Heseki’el 23 - NQAARIIT NE ROOG

Samari a jaga’a

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, a jeg’a meen rew ɗik, xa caaƈ xa toog axaa mbogna a yaay fa leng kut.

³ A njaga’a Misira ye da ndefaa xa teɓandoong. Ƭeen den a naƥne maaga, kang den a moosel maaga.

⁴ Taaw fee Ohola a ne’e, o ndeɓ um a ne’el Oholiba. Mi jeg’u a den. A ndima xa ƥiy xa koor fo xa tew. Ohola refu Samari, soo Oholiba a ref Yeerusaleem.

⁵ Ohola a jaga’a ke jeg’anuuma fop oo. A yuxum ake na xa pes axe ten a ƥislooxaan, ndefna Aa-asuur we gentand um,

⁶ ndokooxna pay coor, gofornoor fo kelfa, fop a ndef xa pes, a yaawnoox, ŋaaŋaay waa ŋaayna pis.

⁷ Den a fartu, den a kag ake no Aa-asuur we. Kaa ɗofoogu, yaam a yuxum a den, too a xoolaƭarandta a xoox um pangool ke den.

⁸ Waasee njaga ne ten yaaga no saax laa Misira, yaam a mbondoox’a fo ten no ndeƥandoong um, a naƥin ƭeen um no ndoog um soo a ƥekin no njaga.

⁹ Ten taxu ɓoxotaanum na xa ƥay na xa pes um, na xa ƥay no Aa-asuur we ta yuxum’ina.

¹⁰ Weene a nga’a cer ƥor um, a ndam xa ƥiy xa koor axe fo xa tew axe ten, soo ten o mat da saŋkitin laƥ. A refata o njapil o ƭeetoor no rew we, a gadnel a qaw ale.»

Yeerusaleem a jaga’a

¹¹ «O ndeɓ um Oholiba a ga’a keene, soo a moƴin o samar na yuxum um. Njaga ne ten a hupa njaga ne no maag um.

¹² A yuxum a ndamaan no Aa-asuur we, gofornoor fo kelfa, gentand we ten, ndokooxna boo njegee sik, ŋaaŋaay waa ŋaayna pis, fop a ndef xa pes soo a yaawnoox.

¹³ Ga’aam ee a xoolaƭarandooxa. Den ɗik fop a ndeefa a ƭat a leng kut ale.

¹⁴ A ɓaata kene sax no njaga ne ten: Ye ta ga’na goor waa samandaaleena took tabax ne, nitaal no Kaakalde waa samandaalteena haŋik fa yeeq,

¹⁵ a saq xa qap no tet den fo tañalax mosu took a qoox den, a nandtaa den fop aa-adax no xiixire fo o mem no Baababilon we, we Kalde a refna mbaafaap den,

¹⁶ a yuxma a den ye ta ferna o ga a den soo a lulit a den wiin, maaga Kalde.

¹⁷ Maaga, Baababilon we a ngara me ten, ndax da mbondoox fo ten. A nqoolaƭarandtaan njaga den. A xoolaƭarandooxa fa den, cinj kaaga, da mbatin xus.

¹⁸ A weejla njaga um, a hulit cer ƥor um, too a wataxam xus, ne o maag um a watit’axama.

¹⁹ A mayƭanda njaga um, yaa ta wetandooxaa jamaane fee no ndeƥandoong um, ye ta jaga’oogna no saax laa Misira.

²⁰ Maaga, a yuxma we na njaga’aa, cer den a ndefna nen cer xa paam, da ngalde nen naar-koor.»

A qaw ale Yeerusaleem

²¹ «Wetandooxaa o njombe nqe no ndeƥandoong of, ye Miimisira we a moosaa ngang of soo a naƥnaa ƭeen yenafuleer ke wo.

²² Ten taxu, wo Oholiba, keeke o Yaal oxe na refkaa boo faw a layu: Ga’angi, xam fi boo xa pes axe wo mbat’oonga xus a yen took of, um ɓistiid a den muu refna took of.

²³ Baababilon we fo Kaakalde we fop, Pekod, Sowa fa Qowa fo Aa-asuur we fop yoonna fa den, fop a ndef xa pes, a yaawnoox, gofornoor fo kelfa, aa-adax no xiixire fo waa njegna ndod, a ŋaay pis den fop,

²⁴ owe ngarantang no ɓemb-roog o janoon, a saq ƥonax, a sareet-xire fo a saang a sareet fo mbokatoor no qeet. A mbidaang o kurul-keƥ, a ƥonoox pegoor maak fo teɓ fo o maxande. Ɓoxotaam a den hate fee, too xan a ngate’tong kebil den.

²⁵ Xam ɓax took of naal es. Xan a sayanong, a ƭeg o ñis of fo nof of, too we na yoqkaa na wo xan laƥ a maaf a den. Den na njangkaa xa ƥeef xa koor fo xa tew, too we na yoqkaa na wo xan fiɗel a raaɓ a den.

