Heseki’el 33 - NQAARIIT NE ROOG

Roog a dalna a Heseki’el nen o yeeyetax

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, layi fo wiin we na xeet of! Fat o lay a den ee: Um ɓisiidangaa xire took saax, soo xeet fee no saax le a nqot o koor o leng a ndeer den, a ndalnin nen o yeeyetax,

³ o koor oxeene a ga’angaa xire a garaa took saax le, fat a jibin a luuƥ, a maƭoox xeet fee.

⁴ Oxuu nanna fangax le na luuƥ ale, too jaɓee o maƭooxel, boo xire a gar a ñaamin, xan a gadoox fo’oy um.

⁵ Kaa nan fangax le na luuƥ ale, too jaɓee o maƭooxel, yaaga boog ten gadooxu fa nqon um. Oxuu jaɓna o maƭooxel o mat, xan a mucil o ñis um.

⁶ Kaa koy, o yeeyetax oxe a ga’angaa xire a garaa too jibnee a luuƥ, xeet fee a maƭooxangaand boo xire a gar a ñaam o leng na den, oxeene xan a xon yaam tooñ um, ndaa xam laamit o yeeyetax oxe fo’oy um.

⁷ Wo fee o ƥiy no kiin koy, dalnaaxoong nen o yeeyetax took mbind Isra’el. Fat o nan-giloox fa lay fee na sutooraa no don es soo maƭooxanaam a den.

⁸ Um layangaa o soxodu yee: ‹Wo o soxodu xe, xan o xon›, o maƭooxangee o soxodu xeene na pesoorooƭ um, xan a xon yaam tooñ um, ndaa xam laamtong fo’oy um.

⁹ Kaa koy, o maƭooxangaa o soxodu, ndax o ɗapnoorin a pesoorooƭ um, too fesee a cinj a pesoorooƭ um, xan a xon kam njofaƭar um, soo wo o mat o ɓogoox teen qac.»

O soxodu xe nomtooxiidna me Roog xan a ñoow

¹⁰ Wo fee o ƥiy no kiin o mat, layi mbind Isra’el ee: «Kaa nu layaa yee: ‹Nam i mbaagkaa o ñoowit, feek tooñ in fo pakaad in a yena took in, boo a tax i saŋkooxaa?›

¹¹ Layi a den ee: Ne ta wooritna yee mexe ñoowaa, mi o Yaal oxe na refkaa boo faw layun: O soxodu xe a saŋkoox moƴaniraam, ke buguuma kañ refu yee ta supit a pesoorooƭ soo a muc. Nomtooxiidyo, kaam ee nu nqaƴ a ƭat a paaxeer ake nuun. Ndi xar taxu nu mbug o nqon, nuun mbind Isra’el?

¹² Wo fee o ƥiy no kiin, layahini wiin we na xeet of ee: A koom aluu o cofu xe a soobooxna na pi a paaxeer, o cofel um mucilkiran, too o soxodu xe a fesangaa a cinj a pesoorooƭ a paaxeer um, paaxeer ke ta fi’na yaaga taxkiran o saŋkoox. Neene itam o cofu xe ñoowkee na pexey o cofel um yaa ta bakaadna.

¹³ Um layangaa o cofu xe yee xan a ñoow, o cofel um a deyangaan boo ta taxin o fi njofaƭar, a pi a paax ake ten fop xan a mbeecel, too xan a xon, yaam paaxeer ke ta fi’na.

¹⁴ Um layangaa o soxodu xe yee xan a xon, a fesangaa pakaad um a cinj soo a reef a ƭat fo o cofel, xonkee.

¹⁵ A daknangaa ke ta tayle’eena mbaat ke ta guuɗna, a fi’atangee njofaƭar, ndax a reefaa bargal ke no ñoow ole, xonkee, too a woora yee xan a ñoow.

¹⁶ Pakaad um fop xan a mbeecel, too xan a ñoow yaam ne ta reefaa a ƭat fo o cofel.

