Heseki’el 21 - NQAARIIT NE ROOG

Isra’el a daawa o nan o feleer

¹ O Yaal oxe a daawnaxam fa lay um na xa ƭelem axene:

² «Wo fee o ƥiy no kiin, wiƈaqilooxi farna fa ñamaak, waare took o ɓemb-roog o ñamaak! Jo’tanaam took suungaan le na koƥ ale no ɓemb-roog o ñamaak!

³ Fat o lay suungaan le no ɓemb-roog o ñamaak ee: Nan-gilooxi fa lay fee no Yaal oxe! Keeke o Yaal oxe na refkaa boo faw a layu: Mexe heƥandaa kam of fiɗel laa na raaɓkaa me wo ndaxar nquƥu nuu refna fo ndaxar mbeeru nuu refna. Ƈulfaan ne na aal ake ñufkee, too mukit fuu refna xan a ñaastel teen, a xotit no ɓemb-roog o ñamaak boo no janoon.

⁴ Maaga, oxuu refna xan a ga ee mi o Yaal oxe heƥandun too ñufkee.»

⁵ Maaga, layaam ee: «Ey o Yaal oxe na refkaa boo faw, weene kaa layaa na mi yee: ‹A naxax rek a laytaa.› »

⁶ O Yaal oxe a daawnaxam fa lay um na xa ƭelem axene:

⁷ «Wo fee o ƥiy no kiin, geleerooxani a Yeerusaleem too waare took fo mbiñ fo tedu ne! Jo’tanaam took o fiisel ole Isra’el.

⁸ Fat o lay o fiisel ole Isra’el ee: Keeke o Yaal oxe a layu: Xam damir fa wo. Xam woosit laƥ ne mi no xool um, soo war na wo jofu we fo soxodu we.

⁹ O saŋik jofu we fo soxodu we taxu um woosit laƥ ne no xool um, ndax um xaw mbindeef nuu refna, a xotit no ɓemb-roog o ñamaak boo no janoon.

¹⁰ Maaga, fop xan a and ee mi o Yaal oxe, woostaam laƥ es no xool um, too dakinkatinum teen.

¹¹ Wo fee o ƥiy no kiin, iini! Fo xeeñ gooyu fa kam fa mbagu xan o iin na kid den.

¹² Maaga, yaa da laamitkang ee: ‹Xar o iinaa?› Fat o doon a den ee: Kaam daaw o nan o feleer olaa na taxkaa nof ke fop a mboof, xa ƥay axe fop a yaar, a yiif ake fop a njaq, kuɓay ke fop a nand fa foofi. Oxe garaa too xan a fadnoox. Mi o Yaal oxe na refkaa boo faw layun.»

Ke yegniteena no laƥ ne

¹³ O Yaal oxe a daawnaxam fa lay um na xa ƭelem axene:

¹⁴ «Wo fee o ƥiy no kiin, jo’tanaam! Fat o lay ee: Keeke o Yaal oxe a layu: Laƥ ne, laƥ ne a lake, a seesel.

¹⁵ A bar o mat taxu ta lakel, o meleƈaa a tax ta seesel. Ndax i mbaaga o mbelakinoox no samb ole no maad oxe o ƥees? Laƥ ne kaa xeef o loq oluu refna.

¹⁶ Kaa cooxtel ndax ta ɓodaxnel, boo o ɓay a waagin o pok. Laƥ ne a lake, a ɓodaxnel, ndax o ɓay ole no baawar oxe a ɓonooxin.

¹⁷ Wo fee o ƥiy no kiin, wuuqi too ɗomatoox, yaam a face took xeet es, took gelwaar we Isra’el fop. A njoore took laƥ ne, den fa xeet es. Ten taxu xawooxi no fek!

¹⁸ Keene ƭeetlax oo. Xar na xewkaa yaa o samb o xeexeef ole a refkateerna meen? Mi o Yaal oxe na refkaa boo faw layun.

¹⁹ Wo fee o ƥiy no kiin, jo’tanaam too foxoox! Yaam laƥ ne xan a xaw a caf a ƭak boo na tadak. Laƥ naa na waraa yoo, laƥ naa na fi’aa boom, na raxaa a den.