²⁶ Xan a mbolong ƭuc, a mbatin kelax mosandoor ke wo.

²⁷ Xam ñuf fo njombe ne wo fo njaga ne wo yaaga no saax laa Misira. Ɗeetkatiro farna fa den, too yiif of gomkatee a Misira.

²⁸ Keeke o Yaal oxe na refkaa boo faw a layu: Ga’angi, xam ɓoxotong na xa ƥay no we fuuxanoona, na xa ƥay no we mbatoonga xus.

²⁹ Xan a mbesoor fa wo fo fuux, a njang ke jale of a watna fop, a nqaƴong o ƥor, o yoq ƭuc, a nguyit gaci fee no njaga of. Fo njombe ne wo fo njaga ne wo

³⁰ na ngarkaa fo keene yaam kaa o jaga fo qeet keene, soo xoolaƭarandoorit nitaal pangool ke den.

³¹ Reefaa o jaf no maag of o tew, too mexe doonaa o feeƭ ole ten no ɓay of.

³² Keeke o Yaal oxe na refkaa boo faw a layu: Xan o yer o feeƭ ole no maag of o tew, o feeƭ o xooɗu too a yaaj. Xan o ref calat fo qaadnooxel, yaam kaa mayƭandel tem.

³³ Xan o way nep soo gooy. Kaa ref o feeƭ o baabayit fo o boowootand, o feeƭ ole Samari fee o maag of o tew.

³⁴ Xan o yerin boo ɓuus nqiim ke, duguñin xa ƥek xa ƥek, soo xucit a den ƭeen ke wo, yaam mi layun, mi o Yaal oxe na refkaa boo faw.

³⁵ Ten taxu keeke o Yaal oxe na refkaa boo faw a layu: Feek kaa o weecaam, fesaam ndiiñ, wo itam gadooxi coono ke no njombe of fo no njaga of.»

Roog a xawa a Samari fa Yeerusaleem

³⁶ O Yaal oxe a layaxam ee: «Wo fee o ƥiy no kiin, ndax kaa hate’kiro a Ohola fa Oholiba? Andnoori a den cednooxu ke den,

³⁷ yaam a njimbooxa no ceeq too fo’oy ley na xa ƥay den. A seeqa fo nitaal pangool ke den. Kaa jolna kaaga sax, xa ƥiy xa koor axe da ndiman’axama, a ndoxana a den pangool keene no bug den, ndax da lisit a den.

³⁸ Keeke a mbi’ahinaxam: A nqoolaƭaranda Mbind tedu ne mi no ñaal leng kut ne, a maasand pes a ñootnax ke mi.

³⁹ Ye da sadaxna xa ƥiy xa koor axe den nitaal pangool ke den, a ndoka no Mbind tedu ne mi no ñaal leng kut ne, ndax da maasandin. Keene o mat a mbi’u kam Mbind ne mi.

⁴⁰ A mbaaƭa sax goor waa inoortiidna koƭu, a lul maa den wiin, too den oo a ngara. Ɓogooxanaa a den, tusngul a kid of, rokoox kelax mosandoor ke wo.

⁴¹ Moofaa no njong mosu naa a taabul a sipeena mbaambir um, soo diƈ ten cuuraay fee mi fa diwliin fee mi.

⁴² O ñuxur no faan laa yaadooxna a nannooxa fo a yaj no goor fagkatar waa inoortiidna muu refna na koƥ-a-ƥor ale. A ndokooxana rew ɗik weene xa ƈang na xa ƥay, a ndoon fo ndip fo mosu took a qoox den.

⁴³ Maaga, layaam no kaa jofna no xe ceeq ne a ŋeesna yee: Njaga ne ten taxu ceeq ne yee gañ, o ten o mat oo.

⁴⁴ A soƥiide ne a caga a soƥtikeel. Neene mat Ohola fa Oholiba a soƥtiide, rew yaqooxu weene.

⁴⁵ Kaa koy, goor jofu o mat na ngate’kaa a den, ne rew seeseeq a ngate’teel, ne rew we ƥaxna fo’oy a ngate’teel, yaam kaa seeqaa, too fo’oy ley na xa ƥay den.»

⁴⁶ Keeke o Yaal oxe na refkaa boo faw a layu: «Fat faan maak a ngaran a den, da ƥoxotel diid le, o jeg den a waltel.

⁴⁷ Fat faan leene a ndoom a den a ƥil, a maafit a den laƥ. Fat xa ƥiy xa koor axe den fo xa tew axe den a mbarel, pind den a ndaaɓel.

⁴⁸ Neene, xam ñuf o njombe nqe kam saax le. Rew lakas we fop xan a nqotit teen a maƭax, too mbi’kee o njombe nen onqe na nuun.

⁴⁹ Xan o njombe nqe nuun a sagoox a nuun, nu sufoox coono ke no pakaad ke nuun fo nitaal pangool ke nuun, neene xan nu and ee mi refu o Yaal oxe na refkaa boo faw.»