fo xa kiiƈ.

² A ñaaƴnooraxam me widna a den fop, too kaa may’u lool kam a yulanq ale, a mbeer korong.

³ Maaga, a laamtaxam ee: «Wo fee o ƥiy no kiin, ndax xa kiiƈ axene a mbaaga o ñoowatin?» Um doonin ee: «O Yaal oxe na refkaa boo faw, wo soom andun.»

⁴ Maaga, a layaxam ee: «Jo’tanaam xa kiiƈ axene! Fat o lay a den ee: Nuun xa kiiƈ xa beeru korong axe, nan-gilooxyo fa lay fee no Yaal oxe!

⁵ Keeke o Yaal oxe na refkaa boo faw a layu xa kiiƈ axeene: Nga’angyo, xam ɓek na nuun haaƭ, too xan nu ñoowatin.

⁶ Xam sip na nuun xa pamb, saxnatin njer na nuun, muur a nuun ƭool, ɓek na nuun yiif, nu ñoowatin, too xan nu and ee mi refu o Yaal oxe.»

⁷ Jo’titaam, ne heblit’eema o ten. Maaga, ye um jo’tanan a jega fangax soo combol laa yee ñol, too xa kiiƈ axe a matra oluu refna fo ole ta mengoorna.

⁸ Ga’aam ee a jeg’a xa pamb took den. Njer ne a refa no saxatinaa soo ƭool ne a muuroox took fee, ndaa jeg’ee na den yiif.

⁹ Maaga, a layaxam ee: «Jo’tanaam Yiif› le, wo fee o ƥiy no kiin, kaam ee jo’tanaam! Fat o lay Yiif le yee: Keeke o Yaal oxe na refkaa boo faw a layu: Wo Yiif le, inoortiidi no qeñ nahik ke, wuuɗ took xon wene ndax da ñoowatin!»

¹⁰ Refaam no jo’tanan ne ta heblit’axama o ten. Maaga, Yiif le a gara na den, da ñoowatin soo a inoox a ngeenoox jing. A yaj a maak a maak no xiixire a reeƭu.

¹¹ A layaxam ee: «Wo fee o ƥiy no kiin, xa kiiƈ axeene mbind Isra’el fop oo. Den oo weene a ndamtin ee: ‹Xa kiiƈ axe in a mbeera korong, yaakaar in a yaktoox, i mbagiɗ tak.›

¹² Ten taxu jo’tanaam a den ee: Keeke o Yaal oxe na refkaa boo faw a layu: Nuun xeet es, xam wet poy ke nuun, inatinit a nuun teen, soo nomtiid a nuun no fiisel ole Isra’el.

¹³ Nuun xeet es, xan nu and ee mi refu o Yaal oxe, yaa um wetkaa poy ke nuun soo inatinit a nuun teen.

¹⁴ Xam ɓek Yiif es na nuun too xan nu ñoow. Xam dalnatin a nuun no fiisel nuun, too xan nu and ee mi o Yaal oxe layaam soo fesoor tig. Mi o Yaal oxe layun.»

O Yaal oxe xan a dalnatin o lengel ole na xeet fee

¹⁵ O Yaal oxe a daawnaxam fa lay um na xa ƭelem axene:

¹⁶ «Wo fee o ƥiy no kiin, jangi o loq soo bind took fee xa ñuxur axene: ‹Yudaa fo Ii-isra’el we no maat um njegun.› Cinj kaaga, jangi o loq o lakas soo bind took fee yee: ‹Yoseef, ta ref Efrayim fo Ii-isra’el we no maat um njegun.›

¹⁷ Paƥrandi cat ke na xa loq xa ƭaq axeene boo da ndefat leng no ɓay of.

¹⁸ Maaga, xan we na xeet of a laamtong, ndax o xooland a den ke keene a tekitna.

¹⁹ Fat o doon a den ee: Keeke o Yaal oxe na refkaa boo faw a layu: Xam xotit no ɓay ole Efrayim o loq ole refanna a Yoseef fo Ii-isra’el we no maat um, ndax um paƥrandin fo ole refanna maat ne Yudaa. A mbokatange no ɓay es, xan a ndefat o loq o leng.

²⁰ Wo fee o ƥiy no kiin, fat o geek no ɓay of xa loq axe bindoona, ndax fop a nga a den.

²¹ Cinj kaaga, fat o lay a den ee: Keeke o Yaal oxe na refkaa boo faw a layu: Xam sutit Ii-isra’el we a ndeer qeet ke da ndet’ina, fokat a den soo nomtiid a den no lanq ke den.

²² Maaga, xam fokat a den, too xan a ndefat xeet fa leng kut took xa coong axe Isra’el. O maad o leng kut na bugko maadooxanaa a den fop. Ndefkatee qeet ƭik, too nqaajoorkatee, a ndef maat ƭik.

²³ Ndoɗgandkatee a qoox den tee kaa mbaɗooxaa nitaal roog cakalaaru, a mbi’aa a pi a cednooxu fo pakaad kuu ndefna. Xam mucil a den no fo mbiñ ne da ngen’ina fop too a mbakaadit’u teen. Xam xooland a den da ndefat xeet es soo um ref Roog den.

²⁴ O tag es Dawid xan a ref o maad den, too xan a njegat o kaynaak o leng kut, ta ref o ten. Xan da nanan kebil es, a ngay ndax da ndeef bargal es.

²⁵ Xan da ngen kam saax le ci’uuma a Yakoob fee o tag es, too daan den a ngen’un. Xan da ngen teen boo faw, den fo xa ƥiy den fo xa taan den. Dawid fee o tag es xan a ref o kelwaar den boo kili.

²⁶ Xam dalin fa den ngiɓoor jam naa na refkaa boo faw. Xam dalin a den maaga, mayƭand a den soo sip mbind tedu es a ndeer den boo faw.

²⁷ Xam gen fa den, ref Roog den soo da ndef xeet es.

²⁸ Qeet lakas ke xan a and ee mi refu o Yaal oxe na tedlandaa Ii-isra’el we, yaa um sipkaa mbind tedu es a ndeer den boo kili.»