Heseki’el 20 - NQAARIIT NE ROOG

Roog a ɗoxa a Isra’el, ke ta siiknoorna fo ten fop oo

¹ No hiid o ɓetuu ɗikandeer ole, no ñaal xarɓaxayandeer ne no nqool o ƥetkandeer onqe, goor leng-leng a ndeer no maak we Isra’el a ngara, ndax da nga’ir fo o Yaal oxe too a moofa mbaambir es.

² Maaga, o Yaal oxe a daawnaxam fa lay um na xa ƭelem axene:

³ «Wo fee o ƥiy no kiin, layi fo maak we Isra’el. Fat o yegin a den ee: Keeke o Yaal oxe na refkaa boo faw a layu: Ndax o nga’ir fa mi taxu nu ngar? Ne ta wooritna yee mexe ñoowaa, xaƴkiim nu nga’ir fa mi muk. Mi o Yaal oxe na refkaa boo faw layun.

⁴ Ndax xan o hate a den, kaam ee ndax xan o hate a den, wo fee o ƥiy no kiin? Andnoori a den a pi a cednooxu ke no daan den.

⁵ Fat o lay a den ee: Keeke o Yaal oxe na refkaa boo faw a layu: A koom alaa jiluuma a Isra’el, daaɓooxaam fo mbind Yakoob, andnoox a den no saax laa Misira. Daaɓooxaam fa den fo o ɓay es took ee: Mi refu o Yaal oxe Roog nuun.

⁶ A koom, daaɓooxaam fa den fo o ɓay es took ee xam sutit a den no saax laa Misira, ɓis a den no saax laa horooxan’uuma a den, saax laa fo sis fo suum a ndaxritaa, le moƴna o mos na saax ake fop.

⁷ Layaam a den ee: Fat oxuu refna na nuun a deɓ nitaal roog cakalaaru ke yulna a kid um. Ba nu nqoolaƭarandit a qoox nuun pangool ke Misira. Mi refu o Yaal oxe Roog nuun.

⁸ A siiknoora fa mi, a mbañ o nan-gilooxaam. O leng na den deɓee cakalaaru ke yul’ina a ngid um, too mbaasee pangool ke Misira. Maaga, xalaataam o sayan a den, fagiɗ fuux es tak took den a ndeer saax le Misira.

⁹ Yaqanee koy, fi’inum yaam gon es, ndik ta maasandel na kid no qeet ke da ndeeƭna a ndeer den, ye andnooxuuma a den, ndax um sut a den no saax le Misira.

¹⁰ Suttaam a den no saax le Misira, ɗox a den na koƥ-a-ƥor alaa.

¹¹ Cooxaam a den bargal es, andnoor a den kebil es ke o kiin oxe a warna o fadin, ndax ta ñoowit na den.

¹² Cooxaam a den itam pes a ñootnax ke mi nen o anddiloor a ndeer es fa den, ndax da and ee mi refu o Yaal oxe na tedlandaa a den.

¹³ Kaa koy, mbind Isra’el a siiknoora fa mi kam a koƥ-a-ƥor ale. Ndeefee bargal es, too a ndeɓa kebil es ke o kiin oxe a warna o fadin, ndax ta ñoowit na den. A maasanda pes a ñootnax ke mi, a mbañ o mbaas. Xalaataam o sayan a den kam a koƥ-a-ƥor ale, ndax um saŋik a den.

¹⁴ Yaqanee koy, fi’inum yaam gon es, ndik ta maasandel na kid no qeet ke maad’ina ye um sutaa a den no saax le Misira.

¹⁵ Kam a koƥ-a-ƥor ale, mi o mat daaɓoox’u fa den fo o ɓay es took ee ɗoxkiim a den no saax le ci’uuma a den, saax laa fo sis fo suum a ndaxritaa, le moƴna o mos na saax ake fop,

¹⁶ feek kaa nqeef’u kebil es, a mbañ o ndeef bargal es soo a maasand pes a ñootnax ke mi, yaam xeeñ den a saaƭoox no pangool ke den.

¹⁷ Kaa koy, ye ga’uuma a den, yirmaam a den lool no saŋik a den, too moocandiim a den kam a koƥ-a-ƥor ale.»

Isra’el kaa gen no nanaƭaranaa a Roog

¹⁸ «Layaam xa taan den kam a koƥ-a-ƥor ale yee: Ba nu ndeef bargal ke no daan nuun, ba nu ngay kebil den, too ba nu ndoɗgandit a qoox nuun pangool ke den.

¹⁹ Mi refu o Yaal oxe Roog nuun. Ndeefyo kebil es, ngay bargal es soo mbadin a den.

²⁰ Tedlandyo pes a ñootnax ke mi, too xan a ndef a ndeer es fa nuun o anddiloor olaa na lalitkaa yee mi refu o Yaal oxe Roog nuun.

²¹ Kaa koy, xa taan axe a siiknoora fa mi. Ndeefee bargal es, ngayee too mbadnee kebil es ke o kiin oxe a warna o fadin ndax ta ñoowit na den. A maasanda pes a ñootnax ke mi. Xalaataam o sayan a den, fagiɗ fuux es tak took den kam a koƥ-a-ƥor ale.

²² Yaqanee koy, damaam o ɓay es, fañin o fi yaam gon es, ndik ta maasandel na kid no qeet ke maad’ina ye um sutaa a den Misira.

²³ Kam a koƥ-a-ƥor ale, mi o mat daaɓoox’u fa den fo o ɓay es took ee xam pasar a den a ndeer qeet ke, picit a den na saax a pogreer,

²⁴ yaam ndeef’ee bargal es, a ndeɓ kebil es, a maasand pes a ñootnax es soo a maad o ngaan no pangool ke no daan den.

