Heseki’el 22 - NQAARIIT NE ROOG

A pi a cednooxu ke Yeerusaleem

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, ndax kaa hate’kiro, kaam ee ndax kaa hate’kiro teeru fa yednu fee? Andnooreen cednooxu ke ten fop!

³ Fat o lay ee: Keeke o Yaal oxe na refkaa boo faw a layu: Teeru fey a ɓaxaa fo’oy a ndeer um, ndax bes um a fadiid, a fi’aa nitaal pangool, ndax ta xoolaƭarandoox.

⁴ Waree o xaw yaam fo’oy le ɓaxoona, too xoolaƭarandoortaa nitaal pangool ke fi’oona. Neene, xuufaa xa yeng of, too fadiidaa no paangandoong xa kiid of. Ten taxu mexe ɓoxotang no niwaƭarel mbaambir qeet ke fo no xaadnooxeel mbaambir a saax ake.

⁵ We matna fo we ngoƭna xan a nqaadnooxang, wo fee xoolaƭarandooxna, too may fo a nootax.

⁶ Gelwaar we Isra’el owey: Oxuu refna kaa laltaa doole um me wo, ndax ta ɓax fo’oy.

⁷ Faap fa yaay kaa nqeefel me wo, o gataakoon ole a ñagadileel a ndeer of, o waan ole fo o ñaaw oxe a mbalteel.

⁸ Kaa o xeef fop ke tedlanduuma, maasandaa pes a ñootnax ke mi.

⁹ A jega me wo jaajamb, ndax da ƥax fo’oy. Ñaamel ke ƥoxoteena pangool ke na ñaameel me wo, fo njombe a mbi’eel a ndeer of.

¹⁰ A jega me wo waa na mbondooxaa fo o tew faap den, fo waa na ngignaa o tew oxaa saqna tap.

¹¹ A jega me wo we njimbooxna no cednooxu fo o tew no kend den, wene a nqoolaƭarandit a qoox den o wondoox fo seemir den rew, waana a ngignaa jigeen den ndefna xa ƥiy xa tew faap den.

¹² Me wo, ker ke kaa njaɓeel, ndax fo’oy a ɓaxel. Kaa o rawnitaa took ndimand ngupalu. Kaa o jaɓaa o jeg no kend of took o hup doole, soo mi o mat o weecaam. Mi o Yaal oxe na refkaa boo faw layun.

¹³ Xam yoɗanong o ɓay es yaam o hup doole le laltoona fo fo’oy le ɓaxeena a ndeer of.

¹⁴ Ndax xan njambaar of a maadaa? Ndax xa ƥay of xan a saƭik a koom alaa um inooxankang? Mi o Yaal oxe layun too xam fadnin.

¹⁵ Xam pasarong a ndeer qeet ke, pictong a ndeer a saax ake soo watin qac qoolaƭaru ke a ndeer of.

¹⁶ Laltaa njofaƭar of na pexey tooñ of na kid no qeet ke. Kaa koy, xan o and ee mi refu o Yaal oxe.»

¹⁷ O Yaal oxe a daawnaxam fa lay um na xa ƭelem axene:

¹⁸ «Wo fee o ƥiy no kiin, mbind Isra’el kaa ndefat na mi nen soxon njelem. Den fop kaa ndef nen xaaliis, xanjar, buraag, njelem ƥaal, beteex a ndeer fiɗel: Kaa ndefat nen soxon xaaliis.

¹⁹ Ten taxu keeke o Yaal oxe na refkaa boo faw a layu: Feek nuun fop kaa nu ndefat nen soxon njelem, mi xam fokat a nuun a ndeer Yeerusaleem.

²⁰ Ne xaaliis, xanjar, njelem ƥaal, beteex fa buraag a mbokatteel kam ndoxand naa fiɗel le a wuuɗeel, ndax da naaynel, neene um fokatitkaa a nuun kam fuux es fo o say es. Xam diƈ a nuun teen soo naayin a nuun.

²¹ Xam fokat a nuun, wuuɗ took nuun fiɗel le no fuux le mi soo naayin a nuun teen.

²² Ne xaaliis a naayniteel a ndeer ndoxand, neene nu naaynitkeel a ndeer fuux le mi kam Yeerusaleem, too xan nu and ee mi refu o Yaal oxe, na ɓaxaa fuux es took nuun.»

²³ O Yaal oxe a daawnaxam fa lay um na xa ƭelem axene:

²⁴ «Wo fee o ƥiy no kiin, layi a Yeerusaleem ee kaa ref lanq kaa nqoolandaandeena, nquƥandtaand a teƥ a koom alaa fo fuux le.

²⁵ Duleer we ten kaa ngukraa a ndeer um nen njogoy naa na ŋuuraa, a listaa mbuufuɗag um. Kaa da listaa wiin we, a njaɓaa kalal ke fo tig oo tig ke njegna o njiriiñ. A mayƭanda teen ñaaw we.

²⁶ Saasadax we ten a ƭapa kebil es, a maasand ke tedlanduuma. Mbaagee o njektirand ke tedna fo ke tedaƭarna, andnooree njektir ne no ke xoolna fo ke xoolaƭarna. Kaa muur a kid den, ndax nga’kee pes a ñootnax ke mi, too niwaƭareem a ndeer den.

²⁷ Gelwaar we ten kaa ndef kam um nen a teeteem akaa na listaa mbuufuɗag den. Kaa ƥaxaa fo’oy, a mo’andaa xa laaw axe, ndax da njegit halal no qooleer.

²⁸ Duleer we ten kaa ƭuumaa fop fa laso, a njeg peeñil naanaxir soo a njo’taa na xa maaƥ. Kaa layaa yee: ‹Keeke o Yaal oxe na refkaa boo faw a layu.› Yaaga fop oo, o Yaal oxe layee dara.

²⁹ Wiin we no saax le kaa mbi’aa a ƭom-yedar, a nguuɗaa, a toroxandaa o ndool onqe fo o toroxu xe, a ñagadilaa o gataakoon ole, a njiriiñooraa haq um.

³⁰ Waaƭaam a ndeer den o koor oxaa maxanna a den saŋe, a geenoox mbaambir es no gur ole, a farit saax le, ndax gefkinum, ndaa koy ga’iim.

³¹ Maaga, ɓaxaam fuux es took den, saŋkit a den fiɗel le no ngañak es. Xam nomit a den a pi den. Mi o Yaal oxe na refkaa boo faw layun.»