¹⁷ Wiin we na xeet of kaa layaa yee: ‹A ƭat ale no Yaal oxe jofee.› Kaa koy, ndax refee yee a ƭat den jofeeru?

¹⁸ Boo o cofu xe a waasna a pesoorooƭ a paax um, soo a fi’ataa njofaƭar, xan a xon teen.

¹⁹ Kaa koy, boo o soxodu xe a fesna a cinj a pesoorooƭ a paaxeer um soo a fi’ataa cofu fo booru, xan a ñoow yaam keene.

²⁰ Kaa nu layaa yee: ‹A ƭat ale no Yaal oxe jofee.› Xam hate a nuun toox de, oxuu refna na pesoorooƭ um, nuun mbind Isra’el.»

Saax le Isra’el xan a raad

²¹ No hiid xarɓaxay fo o hiid o ɗikandeer ole no mbaƭ ne in, no ñaal ƥetkandeer ne no nqool xarɓaxayandeer onqe, oxaa mucitna Yeerusaleem, a gara me mi, ndax ta yegnaam ee teeru faa a jaɓe.

²² O ɓay ole no Yaal oxe a doonoox’a took es no kirand naa yaaga oxe mucna fadiidafulee, too o Yaal oxe a wetan’axam o don es ye ta garna me mi no nqes ne. O don es a muƥtoox’a too muum’atiim.

²³ Maaga, o Yaal oxe a daawnaxam fa lay um na xa ƭelem axene:

²⁴ «Wo fee o ƥiy no kiin, we ngenna no kefatin kene no fiisel ole Isra’el kaa layaa yee: ‹Abraham o leng a reeƭu, too a jaɓa saax le, too in we mayna gañ cooxe saax le, njegkin.›

²⁵ Yaaga koy, layi a den ee: Keeke o Yaal oxe na refkaa boo faw a layu: Kaa nu ñaamaa med, ƭeetaa farna fo nitaal roog cakalaaru ke nuun, ƥaxaa fo’oy, soo koy nu mbug o ndef we njegna saax le!

²⁶ Kaa nu ngooloox laƥ nuun, mbi’aa cednooxu, oxuu refna na nuun a rokaa no tew no kend um, soo koy nu mbug o ndef we njegna saax le!

²⁷ Fat o lay a den ee: Keeke o Yaal oxe na refkaa boo faw a layu: Ne ta wooritna yee mexe ñoowaa, mi o Yaal oxe, neene a woortu yee we ndefna kam kefatin ke, xan laƥ a ñaam a den, oxe refna na koƥ o njende, um ɓoxotin ƥaaɓaan ke da muudoorin, soo we ndefna na ƥil ake fo no luf ke a nqonit na piste.

²⁸ Xam fi saax le a refat juum kefatin fo o mbiñ o mbootu, doole fa nga’atinoor um xan a fag tak, xa coong axe Isra’el a mbootat, too o leng reefkatee teen.

²⁹ Xan da and ee mi refu o Yaal oxe, yaa um fi’kaa saax le juum kefatin fo o mbiñ o mbootu, yaam cednooxu ke da mbi’na teen.

³⁰ Wo fee o ƥiy no kiin, wiin we na xeet of owe took of me lernooxna tabax ke fo na carind ake no pind ke, a layraa a ndeer den, oxuu refna fo o pog um, ee: ‹Acayo boog i nan-gilook fum fa lay inooru no Yaal oxe!›

³¹ Owe ngaraa me wo, a mbi a yaj. Xeet es owe moofa mbaambir of, a nan-gilooxaa fa lay of, ndaa ndeefiran, yaam kaa mbesoortaa fa lay fa mbelu no don den, too a soƥa fop oo no xeeñ den, ke faaxna na qoox den doŋ a mbaaƭaa.

³² Kaa o ref na den o kiigim oxaa da mbugna, o yaal o ñuxur o felu, oxaa waagna mbak. Kaa nan-gilooxaa fa lay of, ndaa ndeefiran.

³³ Yaa keene layoona a fadnooxkaa, too a fadiida boo a ƴut sax, xan da and ee a jeg’a o tuleer a ndeer den.»