Heseki’el 36 - NQAARIIT NE ROOG

Ii-isra’el we xan a njegatin saax le

¹ «Wo fee o ƥiy no kiin, jo’tanaam xa coong axe Isra’el! Fat o lay ee: Nuun xa coong axe Isra’el, nan-gilooxyo fa lay fee no Yaal oxe!

² Keeke o Yaal oxe na refkaa boo faw a layu: O pañ oxe kaa layaa a nuun ee: ‹Coo! Coo! Xa coong xa miñu xeene in njegatu a den.›

³ Ten taxu jo’tanaam a den ee: Keeke o Yaal oxe na refkaa boo faw a layu: Feek nu ngefe tuƈ o saax oo saax, yuxmel ndax nu ndefat o jeg no qeet lakas ke, mbaxnel xa ñuxur xa benir,

⁴ ten taxu, nuun xa coong axe Isra’el, nan-gilooxyo fa lay fee no Yaal oxe na refkaa boo faw! Keeke layum, mi o Yaal oxe na refkaa boo faw xa coong axe fo a ñaang ake, a ƈufnand ake fo a yulanq ake, juum kefatin ke mbootatna fo teeru ke mbaaseena, too qeet ke mbidna a den a mbalit a den qac boo da ndefat calat den:

⁵ No ndigil kam fuux ɗomu le mi, xam xasan qeet lakas ke fa Edoom boo ta xet, den we njegooxna saax le mi fo o ɗaay ole na qeeñ den fop fo o xeefel ole na xa laaw den, ndax da mbalit xa suufand axe. Mi o Yaal oxe na refkaa boo faw layun.

⁶ Yaaga boog, jo’tanaam o fiisel ole Isra’el! Fat o lay xa coong axe, a ñaang ake, a ƈufnand ake fo a yulanq ake yee: Keeke o Yaal oxe na refkaa boo faw a layu: Nga’angyo, layaam kam fuux es fo naal es, yaam ne qeet lakas ke a mbenna a nuun.

⁷ Ten taxu keeke layum, mi o Yaal oxe na refkaa boo faw: Daaɓooxaam fo o ɓay es took ee: Qeet ke mbidna a nuun xan a ngadoox den fa qoox den a ben ake den.

⁸ Nuun xa coong axe Isra’el o mat, xan nu sax a naaq, saqan a Isra’el fee xeet es xa tim, yaam a nomtooxiid den a matiida.

⁹ Xam topatoox a nuun, geleeroox farna fa nuun. Xan nu nqooxel soo nduufel.

¹⁰ Xam mayƭand took nuun wiin we no mbind Isra’el. Teeru ke xan a ngenatinel, kefatin ke a maxatinel.

¹¹ Xam mayƭand took nuun wiin fo cegel. Xan a ƥaatoox a ndimatir. Xam fi nu ngenatinel nen yaaga, soo moƴ o fi’an a nuun paax ee yaa fa yaaga. Maaga, xan nu and ee mi refu o Yaal oxe.

¹² Xam ñaaƴnoor wiin we took nuun, a Isra’el fee xeet es, too xan a njegong. Xan o ref mbaafaap den, too salaxkatiro xa ƥiy den.

¹³ Keeke layum, mi o Yaal oxe na refkaa boo faw: Feek kaa o layeel ee: ‹Ñaamaa wiin, salax xa ƥiy axe na xeet of.›

¹⁴ Ten taxu ñaamkatiro wiin, too salaxkatiro xa ƥiy axe na xeet of. Mi o Yaal oxe na refkaa boo faw layun.

¹⁵ Nannoorkatiroong a ben ake na saax ake, too roxondooxkatiro o niwaƭarel ole no qeet ke. Salaxkatiro xa ƥiy axe na xeet of. Mi o Yaal oxe na refkaa boo faw layun.»

O Yaal oxe xan a fokatahin Ii-isra’el we

¹⁶ O Yaal oxe a daawnaxam fa lay um na xa ƭelem axene:

¹⁷ «Wo fee o ƥiy no kiin, ye we no mbind Isra’el a ngenaa no fiisel den, a nqoolaƭarandtaan a pesoorooƭ den fo a pi den. A pesoorooƭ den kaa reeƭu mbaambir es nen nqoolaƭar no tew oxaa saqna tap.

