Heseki’el 26 - NQAARIIT NE ROOG

Ke yegniteena na Tiir

¹ No hiid xarɓaxay fo hiid o lengandeer ole, no ñaal eetaand ne no nqool onqe, o Yaal oxe a daawnaxam fa lay um na xa ƭelem axene:

² «Wo fee o ƥiy no kiin, Tiir kaa jalaa a Yeerusaleem, a damtin ee: ‹A duguñe, ndokand neene no qeet ke! Me mi a ngeleerooxkataa. Xam mayat muut, yaam a fesa a pec.›

³ Ten taxu keeke layum, mi o Yaal oxe na refkaa boo faw: Xam inooxanong wo Tiir. Xam ɓakandiid took of qeet pagkatar ne o maag ole a yoɗtaa a yag-ee-yag ake ten.

⁴ Xan a yaq saŋe ke Tiir, a mbayit taax-took ke ten. Xam leel teen fo ut ole soo fi’in ɓil laa naagna faŋ.

⁵ Xan a ref ndeer o maag ole o liiland paal, yaam mi yaƥatun. Mi o Yaal oxe na refkaa boo faw layun. Qeet ke xan a mbalit o jeg um.

⁶ Xa ƥiy xa tew axe ten na ndefkaa na koƥ ale xan laƥ ne a ñaam a den, neene xan ta and ee mi refu o Yaal oxe.

⁷ Keeke layum, mi o Yaal oxe na refkaa boo faw: Xam ɓistiid no ɓemb-roog o janoon took Tiir a Nebukadnesaar fee o maad oxe Babilon, o maad oxe no maad we, ta yoontiid pis, a sareet-xire, ŋaaŋaay pis, faan fo a yaj a pagkatar.

⁸ Xa ƥiy xa tew axe wo ndefna na koƥ ale xan a warit a den laƥ. Xan a yoɗ a uum lanq a songir took of, a maxanong a cuum lanq soo a sipanong pegoor maak.

⁹ Xan a gom saŋe ke wo, a gaakit taax-took ke wo ƥonax qire’ir ke ten.

¹⁰ Fo ut ole no pis mayaan ke ten xan a muurong. Saŋe ke wo xan a send no fangax le no ŋaaŋaay pis we fo no le na saang ake fo no le na sareet-xire ke, yaa ta rokkaa no tokand ke wo, ne teeru faa jaɓeena a rokteel.

¹¹ Xan a duutit ped ke wo fop xa poxos axe no pis ke ten, a warit xeet fee wo laƥ, soo a toodook ake ndefna doole of a ngaakoox a lanq.

¹² Xan a njang kalal ke wo, a mbalit o jeg of, a njiƭit saŋe ke wo, a mbayit pind mosu ke wo soo a ndeɓ kam o maag ole a qanq ake wo, a ƥil ake wo boo no fo ut ole wo.

¹³ Xam tiimin coow le na kim ake wo, too fangax le no fo nqilimb ne wo nankataand.

¹⁴ Xam fi’ong ɓil laa naagna faŋ, o mbiñ onqaa paal ke a liileel. Maxatinkaandee! Mi o Yaal oxe layun. Mi o Yaal oxe na refkaa boo faw layun.

¹⁵ Keeke layum a Tiir, mi o Yaal oxe na refkaa boo faw: Ndax we ngenna na pimb ake sendkee no fangax le no njom ne wo, yaa we na ƥutaa a iinaa, yaa a bar ale a jegkaa a ndeer of?

¹⁶ Gelwaar we no maag ole fop xan a mbudoorit na tungul ake den, a mbol lori ke den, a ƥool toki kemeñe ke den, a may fo diid, a moof a lanq, a ngen no sendaa, a njaq no taamaala ke na ndalkang.

¹⁷ Xan a mberanong a kim a mboy ee: ‹Nam saŋkoorto, nam moocto na xa maag axe, wo teeru fa njegu gon fee, jeg’ina katil took o maag ole, wo fo we ngenna me wo? Kaa o diidlandoogu fop we ngenna no maag ole.

¹⁸ Ndiiki koy, we ngenna na ƥeeraamb ale no maag ole owe sendaa, yaam njom ne wo, a pimb ake no maag ole a ndiid no muukandoong ne wo.›

¹⁹ Keeke layum, mi o Yaal oxe na refkaa boo faw: Yaa um fi’kang teeru fa mbesu a pec nen teeru ke ngenataandeena, yaa um ɓakandiidkaa took of juwaam fee soo poofi maak ke a ƭuudong,

²⁰ xam fudnandoorong fo we na mbudooxaa kam gamb le na saŋkax ale, farna fa xeet fee yaaga. Xam gennoorong no qooƭ ke no lanq ke, o nand fo kefatin ke na refkaa boo faw, yoon fo we na mbudooxaa kam gamb le na saŋkax ale, ndax genkataandee. Maaga, xam geekan saax le no ñoow we o ndam onqe.

²¹ Xam fi’ong o refat kaa na diidlandaa, too refkatiro tus. Xan o waaƭeel ndaa ga’kaandee muk. Mi o Yaal oxe na refkaa boo faw layun.»