²⁵ Mi cooxu a den itam bargal kaa mbaax’eerna fo kebil kaa da mbaag’eerna o ñoowit.

²⁶ Xoolaƭarandtaam a den sadax den, ye da sadaxtaa taaw ke den fop, ndax um diidland a den boo da and ee mi refu o Yaal oxe.»

Roog xan a xuuf a cuur pangool ale no Ii-isra’el we

²⁷ «Ten taxu wo fee o ƥiy no kiin, layi fo mbind Isra’el. Fat o yegin a den ee: Keeke o Yaal oxe na refkaa boo faw a layu: Daan we nuun kaa mbenoogaam yaa da laltaa ngore’aƭar na mi.

²⁸ Ɗoxaam a den boo no saax le daaɓoox’uuma fo o ɓay es took ee xam ci’in a den. Den o mat, muu da ƈookna ñaang sadaxand mbaat ndaxar niɓu, a ƥoxot maaga sadax den, a mbuuxnoortaam maaga sadax tuufe-duufe ke den, a ƥoxot maaga sadax pelu tuñ ke den soo a njuur maaga biiñ fee den.

²⁹ Maaga, laamtaam a den ee: Xar ñaang sadaxand lene nu ndetaa a refu? No kaa xotitna maaga, fo mbiñ naaga a ne’ate ‹A ñaang a sadaxand› boo xaye.

³⁰ Ten taxu layi mbind Isra’el ee: Keeke o Yaal oxe na refkaa boo faw a layu: Ndax nu nqoolaƭarandoortee nen daan we nuun soo njaga’aa yaa nu ndeefaa roog cakalaaru ke den?

³¹ Yaa nu ƥoxotaa sadax nuun, ndoxaa xa ƥiy nuun nen sadax, kaa nu maad o nqoolaƭarandtaa a qoox nuun boo xaye pangool ke nuun. Nu mbooga moos ee xam xaƴ nu nga’ir fa mi. Ne ta wooritna yee mexe ñoowaa, mi o Yaal oxe na refkaa boo faw layun, xaƴkiim muk nu nga’ir fa mi.

³² Ke nu mboogna jegkee muk, yaa nu layaa yee: ‹Kaa i mbug o nand fo qeet ke fo a qaw ake na saax a lakas ake. Kaa i mbug o mbaɗooxaa a teex fo a ƥil.›

³³ Ne ta wooritna yee mexe ñoowaa, mi o Yaal oxe na refkaa boo faw layun, xam maadoox took nuun fo o ɓay o jegu doole fo a naax a cegu katil soo picit fuux es.

³⁴ Xam sutit a nuun a ndeer qeet ke, fokatit a nuun na saax ake nu pasaroox’ina fo o ɓay o jegu doole fo a naax a cegu katil fo fuux le mi na biltooxkaa.

³⁵ Xam ɓis a nuun kam a koƥ-a-ƥor ale, maa goƭna qeet lakas ke, too maaga xam layoor fa nuun jaxrañ.

³⁶ Ne layoorit’uuma fo daan nuun na koƥ-a-ƥor ale Misira, neene um layooritkaa fa nuun. Mi o Yaal oxe na refkaa boo faw layun.

³⁷ Xam korolit a nuun o samb ole soo ɗoxit a nuun xa ƥaak axe no ngiɓoor ne.

³⁸ Xam suud na nuun we siiknoorna fa mi soo a tooñaam. Xam sut a den no saax le da ngenna, ndaa ndokkee no saax le Isra’el. Maaga, xan nu and ee mi refu o Yaal oxe.

³⁹ Nuun mbind Isra’el o mat, keeke o Yaal oxe na refkaa boo faw a layu: Ndetyo, fat oxuu refna a faɗook pangool um! Kaa koy, xan nu nga’in too cinj kaaga xan nu nan-gilooxaam. Neene, nu maasanditkatee gon tedu le mi ci’it ke nuun fo pangool ke nuun.

⁴⁰ Fat nu yeg fo and ee took o joong o tedu le mi, took o joong o jiig ole Isra’el, teen mbind Isra’el fop, fop we na ndefkaa no saax le a mbaɗooritkaxam. Maaga um dalnitkaa a den a paax. Xam waaƭaa ke nu mbatnanaxama, taawlax ke no ci’it ke nuun fo fop ke nu kesankaxam. Mi o Yaal oxe na refkaa boo faw layun.

⁴¹ Xam dalin a nuun a paax nen sadax faa felaxama tuñ bo, yaa um sutitkaa a nuun a ndeer qeet ke, fokatit a nuun na saax ake nu pasarooxna. Xam tedlandooxit na nuun na kid no qeet ke.

⁴² Xan nu and ee mi refu o Yaal oxe, yaa um nomtiidkaa a nuun no fiisel ole Isra’el, kam saax le daaɓoox’uuma fo o ɓay es took ee xam ci’in daan nuun.

⁴³ Maaga, xan nu mbetandoox a pesoorooƭ nuun fo a pi ake nu ndoɗganditna a qoox nuun fop. Nu saɗkatee o mbadir a kid, yaam a pi a paaxeer ake nu mbi’na fop.

⁴⁴ Xan nu and ee mi refu o Yaal oxe, yaa um fesoorkaa fa nuun neene yaam gon es, ndaa refkee muk yaam a pesorooƭ a paaxeer nuun fo a pi a parƴu ke nuun, nuun mbind Isra’el. Mi o Yaal oxe na refkaa boo faw layun.»