Heseki’el 19 - NQAARIIT NE ROOG

Ƭomatax ne took no maad we

¹ «Wo koy, yoɗi a kim a ƭomatax no gelwaar we Isra’el.

² Fat o lay ee: Cey, ya of soo reeƭu njogoy ƥasil ndeer cogoy ke. Kaa wondoox’u a ndeer fo njogoy fo njanglax ne, a ñoownaa xa ƥeem.

³ A saya o leng na den, a yarin boo ta refat o njogoy o njanglax onqaa aqatooxna ne mbuufuɗag a listiteel, too a lista wiin.

⁴ Qeet ke a nana ta layteel. A ndamaan no gamb soo a ƥistin xa keɗ no ñis no saax laa Misira.

⁵ Maaga, yaay fee a muñ’a boo a xij, too a ga’a yee yaakaar um a tasa. A xotatina o lakas na xa ƥeem, a fi’in o njogoy o njanglax.

⁶ A widlooxa a ndeer cogoy ke, a refat o njogoy o njanglax. A aqatooxa ne mbuufuɗag a listiteel too a lista wiin.

⁷ A bayta pind mosu ke den soo a gef teeru ke den. Saax le fo fop we ndeeƭna teen a ndiida, ye da nanna fangax le no bumb ole ten.

⁸ Qeet lakas ke mbiduuna fo maat ke a mbogooxanaan. A letna took um mbaal den, too a naage nuus no gamb le den.

⁹ A ɓeke no korka fo xa keɗ, a ɓisel maa no maad oxe Babilon. A ɓise no saŋe, ndax o ñuxur um nankataand took xa coong axe Isra’el.»

Ƭomatax ne took ndaxar biiñ ne

¹⁰ «Ya of kaa nandtoogu ndaxar biiñ naa jimbeena paam poofi. Kaa rim’u bo, a saqit boo a niɓ tit, yaam poofi mayaan ke.

¹¹ Kaa jeg’u xa par xa maak xa mosu, axaa ndefoogatna xa samb no maad. Geel um kaa yoɗ’un, ta garit kol niɓu ke took. A waag’e o ga a paax na pexey geel um fo xa par xa mayu xe ten.

¹² Kaa koy, a fuur’e fo fuux ɗomu, a deɓel a lanq. Nqeñ ne no batand a weerna xa tim axe ten, xa par xa maak axe a mbastoox soo a mbeer. Fiɗel le a raaɓa a den.

¹³ Ndiiki koy, kaa jimbel kam a koƥ-a-ƥor ale, no lanq beeru koroŋ too a ngoɗomel.

¹⁴ Fiɗel le a sutoora na xa par axe ten soo a raaɓ xa car axe ten fo xa tim axe ten. Jegatee o par o maak o mosu laa waagatna o ref o samb no maad.» Keene kaa ref a kim a ƭomatax alaa wareena o gimit ne ta refitna.