¹⁸ Maaga, naagaam wumbang took den fuux le mi yaam fo’oy le da ƥax’ina no saax le fo nitaal roog cakalaaru ke da ndoɗgandit’uuna.

¹⁹ Pasaraam a den a ndeer qeet ke, too a picte na saax a pogreer. Hate’aam a den na pesoorooƭ den fo na pi den.

²⁰ A mbadiida me no qeet ke da njofoogna too a maasanda gon tedu le mi boo a tax ta layoogel na den ee: ‹Xeet fee no Yaal oxe yoo, no saax um a sutooru.›

²¹ Jegaam naa ɗomaxama no gon tedu le mi mbind Isra’el a maasandoogna a ndeer qeet ke da ndet’ina.

²² Ten taxu layi mbind Isra’el ee: Keeke o Yaal oxe na refkaa boo faw a layu: Nuun mbind Isra’el, refee yee nuun taxu um fesoorkaa neeke, ndaa gon tedu le mi taxun, nu maasandna a ndeer qeet ke nu ndet’ina.

²³ Xam tedland gon maak le mi maasand’eena a ndeer qeet ke, gon leene nu maasandna a ndeer den, too qeet ke xan a and ee mi refu o Yaal oxe, yaa um tedlanditkeel na nuun na kid den. Mi o Yaal oxe na refkaa boo faw layun.

²⁴ Xam suudit a nuun a ndeer qeet ke, fokatit a nuun na saax ake fop soo nomtiid a nuun no lanq nuun.

²⁵ Xam wiis took nuun foofi fo xoolu, too xan nu nqoolandel. Xam xooland a nuun no ndoƭ ke nuun fop fo no nitaal roog cakalaaru ke nuun.

²⁶ Xam ci a nuun xeeñ xas soo ɓek na nuun yiif xas. Xam watin no ngiin nuun xeeñ nuun le saƭkitna nen ɓil soo ci a nuun xeeñ hiihiin.

²⁷ Xam ɓek Yiif es na nuun too xam fi boo nu ndeef kebil es, ngay bargal es.

²⁸ Xan nu ngen no saax le ci’uuma daan nuun. Xan nu ndef xeet es, soo um ref Roog nuun.

²⁹ Xam mucil a nuun no nqoolaƭar nuun fop. Xam xoy bele fee soo mayƭandin gañ. Ɓisiidkatiim a nuun biim le.

³⁰ Xam mayƭand xa tim axe no taxar ke fo ke xa qol axe a mbataa, ndax nu niwaƭarkataand a ndeer qeet ke yaam nqeex ne.

³¹ Maaga, xan nu mbetandoox a pesoorooƭ ale nuun faax’eerna fo a pi ake nuun mbaax’eerna. Nu mbaagkatee o mbadir a kid yaam tooñ ke nuun fo cednooxu ke nuun.

³² Refee yee nuun taxu um fesoorkaa neene, andeenoo. Mi o Yaal oxe na refkaa boo faw layun. Sedyo too seeƈaar na pesoorooƭ nuun, nuun mbind Isra’el.

³³ Keeke layum, mi o Yaal oxe na refkaa boo faw: A koom alaa um xoolandkaa a nuun no tooñ nuun fop, xam fi teeru ke a ngenatinel, soo kefatin ke a maxatinel.

³⁴ Saax le raadna xan a xooxatinel ee ta refat o mbiñ o mbootu na kid no dak-a-faaf we fop.

³⁵ Xan a layel ee: ‹Saax lene raad’ina a nandata fo a ƭing ale Edeen, soo teeru kene mbes’ina a pec, a tasel, a mbaytel, a saƭkande soo a ngenel.›

³⁶ Maaga, qeet ke yoqna me widna a nuun xan a and ee mi o Yaal oxe maxatinaam ke gefeena soo jimbatin lanq ke ndaadna. Mi o Yaal oxe layun too xam fadnin.

³⁷ Keeke layum, mi o Yaal oxe na refkaa boo faw: Xam xaƴahin Ii-isra’el we da ƈufginooxaam too xam jaaɓ a den yaa um mayƭandkaa a den boo nen ged.

³⁸ Teeru ke mbesna a pec xan a may muut fo xa siir no wiin, nen xa siir axe kesaneena sadax fee, nen xa siir axe na ƥiseel Yeerusaleem yaa fo toofeen ke ten. Maaga, xan da and ee mi refu o Yaal oxe.»