²⁰ Xam doon na xa ton-maax axe den fop laƥ ne na waraa, ndax njambaar den a ɓut, da moƴ o ndiid. Ey, a jagande, ndax ta filin xa meldaan, a lakel, ndax ta saŋik.

²¹ Godi na ñamaak, god na janoon, wo laƥ mbeelu ne, wiril weel le wo muu refna!

²² Mi o mat, xam foxaa, too xan fuux es a jeg ne ta bugna. Mi o Yaal oxe layun.»

Yeerusaleem a songe

²³ O Yaal oxe a daawnaxam fa lay um na xa ƭelem axene:

²⁴ «Wo fee o ƥiy no kiin, sexi a ƭat a ƭak ndax laƥ ne no maad oxe Babilon a fadiid. A ƭat a ƭak ake fop xan a sutoor no saax leng kut. Samandaali o anddiloor no ƭat-sal ne jaginna na teeru fee, samandaaleen

²⁵ na ƭat ale o sexkaa, ndax laƥ ne a fadiid Raba, teeru fee no Aa-amon we, a fadiid itam no Yuuyuda we kam Yeerusaleem, teeru fa njegu saŋe fee.

²⁶ O maad oxe Babilon oxe geenooxa no ƭat-sal ne na ƭat a ƭak ake, ndax ta ɗeetnoox. Oxe yo’naa a kas ake, a laamtaa nitaal pangool ke, a horooxaa a qeeñ muumeen.

²⁷ No ɓay o ñamaak um ƭeet ne a yena took Yeerusaleem. Kaa tee: ‹Geenni masiin komir kaa na nqoyeel a suk paal, jibin o wuuq xire, ndax o xoyit na bar ale, geenin a suk paal ake na xa ton-maax axe, yoɗ a uum lanq a songir, max a uum lanq.›

²⁸ We ngenna Yeerusaleem kaa nga’itkan doŋ nen ƭeet maamaaɓ, yaam ne da mboorniteena a taaƥ. Kaa koy, o maad oxe Babilon xan a wetand a den boom den, ndax da naangel nuus.

²⁹ Ten taxu keeke o Yaal oxe na refkaa boo faw a layu: Feek nu mbetandta boom le nuun, ngulit tooñ nuun, mbeeñil nañ pakaad nuun kam a pi ake nuun fop, feek nu mbetandooxe, xan nu naangel nuus no ɓay.

³⁰ Wo o kore’aƭaru xe mat, o soxodu xe, o kelwaar oxe Isra’el, waxtu fee a poom ake wo a mbagkaa tak oxe garaa.

³¹ Keeke o Yaal oxe na refkaa boo faw a layu: Tañalax ne xan a watnel, o ndip onqe a wolel. Fop xan a suptoox. Ke neewandeena xan a yoɗel soo ke yoɗeena a neewandel.

³² Kefatin took kefatin na refkaa meen. Ten um fi’kaa. Fop a suptooxa boo a ƴut, a kar ale no xe na ɗegaa hate fee, too um ɓoxotkan o ten na cungateel.»

Aa-amon we a songe

³³ «Wo fee o ƥiy no kiin, jo’tanaam! Fat o lay ee: Keeke o Yaal oxe na refkaa boo faw a layu no Aa-amon we fo no niwaƭarel den: Fat o lay ee: Laƥ ne, laƥ ne a woose, a lakel, ndax ta saŋik, a fand soo a ƥeleñ.

³⁴ Yaa nu mbugko ndaawneel peeñil koɓong fo ƭeet maamaaɓ, xan laƥ ne a fand o cok no soxodu we, bes den a fadiidkaa a jopir tooñ den a dey sik.

³⁵ Dakni laƥ of no xool um. Xam hate’tong no mbiñ onqe saktee’oona, no saax le cosaanooroona.

³⁶ Xam sayanong, wuuɗ took of fiɗel le no fuux le mi, soo ɓoxotong na xa ƥay no raaraaɓ saɗu yaq.

³⁷ Xan fiɗel le a raaɓong, fo’oy of a may no saax le, too wetandooxkataandee. Mi o Yaal oxe layun.»