Heseki’el 35 - NQAARIIT NE ROOG

Ke yegniteena no Ee-edoom we

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, geleerooxani o joong ole Seyiir, too jo’tanaam o ten!

³ Fat o lay ee: Keeke o Yaal oxe na refkaa boo faw a layu: Wo o joong ole Seyiir, xam ɓekong o ɓay. Mexe letnaa o ɓay es took of too xam yungandong, fi’ong o mbiñ o mbootu.

⁴ Xam fi teeru ke wo juum kefatin, o refat o mbiñ o mbootu, too xan o and ee mi refu o Yaal oxe.

⁵ Feek kaa o gen cay no fañraa fo Ii-isra’el we, soo maafit a den laƥ ye fa naqad den, ye tooñ den a hupna,

⁶ ten taxu ne ta wooritna yee mexe ñoowaa, mi o Yaal oxe na refkaa boo faw layun, xam ɓax fo’oy of too fo’oy le xan a reefang. Feek sibiro ɓax fo’oy, fo’oy le xan a reefang.

⁷ Xam fi o joong ole Seyiir a yungat soo a wootat, too xam suud teen we na ndetaa fo we na ngaraa.

⁸ Xam mayƭand xa coong axe ten fo xon. We laƥ ne a fandkaa xan a yen took a ñaang ake wo fo na yulanq ake wo fo na kamb ake wo.

⁹ Xam fi’ong o mbiñ onqaa wootna boo faw, teeru ke wo ngenkataand, too xan nu and ee mi refu o Yaal oxe.

¹⁰ Feek kaa o lay ee: ‹Xam jaɓ qeet ƭik kene, ndefna Isra’el fa Yudaa fo a saax a ƭak ake den, too xam jegat a den›, ke o Yaal oxe a genna teen fop oo,

¹¹ ten taxu, ne ta wooritna yee mexe ñoowaa, mi o Yaal oxe na refkaa boo faw layun, xam fesoor deŋ nen fuux le fo ciis ne fesoortoona fo mbañir of fa den, too xam andnoor a den a xoox es, yaa um hate’kang.

¹² Xan o and ee mi o Yaal oxe nanaam a ben ake fop wenoona xa coong axe Isra’el ee: ‹A ndefata fo mbiñ fo mbootu, um ɓoxotel a den nen mbuufuɗag listel.›

¹³ Waxnaxamo xa ñuxur xa magnandooxu, lay mayu took es, too nanaanum a paax.

¹⁴ Keeke layum, mi o Yaal oxe na refkaa boo faw: Feek saax le fop oxey no ɗaay ndiiki, xam fi’ong o mbiñ o mbootu.

¹⁵ Feek kaa o felakinoox na kef ale no mbaafaap ne Isra’el, xam doonong leng kut ke. Wo o joong ole Seyiir xan o fiitnel fa Edoom fop, too xan fop a and ee mi refu o Yaal oxe.»