Heseki’el 34 - NQAARIIT NE ROOG

Ke layeena no ɗooɗox we Isra’el

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, jo’tanaam, jo’tanaam a den, den ɗooɗox we Isra’el ee: Keeke o Yaal oxe na refkaa boo faw a layu: Sabab took ɗooɗox we Isra’el na ƭoxaa a qoox den! Ndax ɗooɗox we mbar’ee o ƭoxaa o siir ole?

³ Kaa nu ñaamaa neebam fee, ñiroortaa a biil ake den, mbaraa cegel ke moƴna o ngiñ, too nu ngayee paal ke.

⁴ Nu yablee we yooyna, nu mbaadnee we njirna, nu njongee we ƥolooxna, nu nquriidee we njaqooxna, nu mbaaƭee we mo’na, ndaa kaa nu ngame a den fa doole fo o ɗom tig.

⁵ A pasarooxa took o ñak o kaynaak, a ndefat muud no ƥaaɓaan ke na koƥ ale, a pictoor.

⁶ Paal ke mi we njoqooyooxaa took xa coong axe fop fo took a ñaang a ciig ake fop. Paal ke mi a pasarooxa kam saax le fop, o leng topatooxee a den, o leng waaƭee a den.

⁷ Ten taxu, nuun ɗooɗox we, nan-gilooxyo fa lay fee no Yaal oxe!

⁸ Ne ta wooritna yee mexe ñoowaa, mi o Yaal oxe na refkaa boo faw layun, feek paal ke mi kaa saanqooxaa, a ndefat muud no ƥaaɓaan ke na koƥ ale took o ñak o kaynaak, feek gaynaak we mi topatooxoogee dara paal ke mi, feek gaynaak we a qoox den soom a ngayoogu, too ngayoogee paal ke mi,

⁹ yaam keene, nuun gaynaak we, nan-gilooxyo fa lay fee no Yaal oxe.

¹⁰ Keeke layum, mi o Yaal oxe na refkaa boo faw: Xam ɓek gaynaak weene o ɓay. Xam suud paal ke mi na xa ƥay den, xaƴkatiim a den da ndef ɗooɗox, a ƭoxaa a qoox den. Xam suqit paal ke mi no don den, too ndefkatee ñaamel den.

¹¹ Keeke layum, mi o Yaal oxe na refkaa boo faw: No ke xotitna ndiiki, mi fa xoox es na bugko topatooxaa paal es, gayaa a den.

¹² Ne o kaynaak a fokattaa o siir um, yaa paal um a pasaroorna, neene um topatooritkaa paal es. Xam waaƭik cegel es no fo mbiñ ne da pasaroox’ina, a jopir ñaal a kuy fo o niɓaan.

¹³ Xam sutit a den a ndeer qeet ke, fokatit a den na saax a pogreer ake. Xam gay a den took xa coong axe Isra’el fo kam a nap ake na xa quluɓ axe fo no fo mbiñ ne na ngeneel no saax le fop.

¹⁴ Xam gay a den maa neepna. Xa suufand den xan a ndef took xa coong axe no saax le Isra’el. Xan a mbaag o mbondooxaa maaga no nget mbaax, soo a suufaa maa neepna took xa coong axe Isra’el.

¹⁵ Mi na bugko gayaa paal es, mi na bugko koornaa a den. Mi o Yaal oxe na refkaa boo faw layun.

¹⁶ Xam waaƭik njegel ne mo’na, xuriid ne jaqooxna, ne ɓolooxna um jongin, ne jirna um waadnin, ndaa ne giñna o mat, a jeg doole, xam saŋkin. Xam gayit a den o cofel.»

Roog a ƴufgiida xeet um

¹⁷ «Nuun paal es o mat, keeke layum, mi o Yaal oxe na refkaa boo faw: Nga’angyo, mexe hate’aa ndeer mbaal fo ngend um, ndeer a suk paal ake fo a suk pambe ke.

¹⁸ Ndax kaa nu nqeef o suuf no gayand o faax ole boo a tax nu nduutaa ke yoqna na xa suufand nuun? Ndax kaa nu nqeef o yer foofi fo wendu le boo a tax nu nootaa ke yoqna fo a caf nuun?

¹⁹ Paal ke mi a mbara o suuf no ke a caf nuun a nduutna soo a yer no ke a caf nuun a nootna.

²⁰ Ten taxu keeke layum, mi o Yaal oxe na refkaa boo faw: Mi fa xoox es na hate’kaa ndeer mbaal ngiñu ne fo yooyu ne.

²¹ Feek kaa nu mbaɓaa fo o saax fo a kand soo nqawtaa xa can nuun paal yooyu ke fop boo yaa nu pasarna a den tafil,

²² xam mucil paal es, ndax mbalitkataand, too xam hate ndeer mbaal fo ngend um.

²³ Xam dalnan a den o kaynaak o leng kut oxaa na gaykaa a den, ta ref a Dawid fee o tag es. Xan a gay a den, a ref o kaynaak den.

²⁴ Mi o Yaal oxe, xam ref Roog den, soo Dawid fee o tag es a ref o kelwaar a ndeer den. Mi o Yaal oxe layun.

²⁵ Xam dalin fa den ngiɓoor jam too xam ñuf no saax le ƥaaɓaan ke. Xan a ngen no woor kam a koƥ-a-ƥor ale, soo a ƭaanaa a ndeer a suungaan ake.

²⁶ Xam fi a den fo me widna ñaang le mi a cur barke. Xam hebliid a teƥ ale na waxtu um, too xan a ref a teƥ barke.

²⁷ Taxar ke na koƥ ale xan a ndim soo lanq ke a njeg saxadel. Xan a ñoowaa no woor kam o fiisel den, too xan a and ee mi refu o Yaal oxe, yaa um ɓolkaa a celem ake no kadoor ke den soo wat a den no ɓay no we da ndagooxaa.

²⁸ Qeet lakas ke mbalitkatee a den, too ƥaaɓaan ke no saax le lisitkatee a den. Xan a ngen no woor, too jegkatee o leng oxaa na gal’andaa a den.

²⁹ Xam sipan a den a ƭing alaa jegna gon. Biim warkatee a den no saax le, too ndefkatee calat no qeet ke.

³⁰ Xan da and ee mi o Yaal oxe Roog den, mexey fa den, too xeet es a ndefu, den mbind Isra’el. Mi o Yaal oxe na refkaa boo faw layun.

³¹ Nuun paal es, paal ke no siir ole mi, wiin nu ndefu, soo mi um ref Roog nuun. Mi o Yaal oxe na refkaa boo faw layun.»