Heseki’el 27 - NQAARIIT NE ROOG

Ƭomatax na yaq fee Tiir

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, ferani a Tiir a kim a mboy!

³ Fat o lay a Tiir ee: Cey, wo fee moofna na ƥeeraamb ale no maag ole, o cula tew oxe no qeet ke geleerooxna farna fo a pimb a mayu! Keeke layum, mi o Yaal oxe na refkaa boo faw: Tiir, wo o mat layoogu yee: Mi, o mosel es jegee gak leng.

⁴ Xa ŋat axe wo we kam ee kam xa maag axe, too we maxoonga, a mbi’aang o mos boo jegiro sik.

⁵ A njalta xa lak axe wo fop pilaawo ke Seniir. A nqota no taxar seedar ke Libaŋ, ndax da yoɗanong a maaw.

⁶ A njalta xa lafir axe wo kariñ ke Basan, soo o dung ole wo da mosandtin a ñiiñ fa ñiig, akaa ngatiidna Asuur, a ƥistiidel no fimb le Sipere.

⁷ A maaw ake wo kaa ndeeƭu paƴ ke Misira, a ngemeñel soo a ndef paƴ of. Haŋik fa nqiiyiiy fo haŋik fa yeeq fee na pimb ake Elisa ndeeƭu ƭiif ke wo.

⁸ We ngenna Sidoŋ fa Arwad ndeeƭu laalaf we wo. We moƴna mbaane a ndeer of, wo Tiir, ndeeƭu maamaag we wo.

⁹ Maak we Gebal fo baane ke ten me wo a ndeeƭu, a kaal ake no maag ole fop fo jaajal we den me wo a ndeeƭu ndax da sofnoor fa wo.

¹⁰ Persi, Luud fa Puut a mbog’a na yaj ake wo. Den ndeeƭu xiixire we wo. Me wo a lokoogu pegoor den fo xa maxande den soo a mboornaa o ndam of.

¹¹ We Arwad fo xiixire we wo kaa ndeer’u saŋe ke wo, soo goor we Gamaad a mbod took taax-took ke wo. Kaa lokoogu pegoor ke den no saŋe ke wo, a mbi boo o mosel of a ñak sik.»

Tiir, teeru fa maak fee no njula ne

¹² «Wiin we Tarsis kaa sofroogu fa wo no jeg of ole naag’ina gañ. Kaa ƥisiidoogu no luuma ke wo xaaliis fa nqoolu, njelem ƥaal, buraag fa beteex.

¹³ Yawan, Tubal fa Mesek kaa njikroogu fa wo. Kaa softoogu cula ke wo faɗ fo ƥaxañ xanjar.

¹⁴ We Bet-Togarma kaa ƥisiidoogu no luuma ke wo pis fo ŋaaŋaay pis fo perkele.

¹⁵ We Dedaan kaa njikroogu fa wo. Cula ke na pimb a mayu na xa ƥay of a ƥeeroogu. Kaa o rabditoogel njigand ne a ñiiñ fa ñiig fo a teex ndaxar eben.

¹⁶ Edoom kaa sofroogu fa wo no jale of le naag’ina gañ. Kaa ɓisiidoogu no luuma ke wo a ƥil a cafeñu a ne’e emerod, piis taalde’u, sarbo, pay coor, kooraay fo a ƥil a cafeñu a ne’e rubis.

¹⁷ Yudaa fo saax le Isra’el kaa njikroogu fa wo, a sofritaa fa wo bele fee Minit, kaaf, suum, diwliin fo ƭuumwel.

¹⁸ Damaas kaa jikroogu fa wo no jale of fo no jeg of ole naag’ina gañ, a rabditang biiñ fee Helbon fo leen fa ndan taw.

¹⁹ No kaa xotitna Dan, Yawan fa Uusal kaa njula’iidoogu no luuma ke wo. Njelem ne xaweena, yaate fee fo xeet felu tuñ le kaa sofnooxoogel fa wo.

²⁰ Dedaan kaa jikroogu fa wo kumnir fo kelax pis.

²¹ Arabi fo gelwaar we Kedaar fop kaa njikroogu fa wo. Kaa ƥisiidoogu no luuma ke wo paal, a suk paal fo a suk pambe.

²² Jula we Saba fo we Raama kaa njikroogu fa wo. A ƥisiidooga no luuma ke wo qeeñe-xeeñe ke moƴna o mbel, a ƥil a cafeñu kuu ndefna fa wurus.

²³ Xaraan, Kane fa Edeen, jula we Saba fo we Asuur fo we Kilmad kaa njikroogu fa wo.

²⁴ Kaa njula’oogu tikoorik mosu, sabadoor taalde’u kaa ngemeñeena, piis kaa mayna haŋik fo xa ƥaak xa mode boo a saƭik.»

Suuratin ne no ƭomatax ne took Tiir

²⁵ «A kaal ake Tarsis sufoogu cula ke wo. Kaa o may’u tem fa halal fo o ndam kam ee kam xa maag axe.

²⁶ Laalaf we a ƥisaang took poofi maak ke. Nqeñ ne no batand a duguñaang kam ee kam xa maag axe.

²⁷ Kalal ke wo, luuma ke wo, cula ke wo, maamaag we wo fo ƴuuƴufin a kaal we wo, we na nqendandaa xa kef axe na kaal ake wo fo we na sofnooxaa cula ke wo, goor xiixire we wo fop ndefna me wo fo a ndeer mbokatax ne ndefna a ndeer of, fop xan a yen a ndeer ee ndeer xa maag axe a koom alaa o suuxkaa.

²⁸ Xa buuq naqad axe no maamaag we na kaal ake wo xan a tax we ngenna na ƥeeraamb ake a sendaa.

²⁹ Maaga, laalaf we fop xan a mbudoox a kaal ake den. Maamaag we fo jaajal we na kaal ake xan a ngeenoox a lanq.

³⁰ Xan a ƭomatooxaa na muj fee wo, a mbuuq boo a torox. Xan a yipoox fo ut no xoox, a mbirkiloox kam ndaw.

³¹ Xan a nqanqoox no ƭuf yaam wo, a nderoox xa saaku. Xan a loolong boo kam den a fag tak, a ƭomatooxong.

³² Kam naqad den, xan a mberanong a kim a mboy, a njoytooxang ee: ‹An nand’u nen a Tiir, nen a teeru fene gefeena tuƈ a ndeer o maag ole?›

³³ Boo cula ke wo a sutoox’ina o maag ole, giñnooroogaa qeet mayu. O jeg ole wo fo cula ke wo naang’ina gañ, a njegnoorooga maad we na adna fee halal.

³⁴ Ye xa maag axe a nduguñoonga, kam qooƭ ke no poofi ke o mat cula ke wo fo suf ne wo fop a ndiimu fa wo.

³⁵ Fop we ngenna na pimb ake a njaqa yaam wo. Maad we den a ndiida boo a sendaa, mukit den a seeƈaar.

³⁶ Jula we a ndeer qeet ke xan a mbuuƴanang. Kaa o refat kaa na diidlandaa, refkatiro tus boo muk.»